كۆشكی سپی هه‌ڵوێستی خۆی له‌باره‌ی هه‌ڕه‌شه‌ی ئێران بۆ سه‌ر سعودیه‌ و هه‌ولێر راگه‌یاند
  2022-11-02       327       

نێد پرایس، وتەبێژی وەزارەتی دەرەوەی ئەمریکا رایگه‌یاند، ویلایه‌ته‌ یه‌كگرتوه‌كان نیگەرانە لە هەڕەشەکانی ئێران بۆ سەر سعودیە و هاوپه‌یمانانی ئەگەر پێویست بکات درێغی ناکات لە وەڵامدانەوە.

ئاوێنه‌: به‌پێی ئاژانسی رۆیته‌رز، نێد پرایس، وتەبێژی وەزارەتی دەرەوەی ئەمریکا له‌وه‌ڵامی پرسیارێكی په‌یامنێراندا، په‌یوه‌ست به‌ هه‌ڕه‌شه‌كانی كۆماری ئیسلامی ئێران بۆ سه‌ر سعودیه‌ و هه‌ولێر، رایگه‌یاند، "ئێمە نیگەرانین لە هەڕەشەی ئێران بۆ سه‌ر سعودیه‌ و هاوبه‌شه‌كانمان و  لە پەیوەندی بەردەوامداین لە ڕێگەی کەناڵە سەربازی و هەواڵگرییەکانەوە لەگەڵ سعودیەکان، درێغی ناکەین لە مامەڵەکردن لە بەرگریکردن لە بەرژەوەندی و هاوبەشەکانمان لە ناوچەکەدا".

به‌یانی ئه‌مڕۆ میدیاكانی ئه‌مریكا بڵاویانكرده‌وه‌، ئێران هه‌ڕه‌شه‌ی هێرشكردنه‌ سه‌ر سعودیه‌ی كردوه‌ و بەرپرسانی ئەمریکا و سعودیە هه‌ڕه‌شه‌كه‌یان بە جددی وەرگرتوە، هه‌ربۆیه‌ ئاستی هۆشداری هێزه‌كانیان به‌رزكردوه‌ته‌وه‌.

رۆژنامه‌ی وۆڵ ستریت جۆرناڵ باسی له‌وه‌كردوه‌، "كۆماری ئیسلامی ئێران نیازی هەیە هێرش بکاتە سەر چەند ناوچه‌یه‌ك له‌ سعودیه‌ و هه‌ولێر"، ئه‌وه‌ش له‌ تۆڵه‌ی خۆپیشاندانه‌كانی نێوخۆی ئێران، كه‌ به‌رپرسانی وڵاته‌كه‌ ئه‌مریكا و ئیسرائیل تۆمه‌تبار ده‌كه‌ن و ده‌ڵێن، له‌ پشت ناڕه‌زایه‌تییه‌كانه‌وه‌.

زۆرترین بینراو
© 2022 Awene Online, Inc. All Rights Reserved.
×