وەزارەتی تەندروستی حكومەتی هەرێمی كوردستان داوا لە هاوڵاتیان دەكات بۆ وەرگرتنی ڤاكسینی دژە كۆرۆنا پێویستە ناوی خۆیان لە سیستەمی ئەلیکترۆنی تۆمار بكەن و جەختیش دەكاتەوە كە هەمو سەنتەرەکان ئاگادارکراونەتەوە کە نابێت بەدەر لە ڕێنماییەكانی خۆتۆماركردنی پێشوەختەو گەڕانەوەی نۆرە ڤاکسین بدرێت.

ئاوێنە: وەزارەتی تەندروستی، ئێوارەی ئەمڕۆ پێنجشەممە، لە راگەیەندراوێكدا وتی، بۆ وەرگرتنی ڤاكسینی دژە ڤایرۆسی كۆرۆنا پێویستە پێویستە هاوڵاتیان ناوی خۆیان لە سیستەمی ئەلیکترۆنی تۆمار بكەن لەرێگەی پۆڕتاڵ و ئەپڵیكەیشنی ( kurdvac).

وەزارەتەكە وتوشیەتی"بەبێ تۆماركردنی زانیاری پێشوەختەو بێ گەڕانەوەی نامەی ڕۆژو ڕێکەوت و شوێنی وەرگرتنی ڤاکسین سەردانی ناوەندەکانی ڤاكسین مەكەن تا ئەو كاتەی لەڕێگەی ژمارەی مۆبایلەكانتان (كۆڕەك یان ئاسیاسێڵ) نامەتان بۆ دێت و ئاگاداردەكرێنەوە."

جەختیشی كردۆتەوە كە "بەدەر لە سیستەمی نۆرە، سەنتەرەکان بەرپرس نین لە وەرنەگرتنی ڤاکسین و دروستبوونی قەرەباڵغی."

هەروەها ئەوەشی خستۆتەڕو"هەمو سەنتەرەکان ئاگادارکراونەتەوە کە نابێت بەدەر لە ڕێنماییەكانی خۆتۆماركردنی پێشوەختە و گەڕانەوەی نۆرە ڤاکسین بدرێت."