"غازی بامەڕنی، مامۆستای هەمومان بو"
  2021-02-10       2174       

ئا: ئاوێنە


كۆتایی ساڵی رابردو، هونەرمەندی شانۆکاری ناودار "غازی بامەڕنی" لەپاریس بۆ یەكجاری چاوی لێكنا، عومەر دڵپاكی هونەرمەند كە رۆژگارێك كاری هونەری لەگەڵ ئەم هونەرمەندەدا كردوە، دەڵێت "غازی بامەڕنی مامۆستای هەمومان بو".


هونەرمەند غازی عەبدوڵڵا بامەرنی، ناسراو بە د.غازی بامەرنی لەساڵی 1942 لە شارۆچکەی بامەرنێ-ی سەر بەپارێزگای دهۆك لەدایکبوە، خوێندنی سەرەتایی‌و ناوەندی لەئامێدی تەواوکردوە، دواتر چوەتە بەغداو لەوێ پەیمانگەی هونەرەجوانەکانی تەواو كردوەو لەساڵانی 1971 تاوەکو 1977 لەشاری سلێمانی ژیاوەو یەکێک بوە لەدامەزرێنەرانی تیپی نواندنی سلێمانی، كە بەشێك لەباشترین‌و بەناوبانگترین شانۆگەری‌و دراما تەلەفزیۆنییە كوردییەكانیانی بەرهەمهێناوە.


هونەرمەند عومەر دڵپاك، كە لەو رۆژگارەدا لەهەڕەتی گەنجێتیدا بوەو ئەندامی ئەم تیپە بوەو كاری نواندنی كردوە، لەنزیكەوە غازی بامەڕنی ناسیوەو كاری لەگەڵ كردوە، دڵپاك بەئاوێنەی وت ""غازی بامەڕنی پاش ئەوەی هونەرە جوانەكانی لەبەغدا تەواو كرد، هات لەئامادەیی سلێمانی بو بەمامۆستای هونەرو لەتیپی نواندنی سلێمانیش بو بەئەندام، هاتنی ئەو بۆ سلێمانی جوڵەیەكی بەرچاوی هەر لەسەرەتای هاتنیەوە خستە نێو شانۆی كوردییەوە، كە یەكێك بو لەو هونەرمەندە دەگمەنانەی لەو كاتەدا خوێندنی ئەكادیمیایی لەهونەرە جوانەكانی بەغدا تەواو كرد بو".


وتیشی "غازی تەنها كاری دەرهێنانی دەكرد، نەك كاری نواندن‌و ئەكتەری، لەو ماوەیەدا كە لەسلێمانی مایەوە لەساڵی 1971ەوە تاوەكو ساڵی 1977، شانۆی كوردی پێشكەوتن‌و گەشەیەكی بەرچاوی بەخۆیەوە بینی، كە چەندین شانۆگەری‌و درامای تەلەفزیۆنی دەرهێناو تا ئێستاش زۆربەیان لەیادەوەری ئەو نەوەیەدا ماوەتەوە كە لەو سەردەمەدا ژیاون‌و بینیویانە".


دڵپاك ئاماژە بەوە دەكات یەكەم کاری دەرهێنانی غازی بامەڕنی شانۆگەری "نرخی ئازادی" بوە لەساڵی 1971دا، كە پاشان لەساڵی 1972دا لەتەلەفزیۆنی بەغدا وەك درامای تەلەفزیۆنی تۆمار كراوە، هەر لەساڵی 1972شدا كاری دەرهێنانی بۆ شانۆگەری "داوی مەرگ" كردوە، هەر هەمان ساڵیش كاری دەرهێنانی بۆ درامای تەلەفزیۆنی "من كێم؟" كردوە، لەساڵی 1973دا كاری دەرهێنانی بۆ شانۆگەری "چاوی كوردستان"  كردوە، هەمان ساڵیش شانۆگەری "كۆتایی زۆردار"ی دەرهێناوە، دواتر لەتەلەفزیۆنی بەغدا وەك درامایەكی تەلەفزیۆنی تۆمار كراوە.

