حەمید بەدرخان

25 تا 27ی ئەیلول لە پێشانگای هونەرمەندانی شێوەکارانی شاری کۆڵن - ئەڵمانیا، با میوانی  هونەرمەندی شێوەکاری کورد هەژار کەلهوڕی بین.

ئەمڕۆ یەکشەممە 13.09.2026، لە شاری کۆڵن، سەردانم كرد بۆ پێشانگای ساڵانەی هونەرمەندانی شێوەکارانی ئەڵمان و گەلانی دیکە لەگەڵ هونەرمەندی شێوەکاری دیاری کورد، هەژار کەلهوڕی.

لە پێشانگاکە کاری چەندین هونەرمەندمان بینی، لە نێوان کارەکاندا تابلۆکانی هونەرمەندی عیراقی (حوسام ئەلبەسام 1951 بابل) بو، کە تابلۆکانی ڕەنج و ماندوبونی زیاتر لە پەنجا ساڵی کارکردنی بو، لە وڵاتانی عیراق، ئیتاڵیا و ئەڵمانیا و شوێنەکاندیکە .

پاش گەڕان بەنێو بەرهەمەکانی دیکە، سەردانی گەلەری هونەرمەندی شێوەکاری کورد هەژار کەلهوڕیم کرد .

کەلهوڕی لەساڵی 1967 لە شارۆچکەی پردێ لەدایکبوە، خوێندنی سەرەتایی و ناوەندی و ئامادەیی لە پردێ تەواو دەکات و ساڵی 1989خوێندنی پەیمانگای مامۆستایان لە کەرکوک تەواو دەکات .

لە ساڵی 1997 دەگاتە وڵاتی ئەڵمانیاو درێژە بە ژیان و کارە هونەرییەکانی دەدات .

پێشتر کەلهوڕییم لە پێشانگای ART CAMP لە شاری Krefeld لەگەڵ 18 هونەرمەندی شێوەکاری کورد یەکترمان ناسیی و کارەکانیم دیت.

ئەمڕۆ کاتێک چومە گەلەرییە هەمیشەییەکەی لە شاری کۆڵن، کە ڕۆژانە کارە هونەرییەکانی خۆی تێدا جێبەجێدەکات، پڕبو لە تابلۆ و هێلکاری و چەندین کتێب شێوەکاری کوردو گەلانیدیکە، لەهەمانکاتیشدا چەندین سکێچی کارەکانی بە قەلەم ڕەساس و جۆرەکانی دیکەشم دیت .

لە کاتی وروژاندنی چەندین پرسیار، دەربارەی ئەوەی چۆن دەڕوانێتە هونەری شێوەکاری کوردی، یان خەمی تۆ لە کاتی بەرهەمێکی نوێت چییە؟ من هەر پرسیارم دەکردو ئەویش وەڵامەکانی گەلەک پەرش و بڵاوبو، جارێک دەیگوت: هەڵەبجە ژانێکی گەورەبو، لەپڕ دەیگوت: غەدرەکانی حزبی بەعس، ئەمجارەیان یەکسەر دەیگوت: ئەنفال، دیسان هەڵیدەدایه‌ و دەیگوت: ئەو هاوڕێییەی من کە سەدامییەكان لە ساڵی 1991 لە شارۆچککەی پردێ گرتیان و گوللـەبارانیان کرد!

کەلهوڕی لەنێو کارەکانی کە زۆربەیان هونەری ئەبستراکە، کە زمانی گێڕانەوەی یادەوەرییەکانی لە نێو تابلۆکانییدا ڕەنگیداوەتەوە، ئەو هێمن و لەسەرەخۆ کاردەکات، وەلێ دەیگوت، لەناوەڕاستی هەشتاکانی سەدەی ڕابردو تەنیا کاری وێنەکێشانی پۆرترێت بوە، بەڵام لە دوای ساڵانی دو هەزار کارەکانی بە ئاقاری هونەری واقیعی و ئەبستراکە .

لە ڕۆژانی 25 بۆ 27 .09 .2026 پێشانگاکەیان بەنێوی OFFENE ATELIERS KÖLN 2026  لە هۆڵی LINKSRHEINISCH NORD  دەکاتەوە .

شایانی گوتنێیە، هەژار کەلهوڕی لە ساڵی 2000 تا 2025 چەندین  پێشانگای تایبەت و هاوبەشی لە وڵاتانی ئەڵمانیا و کوردستان و شوێنانی دیکە کردۆتەوە .

بەهیواین کوردانی هەرێمی NRW بە تایبەتی شاری کۆڵن و بۆن ڕۆژانی 25 تا 27 ئەیلول سەردانی پێشانگاکەی بکرێت و خوێندنەوە بۆ کارەکانی بکرێت.

دەخوازین کەلهوڕی هەمیشە خەرمانی کارەکانی لەبرەودا بێت و هەگبەی کارە هونەرییەکانی پڕاوپڕبن لە سروشتی جوانی کوردستان و کۆمەڵگای مرۆڤایەتی .

بەهیواین هەمومان لەکاتی کردنەوەی پێشانگاکەی ئامادەبین.

کۆڵن، 13.09.2026