مه زهەر محەمەد ساڵح، راوێژكاری دارایی سودانی، ئەمڕۆ شەممە، رایگەیاند، دوایین رێكارەكانی بانكی ناوەندیی عێراق، رەنگدانەوەی سەركەوتنی دانوستانەكانییەتی لەگەڵ گەنجینەی ئەمریكاو ئاماژەن بۆ سوككردنی كۆتوبەندە سەپێندراوەكانی ئەو وڵاتە لەسەر عێراق.
ئاوێنە: مه زهەر محەمەد ساڵح، بە ئاژانسی رەسمی هەواڵی عێراقی وتوە"ئەو پاکێجی ڕێکارانەی کە لە لایەن بانکی ناوەندیی عێراقەوە چەند کاتژمێرێک لەمەوبەر راگەیەندران، ڕەنگدانەوەی ئەرێنیی سەركەوتنی دانوستانەکانی نێوان بانکی ناوەندیی عێراق و گەنجینەی ئەمەریکان، هەروەها بە سوككردنی سیستماتیكیانەی كۆتوبەندە سەپێنراوەكان دادەنرێن، ئەوەش بەپشتبەستن بە ئامرازە بانكییە نێودەوڵەتییەكان، وەك کەناڵی شەفاف بۆ گواستنەوەی پارەو بەشێوەیەكی وردو فراوانتر بۆ ئەنجامدانی حەواڵەی دەرەكی لەنێوان عێراق و جیهاندا."
ئاماژەی بەوەشکردوە، "ئەو ڕێنماییە دەركراوانە ئاماژەن بۆ رزگاركردنی سیستماتیکیانەی حەواڵەی دەرەكی لەو كۆتوبەند و رێنماییانەی كە پێشتر لەسەر جوڵەی باڵانسی پارەدانی عێراق دانرابون، ئەوەش بەهای دیناری عێراقی بەخێرایی بەرزدەكاتەوە."