وەزارەتی ناوخۆی عێراق ئاشکرایکرد، لەگەڵ نزیکبوونەوەی مانگی رەمەزاندا، رێوشوێنی پێشوەختەیان گرتووەتەبەر بۆ کۆنتڕۆڵکردنی نرخەکان.
ئاوێنە: لیوا خالید مەحنا، وتەبێژی وەزارەتی ناوخۆی عێراق بە ئاژانسی هەواڵی عێراقی راگەیاندووە، "هەندێک کەس دەرفەت لە قەیرانەکان وەردەگرن بە مەبەستی بەرزکردنەوەی نرخەکان و قۆستنەوەی هەل لە هاوڵاتیان بۆ قازانجێکی نایاسایی".
راشیگەیاند: "یەکێک لە ئەرکەکانی وەزارەتی ناوخۆ و بەڕێوەبەرایەتی بەرەنگاربوونەوەی تاوانی رێکخراو و قۆرغکاری و دەستکاریکردنی نرخەکانە لە بازاڕدا، بۆیە مەفرەزەکانی رووبەڕووبونەوەی تاوانەکانی ئابووری چالاک دەکرێن بۆ بەدواداچوون و دەستگیرکردنی ئەوانەی کاری لەم جۆرە دەکەن".
ئەوەش لە کاتێکدایە، ساڵانە لەگەڵ نزیکبوونەوەی مانگی رەمەزان یاخود بۆنەکاندا، بەشێکی دوکاندارەکان نرخی کەلوپەل و خۆراک گراندەکەن، کە ئەوەش گرانی بازاڕی لێدەکەوێتەوە و هاوڵاتیانیش ساڵانە گلەیی خۆیان لەسەر ئەو بابەتە دەردەبڕن.