بەپێی نوێترین ڕاپۆرتەکانی ڕێکخراوەکانی مافی مرۆڤ، شەپۆلێکی نوێی جێبەجێکردنی سزای لەسێدارەدان و دەرکردنی بڕیاری قورس لەلایەن دەزگای دادوەریی ئێرانەوە دەستی پێکردووە، کە تێیدا ژنان، دەستبەسەرکراوانی بیانی و بەشداربووانی خۆپێشاندانەکانی مانگی کانوونی دووەمی ٢٠٢٦ دەکرێنە ئامانج.
لەسێدارەدانی کچێکی تەمەن ٢٠ ساڵ لە ئیلام
ئاوێنە: بەرەبەیانی ڕۆژی چوارشەممە، ١٩ی ئابی ٢٠٢٦، سزای لەسێدارەدانی هاووڵاتییەکی کورد بەناوی دنیا محەممەدی لە بەندیخانەی ناوەندیی ئیلام جێبەجێ کرا. دنیا محەممەدی کە خەڵکی شاری ئەیوان بوو، لە تەمەنی ١٨ ساڵیدا (دوو ساڵ پێش ئێستا) بە تۆمەتی کوشتنی بە ئەنقەستی ئامۆزاکەی، کە هاوکات داخوازی کردبوو، دەستبەسەر و دواتر سزای سێدارەی بەسەردا سەپێندرابوو.
سزای سێدارە لە دۆسیەی دەستبەسەرکراوانی خۆپێشاندانەکاندا
بەگوێرەی ئامار و زانیارییەکانی دەزگاکانی مافی مرۆڤ، دادگاکانی ئێران سزای سێدارەیان بەسەر چەندین دەستبەسەرکراودا سەپاندووە یان جێبەجێیان کردووە:
پوریا حسێنیمەفرەد (٢٣ ساڵ): بەپێی هەواڵی ئاژانسی هەرانا، ناوبراو یەکێکە لە دەستبەسەرکراوانی خۆپێشاندانەکانی کانوونی دووەمی ٢٠٢٦ و لەلایەن لقی پێنجی دادگای شۆڕشی مەشهەدەوە سزای سێدارەی بەسەردا سەپێنراوە و ئێستا لە زیندانی وەکێڵئاوایە.
قائیم حسێنی: ئاژانسی "میزان"ی فەرمی دەزگای دادوەریی ئێران ڕایگەیاندووە کە سزای سێدارەی ئەم هاووڵاتییە بیانییە جێبەجێ کراوە؛ ناوبراو لە دۆسیەی ناسراو بە "مەیدانی عەلیخانی" ئەسفەهان لە کاتی خۆپێشاندانەکانی کانوونی دووەمی ٢٠٢٦دا دەستگیرکرابوو.
لەسێدارەدانی بەکۆمەڵ لە ماوەی یەک هەفتەدا
سەرچاوەکانی داکۆکیکار لە مافی دەستبەسەرکراوان ئاشکرایان کردووە کە تەنیا لە نێوان ١١ تا ١٧ی ئابی ٢٠٢٦، لانیکەم ٩ بەندکراو لە زیندانەکانی ئەسفەهان، ئەردەبیل، عادلئاوای شیراز و زاهیدان لەسێدارەدراون. لەنێو لەسێدارەدراوەکاندا، ناوی شەهرام سادقی، یەکێکی تر لە دەستبەسەرکراوانی خۆپێشاندانەکانی کانوونی دووەمی ٢٠٢٦، تۆمار کراوە.
سزادانی دارایی و زیندانی بۆ مێرمنداڵێکی پێشوو
لە بەشێکی دیکەی بڕیارە دادوەرییەکاندا، زەهرا ڕەبانی، کچە کوردێکی تەمەن ١٨ ساڵانی خەڵکی بجنوور، لەلایەن دادگای تاوانەکانی ئەو شارەوە ڕووبەڕووی سزای ١٥ مانگ و دوو ڕۆژ بەندیخانەی تەعزیری و پێبژاردنی ٦ ملیۆن تمەن سزای دارایی بووەتەوە. ڕەبانی لە کاتی بەشداریکردنی لە خۆپێشاندانەکانی کانوونی دووەمی ٢٠٢٦دا، تەمەنی تەنیا ١٧ ساڵ بووە.