هه‌رچه‌نده‌ بڕیار بو هه‌فته‌ی ڕابردو چوار موچه‌كه‌ی وه‌زاره‌تی پێشمه‌رگه‌ بگاته‌ هه‌رێمی كوردستان، به‌ڵام تا ئێستا له‌لایه‌ن به‌غداوه‌ نه‌نێردراوه‌، جێگری سەرۆكی پەرلەمانی عێڕاقیش ده‌ڵێت، ئەمڕۆ یان سبەی پارەكە دەگاتە هەرێمی كوردستان و گه‌یشتنه‌كه‌شی مسۆگه‌ر بوه كه‌ بۆ هەر مانگێك بڕی 68 ملیار دینار خەرجكراوە.

ئاوێنه‌: به‌پێی راگه‌یه‌ندراوێكی نوسینگه‌كه‌ی، بەشیر خەلیل حەداد، جێگری سەرۆكی پەرلەمانی عێڕاق له‌ راگەیاند:دو رۆژ له‌مه‌وبه‌ر قسه‌م له‌گه‌ڵ دكتۆر فوئاد حسێن، وه‌زیری دارایی عێراق كرد و وتی، رەزامەندی وەزارەتی دارایی بۆ خەرجكردنی پارەی موچەی هێزەكانی پێشمەرگە كە بۆ هەر مانگێك 68 ملیار دینارە دراوە.

بەشیر حه‌داد وتیشی، ئەمڕۆ یان سبه‌ی پارەكە دەگاتە هەرێمی كوردستان و گه‌یشتنه‌كه‌شی مسۆگه‌ربوه‌.

ناوبراو ئاماژەی بەوەشدا، میكانیزمی دابەشكردنی چوار موچه‌كه‌ لە لایەن وەزارەتی پێشمەرگە كاری پێدەكرێت كه‌ چۆن دابه‌شی ده‌كات چونكه‌ كاری دابه‌شكردنه‌كه‌ی په‌‌یوه‌ندی به‌وه‌زاره‌تی دارایی ‌حكومه‌تی عیراقه‌وه‌ نییه‌ و كاری ئه‌وان ته‌نها ناردنی پاره‌كه‌یه‌.

جێگری سەرۆكی پەرلەمانی عێراق راشیگه‌یاند، پاره‌كه‌ چه‌ند رێكارێكی بانكی ماوه‌ ده‌نا هه‌مو شتێكی ته‌واو بوه‌.