وەزارەتی گواستنەوەو گەیاندنی حكومەتی هەرێمی كوردستان راگەیەندراوێكی
سەبارەت بە دەستپێكردنەوەی گەشتە ئاسمانییەكان بڵاوكردەوەو دەڵێت: ئەمڕۆ
فڕۆكەخانەی هەولێرو سلێمانی بەڕوی گەشتیاراندا كرانەوەو گەشتە ئاسمانییەكان بە
هاتن و چونەوە ئەنجام دەدرێن.
ئاوێنە: وەزارەتی گواستنەوەو گەیاندن، پاشنیوەڕۆی ئەمڕۆ شەممە، لە
راگەیەندراوێكدا وتی: بەگوێرەی بڕیارو رێنماییەکانی لیژنەی باڵای بەرەنگاربونەوەی پەتای ڤایرۆسی
کۆرۆنا لە هەرێمی کوردستان و دەسەڵاتی فڕۆکەوانی مەدەنی عێراق، ئەمڕۆ شەممە
١-٨-٢٠٢٠، هەردو فڕۆکەخانەی نێودەوڵەتی هەولێر و سلێمانی بە روی گەشتیاراندا کرانەوەو
گەشتە ئاسمانییەکان بە هاتن و چونەوە ئەنجامدەدرێن.
ئاماژەی بەوەشداوە كە گەشتیاران بەوانەی دێن و ئەوانەی دەڕۆنەوە،
پێویستە پشکنینی کۆرۆنا(PCR) یان ئەنجامدابێت و پابەندی رێوشوێنەکانی خۆپارێزی بن لەناو فڕۆکەخانەو
لە گەشتەکانیاندا.
بە مەبەستی رێگرتن
لە تەشەنەسەندنی پەتای کۆرۆنا لە عێراق و هەرێمی کوردستان لە رۆژی ١٦-٣-٢٠٢٠وە گەشتە
ئاسمانییەكان بۆ گەشتیاران راگیرابو، تەنها رێگا بە گەشتەکانی کارگۆو فریاگوزاری و سەربازی و گەڕانەوەی ئەو هاوڵاتیانەی لە دەرەوە
گیریان خواردبو دەدرا.