شارەزایەكی بواری كەشناسی رایدەگەیەنێت لە دوسبەی دوشەممەوە ناجێگیری كەشوهەوا لە هەرێم دەتسپێدەكاتەوەو ئەگەری هەورە بروسكەو نمەباران لە هەندێك شوێن هەیەو رۆژی سێشەممەش شەپۆلێكی خۆڵبارین هەرێم دەگرێتەوە.

ئاوێنە: ئاراس جەبار، شارەزای بواری كەشناسی، ئەمڕۆ شەممە، لە راگەیەندراوێكدا وتی، لەئەنجامی بەردەوامی کاریگەری بارستە ھەوای گەرمی باکوری ئەفریقا سبەی یەکشەممە، پلەکانی گەرما کەمێک بەرزتر ئەبنەوە بەراورد بە ئەمڕۆ.

وتوشیەتی، لە دوسبەی دوشەممەوە، کاریگەری ئەو گەرمایە لە سەر ناوچەکانمان کەمدەبێتەوە ئەوەش لەئەنجامی نزیکبونەوەی بارستە ھەوایەکی فێنک بۆ سەر ناوچەکانی دەریای ناوەراست و تورکیا و ناجێگیربونی کەشوھەواش لەناوچەکانمان دەستپێدەکاتەوە و ئەگەری ھەورە بروسکە و نمە باران لەھەندێ شوێندا ئەبێت.

ئەوەشی خستۆتەڕو، بۆ رۆژی سێشەممە، کاریگەری ئەو ناجێگیرییە زیاتر ئەبێت و ئەگەری چالاکبونی بای رۆژئاواو  باشوری رۆژئاوا ئەبێت بەخێرایی 15-40کم/ک بەھۆیەوە شەپۆلێکی خۆڵبارین لەناوچەکانی سوریا و رۆژئاوای عێراقەوە ناوچەکانی ھەرێمی کوردستان ئەگرێتەوە بەتایبەتی زیاتر ناوچەکانی باشوری ھەرێم و پلەکانی گەرماش زیاتر نزمدەبنەوە و کەش تا رادەیەک فێنک ئەبێتەوە.

بەپێی قسەی ئاراس جەبار، بەگشتی کاریگەری ئەم حاڵەتە تا کۆتایی ھەفتە رۆژی پێنجشەممە بەردەوامی ئەبێت و ناوبەناویش لەشوێن و کاتی جیاوازدا بەتایبەت رۆژی پێنجشەممە ھەورە بروسکە چالاک ئەبێت و ئەگەری تاوە باران ئەبێت و بارانەکە بۆ زۆربەی ناوچەکان کەمە بەڵام لەھەندێ شوێندا بە دیاری نەکراوی بارانی بەخوڕ و تەرزەش ئەبارێت.