نێچیرڤان بارزانی، سەرۆكی هەرێمی كوردستان لەمیانی كۆبونەوەی لەگەڵ وەفدێكی كۆماری میللیی چین، رایگەیاند، هەرێمی كوردستان خوازیارە سودمەند بێت لە پڕۆژەكانی ئەو وڵاتە لە عێراق.
ئاوێنە: بەپێی راگەیەندراوێكی سەرۆكایەتی هەرێمی كوردستان، نيوه‌ڕۆى ئه‌مڕۆ دوشه‌ممه، نێچيرڤان بارزانى، سه‌رۆكى هه‌رێمى كوردستان، پێشوازى له وەفدێكى كۆمارى میلليى چين به سه‌رۆكايه‌تيى ژو ڕوى، یاریدەدەری وەزیر لە فه‌رمانگه‌ى په‌يوه‌ندييه‌كانى ده‌ره‌وه‌ى کۆمیتەی ناوەنديی پارتى كۆمۆنيستى چین كرد.
بەگوێرەی راگەیەندراوەكە، له ديدارێكدا كه باڵيۆزى چين له به‌غدا و به‌رپرسان له كونسولخانه‌ى گشتيى چين له هه‌ولێر ئاماده‌ى بون، په‌يوه‌ندييه‌كانى چين له‌گه‌ڵ عێراق و هه‌رێمى كوردستان، دۆخى عێراق و ئاڵنگارييه‌كانى به‌رده‌مى، په‌يوه‌ندييه‌كانى هه‌ولێر ـ به‌غداو گفتوگۆى چاره‌سه‌ركردنى كێشه‌كانيان، تاوتوێ كرد.
وەك لە راگەیەندراوەكەدا هاتوە"هه‌ردولا ئاماژه‌يان به‌وه‌دا كه به بايه‌خه‌وه له په‌يوه‌ندييه‌كانى چين له‌گه‌ڵ عێراق و هه‌رێمى كوردستان ده‌ڕوانن و خوازيارى بره‌ودان به هاريكاريى نێوانيانن، به‌تايبه‌تى له بوارى بازرگانى و كولتوريدا. هه‌ر له‌م باره‌يه‌وه باس له كارو چالاكييه‌كانى كۆمپانيا چينييه‌كان له عێراق كرا."
هەر بەپێی راگەیەندراوەكە، ده‌رباره‌ى كێشه‌كانى هه‌ولێرـ به‌غدا، نێچيرڤان بارزانى جه‌ختى له‌وه كرده‌وه كه "جێبه‌جێكردنى سيستمى فيدرالى له عێراق و چاره‌سه‌ركردنى كێشه‌كان له‌سه‌ر بنه‌ماى ده‌ستور، ده‌بێته هۆى سه‌قامگيرى و بره‌ودانى زياتر به بوارى ئابورى. هه‌روه‌ها خواستى هه‌رێمى كوردستانى دوپاتكرده‌وه بۆ سودمه‌ندبون له‌و پرۆژانه‌ى چين له عێراق ئه‌نجاميان ده‌دات."
لە راگەیەندراوەكەدا هاتوە، "په‌يوه‌ندييه‌كانى عێراق و هه‌رێمى كوردستان له‌گه‌ڵ وڵاتانى دراوسێ و ناوچه‌كه، شه‌ڕى دژى تيرۆر و دوايين پێشهاته‌كانى ناوچه‌كه به‌گشتى، لايه‌نێكى ديكه‌ى ديداره‌كه بون."