وەزیری دارایی عێراق رایگەیاند، وەزارەتەكەیان خەریكە كاركردن لەسەر ئامادەكردنی پڕۆژە یاسای بودجەی ساڵی 2023 تەواو دەكات، دەشڵێت، "بە ئیرادەی حكومەت و خەڵك، كێشەی بەرزبوونەوەی بەهای دۆلار چارەسەركرا".
ئاوێنە: تەیف سامی، وەزیری دارایی عێراق لە كۆڕبەندی دارایی عەرەبیدا رایگەیاند: ئەوان سەرقاڵن بەوەی کە كاركردن لەسەر پڕۆژە یاسای بودجەی ساڵی داهاتوو تەواو بكەن و دەشڵێت، دەست بە چاكسازیی گشتگیری لە ئابووریی عێراقدا دەكەن.
باسی لەوەشکرد، لەپاڵ ئەو هەنگاوانە دەستدەکەن بە دانانی ستراتیژێكی روون بۆ فرە چەشنكردنی ئابووری وڵات و بەرزكردنەوەی داهات.
ئەوەشی خستووەتەڕوو، بەهۆی پشتبەستنی عێراق بە نەوت و بوژانەوەی ئابووریشی بەندە بەوەوە، ئەوە حكومەت و دامەزراوە ئابووری و داراییەكانی عێراق، بەردەوام لە ئامادەباشیدابن بۆ تێپەڕاندنی ئاڵنگاری و قەیرانەكان.
لەبارەی نرخی دۆلاریشەوە ئاماژەی بەوە کرد، بە ئیرادەی حكومەت و خەڵك، كێشەی بەرزبوونەوەی بەهای دۆلار چارەسەركرا.