هونەرمەند عەتا چاوشین، دوای توشبوونی بە ڤایرۆسی کۆرۆنا لە نەخۆشخانەیەکی شاری سلێمانی گیانیلەدەستدا.
ئاوێنه: جێگری بەڕێوەبەری گشتی تەندروستی سلێمانی بۆ کاروباری کارگێڕی، شێخ عەبدوڵا ئەحمەد رایگەیاند، بەرەبەیانی ئەمڕۆ هونەرمەند ( عەتا چاوشین) لە نەخۆشخانەی شەهید ئاسۆ لە شاری سلێمانی گیانیلەدەستداوە.
رۆژی چوارشەممە 17ی حوزه‌یرانی 2020 هونەرمەند عەتا چاوشین، تووشی ڤایرۆسی کۆرۆنا بوو و ئەو کات جەزا کەریم، ناسراو بە جەزای ساز، سەرۆکی کۆمەڵەی هونەری میلـلی رایگه‌یاند، "داوادەکەین فریای ئەو هونەرمەندە بکەون، تەندروستیی زۆر ناجێگیرە و پێویستی بە پلازمای خوێنە".
لە پارێزگای سلێمانی هەریەکە لە هونەرمەندان، یاسین قادر بەرزنجی، ئازادی مەحموودە فەندی و نەرمین کاوانی تووشی ڤایرۆسی کۆرۆنا بوون.
هونەرمەند عەتا چاوشین، لە ساڵانی 80ی سەدەی رابردوودا دەستی بە کاری هونەری کردووە، زیاتر لە 35 ساڵە بەردەوامە و چەندین بەرهەمی گۆرانیی هەیە.
لە ئێستادا کۆی گشتی ژمارەی توشبووانی ڤایرۆسی کۆرۆنا لە هەرێم، سێ هەزار و ٨٦٥ کەسە لەو ژمارەیەش ١١٠ کەس گیانیانلەدەستداوە، هەزار و ٣٩٢ توشبوش چاکبونەتەوە.