هادی عامری، ئەمینداری گشتیی ڕێکخراوی بەدر، داوای لە لایەنە پەیوەندیدارەکان کرد کە خۆیان بەدوور بگرن لە بەکارهێنانی زمانی توند و گوتاری گرژی سیاسی، و هاوکات پێوەرێکی نوێی بۆ شەرعییەتی هەڵگرتن و بەکارهێنانی چەک لە وڵاتدا دیاری کرد.
ئاوێنە: لە بەیاننامەیەکدا کە تایبەت بوو بە پێشهاتە سیاسی و ئەمنییەکان، عامری جەختی لەسەر پێویستیی هێورکردنەوەی کەشی گشتی کردەوە و ئاماژەی بەوە دا کە شەرعییەتی چەک بە تەنیا لە بۆشاییدا دروست نابێت، بەڵکوو بەندە بە ئاستی پابەندبوون و وەدیهێنانی بەرژەوەندییە باڵاکانی نیشتمانەوە.
ناوبراو ڕوونیشی کردەوە کە هەر چەکێک شەرعییەتی ڕاستەقینەی خۆی لەوەوە وەردەگرێت کە تا چەند لە خزمەت پاراستنی ئاسایشی نیشتمانی و بەرژەوەندیی گشتیدایە، هاوکات هۆشداری دا لەوەی پەنادان بۆ وتاری ئاڵۆزکار و گرژ، کاریگەریی نەرێنی لەسەر سەقامگیریی وڵات دروست دەکات و پێویستە بەرژەوەندیی باڵای نیشتمان لەسەرووی هەموو دەنگە ناکۆکەکانەوە دابنرێت.