 

ساڵی 1974 كاری دەرهێنانی بۆ درامای تەلەفزیۆنی "دزی زۆرزان" كردوە، لەساڵی 1974یشدا كە تیپی نواندنی سلێمانی بەشانۆگەری "شاخەوانی مەزن" بەشداری لەیەكەم فستیڤالی شانۆی كوردی لەسەر شانۆی خولد‌و غازی بامەڕنی دەرهێنەری بوە، پلەی یەكەمی بەدەستهێناوە. لەساڵی 1975دا كاری دەرهێنانی بۆ درامای تەلەفزیۆنی "فیلەكەی خاوەن شكۆ" كردوەو هەر هەمان ساڵیش كاری دەرهێنانی بۆ شانۆگەری "رێرەوی گەل" كردوە، دواتریش هەر لەهەمان ساڵدا شانۆگەری "مانگرتن"ی دەرهێناوە، هەمو ئەم شانۆگەری‌و درامایانەش لەو رۆژگارەدا دەنگدانەوەی گەورەیان هەبوە، هەرچەندە بەشێكی زۆریان كاری وێنەگرتن‌و ئەرشیف كردنیان بۆ نەكراوە.


دڵپاك وتی "ساڵی 1976 كە تیپی نواندنی سلێمانی چوە كەركوك بەمەبەستی تۆمار كردنی "مانگرتن" وەك درامایەكی تەلەفزیۆنی، دەسەڵاتدارانی بەعس داوایان لەغازی بامەڕنی دەرهێنەری كرد كە دروشمەكانی حیزبی بەعس وەك وەحدەو حریەو ئیشتراكیە لەكۆتایی دراماكەدا بوترێت كاتێك كرێكارەكان مان دەگرن، بەڵام غازی بامەڕنی هەڵوێستێكی جوامێرانەی هەبو كە رازی نەبو، هەرچەندە دو دیمەنیشی تۆمار كرابو، بەڵام وازمان لێناو گەڕاینەوە سلێمانی".


وتیشی "بەبڕوای من ئەم تەگەرەیەی كەوتە بەردەمی لەتەلەفزیۆنی كەركوك لەكاتی درامای مان گرتندا، كە داوای لێكرا بۆ مۆڵەتدان بەتۆمار كردنی دراماكە دروشمەكانی حیزبی بەعس بەرز بكاتەوە، هۆكارێكی سەرەكی بو بۆ بیركردنەوە لەبەجهێشتنی وڵات‌و ئەوە بو لەسەرەتای 1977دا رویكردە وڵاتی فەرەنسا بەمەبەستی خوێندن".



غازی بامەڕنی پاش ئەوەی لەساڵی ١٩٧٧دا دەچێتە فەرەنسا، لەپاریس بڕوانامەی ماستەرو دکتۆرا لەبواری شانۆدا بەدەستدێنێت، لەو ماوەیەشدا چەندین كتێب سەبارەت بە"ئەحمەدی خانی"‌و "دەروێشی عەبدی"‌و چیرۆكی "عەیشا بێتاری" دەنوسێت.


بامەڕنی لەساڵی 2008دا بەیەکجاری دەگەڕێتەوە بۆ کوردستان‌و لەبەشی شانۆی كۆلیژی ئادابی زانکوی دهۆک دەبێتە مامۆستا. لەو ماوەیەشدا لەبەرهەمهێنانی چەند کارێکی هونەریدا چالاک دەبێ‌و شانۆگەری "مەم‌و زین"ی دەرهێناوە.


عومەر دڵپاك سەبارەت بەمەرگی غازی بامەڕنی، وتی "هونەرمەندی شانۆکار غازی بامەڕنی، خزمەتێكی گەورەی بەهونەری شانۆی كوردی كردوە، كارە هونەرییەكانی‌و ناوی ئەو هەمیشە بەزیندوێتی دەمێنێتەوە، بامەڕنی مامۆستای هەمومان بو".

زۆرترین بینراو
© 2024 Awene Online, Inc. All Rights Reserved.
×