ئەمڕۆ چوارشەممە ١٩ی ئاب، دەستەی پارێزەرانی لاهوور شێخ جەنگی و دەستگیرکراوانی لالەزار ڕایانگەیاند کە لە شاری هەولێر بە فەرمی سکاڵایان ئاراستەی سەرۆکایەتیی دادگای پێداچوونەوەی هەرێمی کوردستان (تەمیز) کردووە، ئەمەش وەک ناڕەزایەتییەک بەرامبەر بە نەناردن و ڕێگریکردن لە گواستنەوەی پەڕاوی دۆسیەکە بۆ دادگا.
ئاوێنە: سامان حەمە ئەحمەد، لە دەستەی پارێزەرانی دۆسیەکە ئاماژەی بەوە کرد کە لە سکاڵاکەیاندا داوای گرتنەبەری ڕێکاری یاسایی و سزادانی توندی ئەو دادوەرانە دەکەن کە بە گوتەی ئەوان «بە پاڵنەری حزبی دەستوەردان لە یاسادا دەکەن و ڕێگری لە گواستنەوەی پەڕاوی دۆسیەکە دەکەن بۆ دادگای تەمیز».
بەپێی لێدوانی ناوبراو، تەوەر و داواکارییە سەرەکییەکانی دەستەی یاساییەکە لەم خاڵانەدا چڕ دەبێتەوە:
- کۆتاییهێنان بە هەر جۆرە دەستێوەردانێکی حزبی لە کاروباری دادوەری و بڕیارەکانی دادگادا.
- بەنیشتمانیکردنی دەزگا تەناهییەکان و گەڕاندنەوەی بنەمای سەربەخۆیی و بێلایەنی بۆ دادگاکان.
- سەپاندنی سزای یاسایی بەرامبەر ئەو دادوەرانەی بەربەست بۆ ڕێڕەوی یاسایی ئەم دۆسیەیە دروست دەکەن.
لەلایەکی دیکەوە، سەبارەت بە دۆخی تەندروستیی ناوبراو، دانا تەقیەدین لە تیمی پارێزەرانی لاهوور شێخ جەنگی و گیراوانی لالەزار ڕایگەیاند، تەندروستیی جەستەیی ناوبراو جێگیرە، بەڵام لە ڕووی دەروونییەوە دۆخێکی نائارامی هەیە. پارێزەرەکە هۆکاری ئەمەش بۆ ئەوە دەگەڕێنێتەوە کە «وەک بارمتەیەکی سیاسی مامەڵەی لەگەڵدا دەکرێت و چارەنووسی نادیارە»، بە تایبەت دوای ئەوەی نزیکەی ساڵێکە لە دەستبەسەربوونیدا تێپەڕیوە و دۆسیەکەی هێشتا ڕووبەڕووی هیچ دادگایەک نەکراوەتەوە.