حکومەتی هەرێم ماوەی لێخۆشبونی گومرگی لەسەر بەرهەم‌و پێداویستییە خۆراکییەکان تا كۆتایی ئەیلول درێژده‌كاتەوە
  2022-07-17       133       


فەرمانگەی میدیاو زانیاری حکومەتی هەرێم بڵاویکردەوە، حکومەتی هەرێمی کوردستان بڕیاریدا ماوەی لێخۆشبونی گومرگی لەسەر بەرهەم و پێداویستییە خۆراکییەکان تاوەکو 30ی (ئەیلول/9)ی ئەمساڵ درێژبکرێتەوە. 

ئاوێنه‌: فەرمانگەی میدیاو زانیاری ڕایگه‌یاندووه‌، بەپێی بڕیاری ژمار 159ـی ئەنجومەنی وەزیرانی هەرێمی کوردستان، ماوەی کارکردن بە سەرجەم بڕگەکانی بڕیاری ژمارە 140ـی ئەنجومەنی وەزیران تایبەت بە ئاسانکاریی بۆ دابینکردنی پێداویستییە خۆراکییە سەرەکییەکان تاوەکو 30ـی ئەیلولی 2022 درێژ کردەوە تاوەکو بارگرانی نەبونی بەرهەمە خۆراکییەکان و گرانبونیان لەسەر هاوڵاتییان دروست نەبێت. 

ئەوەش هاتوە، لە خاڵی دوەمی بڕیارەکەی ئەنجومەنی وەزیرانی هەرێمی کوردستان دا هاتوە،  تیمەکانی چاودێری بازاڕ و لیژنەکانی قایمقامیەت و ئاسایشی بازرگانی لە پارێزگا و ئیدارە سەربەخۆکان راسپێردراون بۆ بەردەوامبون لە چاودێریکردنی بازاڕ و رێگرتن لە خراپ سودوەرگرتن لەو ئاسانکارییانە و بەرگرتن لە بەرزکردنەوەی نرخەکان و رەوانەکردنی سەرپێچیکاران بۆ لێپرسینەوە و گرتنەبەری رێکاری یاسایی بەرامبەریان.

فەرمانگەی میدیا و زانیاری حکومەتی هەرێم دەڵێت، بەپێی بڕیارەکەش گومرگ لەسەر هەریەک لە ئارد، برنج، زەیتی گولەبەرۆژە، زەیتی گەنمەشامی، رۆنی روەکی بەستو، رۆنی ئاژەڵی بەستو، چای رەش، شەکر، پاقلەمەنی وشک وەک (نیسک، نۆک، پاقلە، لۆبیا، فاسۆلیا و ماش) و شیری منداڵان بە هەمو جۆرەکانییەوە هەڵدەگیرێت، هەروەها وەرگرتنی باج لە بازرگانانی هاوردەکاری بەرهەمە خۆراکییەکان دوادەخرێت.
 

زۆرترین بینراو
© 2022 Awene Online, Inc. All Rights Reserved.
×