شەجەریان كۆچی دوایی كرد
  2020-10-08       721       

محەمەد رەزا شەجەریان، هونەرمەندی گەورەی ئێران، دوای چوار ساڵ لە توشبونی بە شێرپەنجە، ئەمڕۆ پێنجشەممە، لەتەمەنی 80 ساڵیدا كۆچی دوایی كرد.

ئاوێنە: بەپێی میدیای رەسمی كۆماری ئیسلامی ئیران، سەرەتای هەفتەی رابردو، بەهۆی خراپبونی باری تەندروستییەوە، شەجەریان براوەتە بەشی چاودێری چڕ لە نەخۆشخانەی "جەم"ی تاران و دوای ئەوەی چەند رۆژێك لە كۆمادا بوە، ئێوارەی ئەمڕۆ پێنجشەممە، كۆچی دوایی كردوە.

شەجەریان لە نەورۆزی ساڵی 2016 لە پەیامێكی ڤیدیۆییدا توشبونی خۆی بە شێرپەنجە راگەیاندبو و بۆ ماوەیەكیش بەمەبەستی چارەسەر چوە ئەمریكا.

محەمەد رەزا شەجەریان لە 23ی ئەیلولی 1940 لە شاری مەشهەد لەدایكبوە، لە تەمەنی 12 ساڵیدا بە خوێندنی قورئان دەستی بە چڕین كردوە.

شەجەریان بە مامۆستای گۆرانی و میوزیكی كلاسیكی فارسی ناسرابو و ژمارەیەك هونەرمەندی گەورەی ئێران بە قوتابی ئەو دەناسرێن.

كوڕو كچێكی شەجەریان بەناوەكانی هومایۆن و موژگان لە بواری گۆڕانی و میوزیكدا كاردەكەن.

شەجەریان خاوەنی دەیان ئەلبومی گۆرانی و كۆنسێرتە.

زۆرترین بینراو
© 2020 Awene Online, Inc. All Rights Reserved.
×