لیژنەی ئاسایش و بەرگری لە ئەنجومەنی نوێنەرانی عێراق ئاشکرای کرد کە ئەگەر فالح فەیاز، سەرۆکی دەستەی حەشدی شەعبی لە دانیشتنی تایبەتی لیژنەکە ئامادە نەبێت بە مەبەستی وەرگرتنی گوتەکانی لەسەر پرسی بۆردومانەکەی سعوودیە، ڕووبەڕووی مەترسیی دوورخستنەوە لە پۆستەکەی دەبێتەوە. هاوکات بڕیارە ڕۆژی پێنجشەممە بەڕێوەبەری نووسینگەی زەیدی وەک شایەتحاڵ ئامادەی پەرلەمان بێت بۆ خستنەڕووی زانیاری لەبارەی پرۆسەی ئاگادارکردنەوەی فەیاز لە هێرشەکە.
ئاوێنە؛ لەو بارەیەوە، ئەحمەد خەزعەلی، ئەندامی لیژنەی ئاسایش و بەرگریی پەرلەمان ڕایگەیاند کە پێشتر لیژنەکەیان نووسراوێکی فەرمیی ئاراستەی نووسینگەی عەلی زەیدی کردووە تا فەرماندە ئەمنییەکان بۆ لێپرسینەوە سەبارەت بە بۆردومانەکانی سعوودیە و ئەمریکا ئامادەی پەرلەمان بن. ناوبراو ئاماژەی بەوە کرد، نووسراوەکە لە کاتی خۆیدا بە دەستی زەیدی نەگەیشتووە تا وادەی دانیشتنەکە بە فەرماندەکان ڕابگەیەنێت کە ڕۆژی دووشەممە دیاریکرابوو، سەرەڕای ئەوەی بابەتەکە لە تەواوی دەزگاکانی ڕاگەیاندن و تۆڕە کۆمەڵایەتییەکاندا بڵاوبووبووەوە و هەمووان لێی ئاگادار بوون.
خەزعەلی لە چاوپێکەوتنێکی تەلەڤزیۆنیدا ڕوونیکردەوە کە لیژنەکە نووسراوێکی نوێی ئاراستە کردوونەتەوە و ڕۆژی پێنجشەممەی داهاتووی وەک وادەی نوێی لێپرسینەوەکە دەستنیشان کردووە. لە ئەگەری ئامادەنەبوونی سەرۆکی دەستەی حەشدی شەعبی، بەڕێوەبەری نووسینگەی فەرماندەی گشتی و بەڕێوەبەری نووسینگەی زەیدی ئامادەی دانیشتنەکە دەبن، وەک دوو شایەتحاڵ کە بەپێی گێڕانەوەکان زەیدی کاتی بۆردومانەکەی سعوودیەی بە فالح فەیاز گەیاندووە، تا وتەکانیان بە فەرمی وەربگیرێت.
ئەو پەرلەمانتارە جەختی کردەوە، لە ئەگەری پشتڕاستبوونەوەی ئەو زانیارییانە و سەلماندنی کەمتەرخەمی لە لایەن فالح فەیازەوە، یاخود قەناعەتنەهێنانی پەرلەمانتاران بە وەڵام و ڕوونکردنەوەکانی، دۆسیەکە دەخرێتە بەردەم ئەنجومەنی نوێنەران و لە ڕێگەی دەنگدانەوە بڕیار لەسەر لادانی لە پۆستەکەی دەدرێت.