لابردنی سێ سفر لەسەر دراوی عێراقی، هەنگاوێکی تەکنیکی و کارگێڕییە کە ئامانج لێی باشترکردنی ژێرخانی نەختینەییە، بێ ئەوەی هیچ گۆڕانکارییەک لە بەهای ڕاستەقینەی سەرمایەی هاووڵاتییان یان هێزی کڕیندا دروست بکات. گوڵاڵە سدیق، شارەزای ئابووری، جەخت لەوە دەکاتەوە که ئەم پرۆسەیە لە چەند ڕەهەندێکی جیاوازەوە کاریگەریی دەبێت:

١. ڕەهەندی تەکنیکی و کارگێڕیی

لە ڕووی ژمێریارییەوە، لابردنی سفرەکان پەستانی سەر سیستەمی بانکی و بودجەی گشتی کەم دەکاتەوە، چونکە مامەڵەکردن لەگەڵ ژمارە ملیار و تریلیۆنییەکاندا هەمیشە باری قورسی خستووەتە سەر سیستەمەکان و ئەگەری هەڵەی مرۆیی بەرزکردووەتەوە. هاوکات، ئەم هەنگاوە خەرجییەکانی چاپکردن، گواستنەوە و هەڵگرتنی دراو لە گەنجینەکاندا بە ڕێژەیەکی بەرچاو دادەبەزێنێت و مامەڵەی ڕۆژانەی هاووڵاتییان لە بازاڕدا سادەتر دەکاتەوە.

٢. هێزی کڕین و هەڵئاوسان؛ چاوەڕوانییەکان vs ڕاستییەکان

سەبارەت بە کاریگەری لەسەر هاووڵاتییان، گوڵاڵە سدیق ڕوونی دەکاتەوە کە لابردنی سفرەکان بەهای دراو بەرز ناکاتەوە و هێزی کڕین ناگۆڕێت. بۆ نموونە: ئەگەر کیلۆیەک گۆشت بە ۲۵,۰۰۰ دینار و مووچەی فەرمانبەرێک ۱,۰۰۰,۰۰۰ دینار بێت، دوای لابردنی سفرەکان نرخەکە دەبێتە ۲۵ دینار و مووچەکەش دەبێتە ۱,۰۰۰ دینار، واتە توانای کڕین بە تەواوی وەک خۆی دەمێنێتەوە.

لە لایەکی ترەوە، ئەم هەنگاوە بە تەنیا کێشەی هەڵئاوسانی ئابووری چارەسەر ناکات، چونکە هەڵئاوسان ڕاستەوخۆ بەستراوە بە ئاستی بەرهەمهێنانی ناوخۆیی، هەناردەکردن و سیستەمی وەبەرهەنانەوە، نەک لابردنی سفرەکان.

٣. کۆنترۆڵکردنی کاشی شاراوە و لێدانی بازاڕی سێبەر

لە کاتی ئاڵوگۆڕکردنی دراوی کۆن بە نوێ، ئەو نەختینە شارەزایەی لە دەرەوەی کەناڵە بانکییەکان کۆبووەتەوە، ناچار دەبێت تێپەڕێت بە سیستەمی بانکی و ڕەوایەتی پێ ببەخشێت.

بە گوێرەی ئامارە ئابوورییەکان، لە کۆی زیاتر لە ۱۰۰ تریلیۆن دینار، تەنها نزیکەی ۳۰ تریلیۆن دینار لەبەردەست حوکومەتدایە بۆ مووچە و پڕۆژەکان، لە کاتێکدا نزیکەی ۷۰ تریلیۆن دینار لە دەرەوەی سیستەمی بانکی و لە ژێر دەسەڵاتی قۆرخکاران و بازاڕی ڕەشدا دەسووڕێتەوە و بۆ یاریکردن بە بازاڕی دراو بەکاردەهێنرێت. هەر بۆیە، ئەم شارەزایە ئابوورییە پێی وایە هاوتەریب لەگەڵ هەنگاوەکانی تری دەوڵەت، لابردنی سفری دینار باشترین ڕێکارە بۆ گەڕانەوەی ئەو کاشە زەبەلاحەی لە "ژێر زەمین، بیر، تەنور، باخ و مەلەوانگەکاندا" شاردراوەتەوە بۆ ناو خەزێنەی دەوڵەت.