فوئاد حسێن وەزیری دەرەوەی عێراق رایگەیاند، لەلایەن ئەمریکاوە گڵۆپی سەوزیان بۆ کڕینی غاز و کارەبا لە ئێران بۆ ھەڵکراوە.
ئاوێنه: "فوئاد حسێن" بە تۆڕی میدیایی عێراقی راگەیاندووە، عێراق بەردەوام دەبێت لە وەبەرھێنان لە کەرتی غازدا و لە داھاتوودا عێراق دەبێتە گەورەترین وڵات لە بەرھەمھێنانی غاز، ئەمریکاش گڵۆپی سەوزی بۆ ھەڵکردوون بۆ بەردەوامیدان بە کڕینی غاز و کارەبا لە کۆماری ئیسلامی ئێرانەوە.
سەبارەت بە روسیاش، وەزیری دەرەوەی عێراق وتی، لە دانەوەی قەرزەکان بە کۆمپانیاکانی روسیا کە لە کێڵگە نەوتییەکانی عێراق کاردەکەن دووچاری ئاستەنگ بوونەتەوە.
"فوئاد حسێن" وەزیری دەرەوەی عێراق و "عەلی عەلاق" پارێزگاری بانکی ناوەندی و ژمارەیەک لێپرسراوی باڵای تری عێراقی لە واشنتۆن لەگەڵ گەورە لێپرسراوانی ئەمریکا کۆبوونەوە.