ساڵح محەمەد عێراقی، ناسراو بە وەزیرەكەی سەدر، لە پەیامێكدا پێنج داواكاری پێشكەشی مستەفا كازمی، سەرۆك وەزیران و فەرماندەی گشتی هێزە چەكدارەكانی عێراق دەكات كە بەشێكیان پێكدێن لە: گۆڕینی سەرۆكی دەستەی حەشدی شەعبی، هەڵوەشاندنەوەی ئەو میلیشیایانەی بەخۆیان دەڵێن "مقاوەمە"، كردنە دەرەوەی هێزەكانی حەشد لە ناوچەی سەوز و دورخستنەوەی هێزەكانی حەشد لە بازگەو دەروازە سنورییەكان.
ئاوێنە: ساڵح محەمەد عێراق، ئەمشەو پێنجشەممە، لە پەیامێكدا رایگەیاند، بۆ پاراستنی شكۆی دەوڵەت و كۆتاییهێنان بە بونی میلیشیاكان لە شوێنە هەستیارەكانی دەوڵەت، پێنج پێشنیار دەخەینە بەردەم مستەفا كازمی، فەرماندەی گشتی هێزە چەكدارەكانی عێراق.
پێشنیارەكان پێكدێن لە:
یەكەم: گۆڕینی فالح فەیاز، سەرۆكی دەستەی حەشدی شەعبی لەبەر سێ هۆكار: فالح فەیاز سەرۆكی لایەنێكی حزبییەو حەشد لە سیاسەتەوە دەگلێنێت، خاوەنی كەسایەتیەكی بەهێز نییەو عەقڵیكی سەربازیی نییە، هەروەها بەگشتی شیاو نییە بۆ ئەو پۆستە.
دوەم: دەركردنی فەرمانێك بۆ هەڵوەشاندنەوەی ئەو میلیشیایانەی پێیان دەوترێت "مقاوەمە"و خەڵك دەكوژن.
سێیەم: دەركردنی سەرجەم میلیشیاكان و حەشدی شەعبی لە ناوچەی سەوز و جێگرتەوەیان لەلایەن هێزە ئەمنییە نیشتمانییەكانەوە، چونكە مانەوەیان مەترسی ئەمنی لەسەر خودی فەرماندەی گشتی هێزە چەكدارەكان دروست دەكات، وێڕای دامەزراوەكانی دیكە بەتایبەت دەسەڵاتی دادوەری و دروستكردنی گوشار لەسەری.
چوارەم: دورخستنەوەی حەشدی شەعبی لە بازگەو دەروازە سنورییەكان لەپێناو پاراستنی ناوبانگی ئەندامانی حەشد، خەڵكانێك هەن ناوبانگیان دەشێوێنن لە رێگەی بەكارهێنانی توندوتیژی و بازرگانی و قاچاخچێتییەوە.
پێنجەم: پشتیوانیكردنی هێزەكانی حەشد لە ناوچە ئازادكراوەكان.