قائیمقامیەتی سلێمانی دەست بەسەر بڕێک شیرینی ماوەبەسەرچودا دەگرێت کە بەشێوەی هەڵڕژاو بەسەر هاوڵاتیاندا ساغکراوەتەوەو داواش لە هاوڵاتیان دەكات ئەو نوقڵ و چکلێتانە نەكڕن كە بەهەڵڕژاوی دەفرۆشرێن.

ئاوێنە: قائیمقامیەتی سلێمانی، ئەمڕۆ هەینی، لەزاری لەشکر حەمید، سەرۆکی لیژنە هاوبەشەکانی قائیمقامیەتەوە، رایگەیاند: بەدواداچون بۆ ئەو نوقڵ و شیرینیانە کراوە کە بەشێوەی هەڵڕژاو لەدوکانەکانداو هەروەها لەلایەن دەستگێڕەکانەوە بەهاوڵاتیان دەفرۆشرێن، دەرکەوتوە بەشێکی ماوەی بەکارهێنانیان بەسەرچوە کە شیاوی خواردن و بەکارهێنان نین.

وتیشی"بەپێی رێنماییەکانی تەندروستی، ئەو خواردن و خواردنەوانەی ماوەیان بەسەر دەچێت، پێکهاتەیان دەگۆڕێت بۆ مادەی زیان بەخش و زیان بەتەندروستی هاوڵاتیان دەگەیەنێت."

لەشکر حەمید، سەرۆکی لیژنەکان داواشی لەهاوڵاتیان كرد، لەکاتی بازاڕکردن و کڕینی پێداویستی رۆژانەدا بەوردی سەرنج لە بەرواری دروستکردن و بەسەرچونی بدەن و ئەو نوقڵ و چکلێتانەی بەهەڵڕژاوی دەفرۆشرێن مەکڕن، هەروەها لەکاتی هەبونی گومان لەڕێگەی ژمارە مۆبایلی (07708677777)ـەوە پەیوەندی بە لیژنە هاوبەشەکانەوە بکەن.

ئاماژەی بۆئەوەشکرد، لەهەر شوێنێک دەست بەسەر خواردن و خواردنەوەی ماوە بەسەرچودا بگیرێت دادەخرێت و خاوەنەکەشی روبەڕوی رێکاری یاسایی توند دەکرێتەوە.