عودەی عەواد پەرلەمانتاری فراکسیۆن سادیقون لەپەرلەمانی عیراق سکاڵایەکی یاسایی لەدژی هەریەک لەمستەفا کازمی سەرۆک وەزیران و عەلی عەبدولئەمیر عەلاوی وەزیری دارایی پێشووی عیراق تۆمار کرد لەبەرامبەر رەوانەکردنی پارە بۆ هەرێمی کوردستان و وەک ئەو پەرلەمانتارە ئاماژەی پێکردووە رەوانە کردنی ئەو پارەیە بۆ هەرێم پێچەوانەی یاساو دەستوور بووە.
ئاوێنە: ئەوەش دواى ئەوە دێت، لەلایەن دادگاى فیدراڵى عێراقەوە بڕیارى ڕەوانە کردنى پارە بۆ هەرێم قەدەغەکرا و تائێستا چارەسەرێکى یاسایى و سیاسیش بۆ ئەو پرسە ڕانەگەیەنراوە بەڵام حکومەتى عێراق پێشنیارى کردووە ٢٠٠ ملیارەکە بەقەرز بۆ هەرێم ڕەوانە بکات و حکومەتى هەرێمیش دەڵێت ئێمە قەرزمان ناوێت ئەوە شایستەى دارایى هەرێمە".
ئەو پەرلەمانتارەى کە سکاڵایەکى نویێ لەسەر هەرێم تۆمار کردووە سەر بەو حزبەیە کە هاوپەیمانى لەگەڵ پارتی و یەکێتیدا لەچوارچێوەى هاوپەیمانى بەڕێوەبردنى دەوڵەتتدا هەیە و بەباڵى سیاسى گروپەکەى خەزعەلى دادەنرێت.