هاوپەیمانیی بەڕێوەبردنی دەوڵەت لە بەغدا ٣٨ـەمین کۆبوونەوەی ئاسایی خۆی بەست و لە ڕاگەیەندراوێکی فەرمیدا ئاماژەی بە تاوتوێکردنی کۆمەڵێک پرس و دۆسیەی گرنگی ئابووری، سیاسی و یاسایی پەیوەست بە عێراق کرد.
ئاوێنە: لە کۆبوونەوەکەدا، ئامادەبووان پشتیوانیی تەواوی خۆیان بۆ هەوڵ و هەنگاوەکانی حکوومەت و دەسەڵاتی دادوەری لە بواری ڕووبەڕووبوونەوەی گەندەڵی و سزادانی گەندەڵکاراندا دووپات کردەوە.
لە تەوەرێکی دیکەدا و سەبارەت بە دۆخی ناوخۆیی و گۆڕانکارییە ئیقلیمییەکان، هاوپەیمانییەکە باسی لە گرنگیی یەکخستنی هەڵوێستی نیشتمانی لەپێناو پاراستنی سەروەری و سەقامگیریی عێراق کرد. هەروەها هۆشداریی درا لە پێویستیی دوورخستنەوەی عێراق لە لێکەوتەی ئەو سزایانەی لەلایەن ویلایەتە یەکگرتووەکانی ئەمریکاوە بەسەر ژمارەیەک وڵاتدا دەسەپێنرێن، بەوپێیەی عێراق بە قۆناغێکی دارایی سەختدا تێدەپەڕێت و ژینگەی وڵات بەرگەی هیچ جۆرە سەرکێشییەک ناگرێت.
سەبارەت بە تەواوکردنی پێکهاتەی کابینەی حکوومەت، بڕیار درا کە لە سەرەتای هەفتەی داهاتووەوە زنجیرەیەک وتووێژی فەرمی لەگەڵ لایەنە سیاسییەکان دەستپێبکات. هاوکات جەخت لەسەر چڕکردنەوەی وتووێژەکان لەبارەی پڕۆژەیاسای نەوت و گاز کرایەوە، بە ئامانجی ئامادەکردنی و ڕەوانەکردنی بۆ پەرلەمانی عێراق بە مەبەستی پەسەندکردنی.
لە بەشێکی دیکەی ڕاگەیەندراوەکەدا، هاوپەیمانیی بەڕێوەبردنی دەوڵەت پابەندبوونی خۆی بە بنەما دەستوورییەکان بۆ ڕەتکردنەوەی هەر جۆرە وتارێکی تائیفی، پتەوکردنی یەکڕیزیی نیشتمانی و پاراستنی ئاشتیی کۆمەڵایەتی نیشان دا، و لە کۆتاییشدا جارێکی دیکە جەختی لە پاراستنی وڵات لە کاریگەرییە نەرێنییەکانی سزاکانی ئەمریکا کردەوە.