ئەمڕۆ هەینی بەرهەم ساڵح، سەرۆك كۆماری عێراق بۆ لەنزیكەوە ئاگاداربون
لەلێكۆڵینەوەكانی روداوی ژێركەوتنی بەلەمەكەی موسڵ، سەردانی شارەكەی كرد. كاتێك
دەیویست بچێتە شوێنی روداوەكە لەلایەن خۆپیشاندەرانەوە هێرشی كرایەسەر.
ئاوێنە: دوێنێ پێنجشەممە بەلەمێك لە دورگەیەكی گەشتیاری شاری موسڵ لەروباری
دیجلە ژێرئاوكەوت و بەپێی دواین ئامار لە روداوەكەدا زیاتر لە 100 كەس گیانیان لەدەستداوە.
بۆ ناڕەزایەتی دەربڕین ئەمڕۆ ژمارەیەك لەهاوڵاتیانی موسڵ لەشوێنی روداوەكە
گردبونەوەیەكیان رێكخست و داوای بە سزاگەیاندنی كەمتەرخەمانی روداوەكەیان كرد.
بەرهەم ساڵح، سەرۆك كۆماری عێراق بۆ لەنزیكەوە ئاگاداربون لە رەوتی
لێكۆڵینەوەكان لە روداوەكە ئەمڕۆ هەینی بەرەو شارەكە بەڕێكەوت.
بەپێی ئەو گرتە ڤیدیۆیانەی لەتۆڕە كۆمەڵایەتییەكان بڵاوكراونەتەوە بەرهەم
ساڵح كاتێك ویستویەتی سەردانی شوێنی روداوەكە بكات لەلایەن خۆپیشاندەرانەوە رێگری
لە كەژاوەی ئۆتۆمبێلەكانی كراوە.
وەك لە یەكێك لە گرتە ڤیدیۆییە بڵاوكراوەكاندا دەردەكەوێت بەرهەم ساڵح لە
ئۆتۆمبێلەكەی دابەزیوە بەڵام خۆپیشاندەران پەلاماری دەدەن و هێرش دەكەنە سەری و
لەلایەن پاسەوانەكیانییەوە خەڵكە ناڕازییەكە دوردەخرێتەوەو بەهەوڵێكی زۆر ناوبراو
دەخەنەوە نێو ئۆتۆمبێلەكەی.