سیستەمەکانی بەرگریی ئاسمانی لە هەریەک لە شانشینی عەرەبیی سعودیە و شانشینی بەحرەین، بەرپەرچدانەوە و تێکشکاندنی چەند هێرشێکی موشەکیی بالیستیکی و فڕۆکەی بێفڕۆکەوانیان ڕاگەیاند، کە پایتەختی سعودیە و ناوچەی ڕۆژهەڵاتی ئەو وڵاتە و ئاسمانی بەحرەینیان کردبووە ئامانج.
ئاوێنە: جەنەڕاڵ تورکی مالیکی، وتەبێژی فەرمیی وەزارەتی بەرگریی سعودیە ڕایگەیاند، هێزەکانی بەرگریی ئاسمانیی وڵاتەکەی توانیویانە ڕێگری لە دوو موشەکی بالیستیکی بکەن و لە ئاسماندا تێکیانبشکێنن، کە لەلایەن گرووپی حوسییەکانەوە ئاراستەی ڕیازی پایتەخت کرابوون.
هاوکات لەگەڵ ئەو هێرشە موشەکییەدا، وتەبێژی وەزارەتی بەرگریی سعودیە ئاماژەی بەوەش کرد کە لە دوو ڕووداوی جیاوازدا، ڕێگری لە دوو فڕۆکەی بێفڕۆکەوان (درۆن) کراوە و خراونەتە خوارەوە، کە ناوچەی ڕۆژهەڵاتی شانشینی سعودیەیان کردبووە ئامانج.
پێش تێکشکاندنی موشەکەکانیش، بەڕێوەبەرایەتیی بەرگریی شارستانیی سعودیە هۆشدارییەکی پێشوەختەی لە شاری ڕیاز بڵاوکردەوە، پێش ئەوەی لە ڕاگەیەندراوێکی دواتردا کۆتاییهاتنی مەترسییەکە و ئاساییبوونەوەی دۆخەکە ڕابگەیەنێت.
لە پێشهاتێکی هاوشێوەدا، شانشینی بەحرەین لە ڕاگەیەندراوێکی فەرمیدا ئاشکرای کرد، سیستەمی بەرگریی ئاسمانیی وڵاتەکەی ژمارەیەک فڕۆکەی بێفڕۆکەوانی ئێرانی لە ئاسمانی بەحرەیندا تێکشکاندووە و لەناوی بردوون.
پێش دەستپێکردنی هێرشەکان، وەزارەتی ناوخۆی بەحرەین ئاگادارکردنەوەیەکی بەپەلەی سەبارەت بە "بوونی مەترسی" بڵاوکردەوە و داوای لە هاووڵاتییان کرد هێمنی بپارێزن و پەنا ببەنە بەر نزیکترین شوێنی پارێزراو. دوابەدوای ئەوەش، وەزارەتەکە هۆشدارییەکی ئەمنیی دیکەی دەرکرد و جەختی لە پێویستیی پاراستنی ئارامی کردەوە، هاوکات داوای لە دانیشتووان کرد لەپێناو سەلامەتیی گشتیدا، تەنها لە ڕێگەی کەناڵە فەرمییەکانەوە بەدواداچوون بۆ زانیاری و پێشهاتەکان بکەن.
ئەم پەرەسەندنانە لە کاتێکدایە، لە ماوەی ساڵی ٢٠٢٦دا هێرشە موشەکی و درۆنییەکان بۆ سەر خاکی سعودیە بە شێوەیەکی سەرەکی لەلایەن بزووتنەوەی ئەنساروڵڵا (حوسییەکانی یەمەن)ەوە ئەنجام دراون، کە لە چەندین بۆنەی جیاوازدا ناوچە جیاجیاکانی ئەو وڵاتەیان کردووەتە ئامانج.