بەشار ئەسەد لای پوتین گلەیی مانەوەی سوپای تورکیای لە خاکی سوریا کردووە
  2021-09-14       368       
بەشار ئەسەد لە گەشتێکی ڕانەگەیەندراودا، سەردانی مۆسکۆی پایتەختی ڕوسیای کرد و لەلای پوتین گلەیی مانەوەی هێزەکانی تورکیای کرد لە خاکی سوریا.

ئاوێنە: بەشار ئەسەد، سەرۆک کۆماری سوریا لە دیدارەکەیدا لەگەڵ ڤلادمێر پوتین، سەرۆکی ڕوسیا ڕایگەیاندووە، “مانەوەی هێزە دەرەکییەکان لە سوریا کێشە و گرفتی گەورەی دروستکردووە”.

هاوکات پوتین-یش پێیوابووە، مانەوەی ئەو هێزانە ڕێگر دەبێت لە بونیادنانەوە و گەیاندنی خزمەتگوزاری بە خەڵکی سوریا.

دیدارەکەی پوتین و ئەسەد دوێنێ دووشەممە بەڕێوەچووە و لە کۆبوونەوەکەدا باسی کۆنترۆڵکردنەوەی ئەو شارانە کراوە، کە ئێستا لەژێر دەستی هێزەكانی ئۆپۆزسیۆن و تورکیا و گروپە چەكدارییەكاندایە.

ڤلادمێر پوتین، پیرۆزبایی هەڵبژاردنەوەی ئەسەدی کردووە وەك سەرۆكی سوریا و ڕایگەیاندووە، “ئەنجامەکانی هەڵبژاردن نیشانی دەدەن، کە خەڵکی بڕوا و متمانەیان بە تۆ هەیە و ئەوەش ئەنجامی کارەکانی تۆیە لە چەند ساڵی ڕابردوودا”.

چەند مانگێک پێش ئێستا بەشار ئەسەد بۆ جاری چوارەم وەک سەرۆکی وڵات هەڵبژێردرایەوە و 95٪ی دەنگەکانی هێنا.

کۆمەڵگەی نێودەوڵەتی دوای هەڵبژاردنەوەی ئەسەد، ڕەخنەی لە چۆنیەتیی هەڵبژاردنەکە گرت و بە هەڵبژاردنێکی کارتۆنییان ناوبرد.

ڕوسیا لەدوای دەستپێکردنی شەڕی ناوخۆی سوریا پشتگیری خۆی بۆ بەشار ئەسەد دەربڕی و دواتر بە هێزی ئاسمانی و زەمینی ڕووبەڕووی چەکدارانی ئۆپۆزسیۆن بووەوە.
زۆرترین بینراو
© 2021 Awene Online, Inc. All Rights Reserved.
×