بەهۆی تەقینەوەی غازەوە لە باڵەخایەكی روسیا، نۆ كەس گیانیان لەدەستدا
  2022-11-19       213       

بەهۆی تەقینەوەی غاز لە باڵەخانەیەکی پێنج نهۆمیدا لە روسیا، لانیکەم نۆ کەس گیانیان لەدەستدا كە چواریان منداڵن.

ئاوێنە: ئەمڕۆ شەممە، ڤالێری لیمارێنکۆ، پارێزگاری ساخالینی باشوری روسیا بە میدیای وڵاتەکەی وت، روداوەکە لە ناوچەی تیمۆڤسکۆی رویداوە و ئاماژەشی بەوەکرد کە لەو نۆ کەسەی گیانیان لەدەستداوە چواریان منداڵن.

لیمارینکۆ باسی لەوەش کرد کە 33 کەس لە باڵەخانەکەدا ژیاون و "جارێ چارەنوسی بەشێکیان نادیارە".

 وەزارەتی تەندروستیی رووسیا وتویەتی، بەگوێرەی زانیارییە سەرەتاییەکان، تەقینەوەکە بەهۆی لێچونی غازەوە رویداوەو "بەشی زۆری نهۆمەکان بەهۆیەوە داڕماون". وتیشی باڵەخانەکە "کۆن بوە"و لە ساڵی 1980 دروستکراوە.

ڤالێری لیمارێنکۆ ئاماژەی بەوەش کرد کە ئەو خێزانانەی ماڵەکانیان بەهۆی تەقینەوەکەوە رووخاوە یانیش زیانیان بەرکەوتوە، قەرەبودەکرێنەوە و بەوتەی خۆی، هەر خێزانێک 500 هەزار روبڵی پێدەدرێت کە دەکاتە نزیکەی 8,217 دۆلار. وتیشی، ئەوانەی ئەندامێکی خێزانەکانیان لەدەستداوە یەک ملیۆن روبڵیان پێدەدرێت کە ئەویش دەکاتە  16,434 دۆلار.

لای خۆشیەوە، وەزارەتی ئیمێرجێنسیی روسیا رایگەیاند، 60 کارمەندی فریاکەوتنی رەوانەی شوێنی روداوەکە کردوە.

زۆرترین بینراو
© 2022 Awene Online, Inc. All Rights Reserved.
×