ئەنوەر حاجی عوسمان، جێگری پێشووی وەزارەتی پێشمەرگە لەبارەی ھێرشەکەی سەر نوسینگەی سەرۆکوەزیرانی ھەرێم، دەڵێت "هەڕەشەکانی ئێران پاشەکشە بەپارتی ناکات، ئەوان لەبیانوو دەگەڕێن، ئەگینا باش دەزانن ھێزو دەسەڵاتی ئەمریکا لەناوچەکە، نە بەکوردو نە بەفارس‌و نە بەعەرەب دەرناچێت".

ئاوێنە: ئەنوەر حاجی عوسمان، سەبارەت بەهێرشی درۆنی بۆ سەر نوسینگەی سەرۆکوەزیرانی ھەرێم بەئاوێنەی راگەیاند "بەو درۆنانە یان بەو ھەڵەشانە دەیانەوێت وابکەن پرسی کورد بەئاقارێکی دیکەدا ببەن، بەڵام خەیاڵیان خاوە، ھەرچی چەکە لەسەر کورد تاقی بکەنەوە؛ کوردو شۆڕش‌و ماڵی بارزان بەردەوام دەبن".

راشیگەیاند  "هەڕەشەکانی ئێران پاشەکشە بەپارتی ناکات، ئەوان لەبیانوو دەگەڕێن، ئەگینا باش دەزانن ھێزو دەسەڵاتی ئەمریکا لەناوچەکە، نە بەکوردو نە بەفارس‌و نە بەعەرەب دەرناچێت، ئەوان لەئێمە باشتر دەزانن".

جێگری پێشووی وەزارەتی پێشمەرگە مەسرور بارزانی سەرۆکوەزیرانی ھەرێمی بە"پێشمەرگە" ناو بردو وتی "هۆکاری ئەم ھێرشە دوو خاڵە: یەکەم، دژایەتی پێگەی جەنابی سەرۆکی حکومەتی ھەرێم کاک مەسرورەو ئەوەی دیکەشیان دەیانەوێت پارتی لەداوای رەوای گەلەکەمان پاشەکشە بکات، ئەوەش زۆر ئەستەمە، دڵنیام کاک مەسروریش پێشمەرگەیەو ئەوە گرنگە ئەستەمە سازش لەسەر داوای رەوای گەلەکەمان بکات".

بەرەبەیانی دوێنێ دووشەممە، دوو درۆنی بۆمبڕێژکراو لە جۆری (حەدید-١١٠) لەدیوی سنوری وڵاتی ئێرانەوە ئاراستەی بارەگای نوسینگەی تایبەتی سەرۆکوەزیرانی ھەرێمی کوردستان و شوێنی حەوانەوەی بەڕێوەبەری ئاژانسی پاراستن لەقەزای پیرمامی پارێزگای ھەولێر کران و ھیچ زیانێکی گیانییان لێنەکەوتەوە.