موقتەدا سەدر، ڕێبەری ڕەوتی سەدر چەند هۆكارێكی بۆ كشانەوەی لە پرۆسەی سیاسی عێراق دیاریكردو دەڵێت، حكومەت بەبێ بەشداری گەندەڵكاران و كەسە تائیفییەكان پێكنایەت.
ئاوێنه: ساڵح موحەمەد عێراقی، ناسراو بە (وەزیری سەدر) لە تویتێكدا هۆكاری كشانەوەی سەدری لە پرۆسەی سیاسی عێراق دیاریكرد كە ئەمانەن:
یەكەم: پێكهێنانی حكومەت تەنها بە بەشداری گەندەڵكاران و كەسانی تائیفی تەواو دەبێت.
دووەم: سەربەخۆكان بە هۆكاری هاندان، یاخود ترساندن یاخود نەبوونی متمانە، پشتیوانی لە پڕۆژەی حكومەتی زۆرینەی نیشتیمانی ناكەن.
سێیەم: لایەنە سیاسییەكان و تەنانەت هەندێك وڵات دەستوەردان لە ڕێككەوتن و كۆبوونەوەكاندا دەكرد، ئەوەش ڕەوا نییەو نادادپەروەرییە بەرامبەر گەل و نیشتیمان.
چوارەم: چینە هۆشیارەكانی كۆمەڵگە، وەك، ڕۆژنامەنووسان، چاودێرانی سیاسی و تەكنۆكراتەكان پشتیوانی لە حكومەتی زۆرینەی نیشتیمانی ناكەن و بەشێكیان بەرامبەرمان وەستانەوەو شەڕی میدیاییان لەگەڵ كردین.
پێنجەم: نەبوونی پشتیوانی جەماوەری، سەرەڕای ئەوەی زۆرینە لەگەڵ پڕۆژەی زۆرینەی نیشتیمانیدان.
شەشەم: خۆبەزلزانینی قازانجخوازان و دنیاویستەكان لە ئەگەری سەركەوتنی پێكهێنانی حكومەتی زۆرینەی نیشتمانی كە ئەمەش دوا كارتی نیشتمانی شیعە دەخاتە مەترسییەوە.
حەوتەم: دروستبوونی ناكۆكی لەنێوان لایەن شیعەكان بۆ دابەشكردنی كێكەكە (پۆستەكانی حكومەت) پێش پێكهێنانی حكومەتەكە.
هەشتەم: دەركردنی یاسایەك (بە تاوان ناساندنی ئاساییكردنەوە پەیوەندییەكان لەگەڵ ئیسرائیل) بووە دروستبوونی هەوڵی دەرەكی دژی خاوەنی پرۆژەی چاكسازی و پرۆژەی زۆرینەی نیشتیمانی.
نۆیەم: پێكهێنانی حكومەتی زۆرینە لەگەڵ ئەو گەندەڵییە بەربڵاوەی لە وڵاتدا هەیە و بە سیاسیكردنی دەسەڵاتی دادوەری و دامودەزگاكانی دیكەی دەوڵەت، یەك ناگرێتەوە.
دەیەم: بێ هەڵوێستەكان پێیان وایە حكومەتی زۆرینە لاوازكردنی مەزهەبە، بەڵام مەزهەب لە گەندەڵی باڵاتر نییە.