مەكتەبی سیاسی یەكێتی لە پەیامێكدا بە بۆنەی هاتنی مانگی رەمەزانەوە داوا لە لایەنە سیاسییەكان دەكات ئەم مانگە پیرۆزە بكەنە دەرفەت بۆ ئاشتەوایی گشتی و بەرژەوەندییە باڵاكان بخەنە پێش بەرژەوەندییە تایبەتییەكانیان.
ئاوێنە: مەكتەبی سیاسی یەكێتیی نیشتمانیی كوردستان، ئەمڕۆ چوارشەممە، لە پەیامێكدا بە بۆنەی هاتنی مانگی رەمەزانەوە وتویەتی"ئومێدەوارین مانگی رەمەزانی پیرۆز، مانگی خێرو خۆشی و قوڵبونەوەی گیانی لێبوردەیی و ئاشتی كۆمەڵایەتی بێت بۆ گەلەكەمان."
هەروەها داواشی كردوە"هێزو لایەنە سیاسییەكان ئەم مانگە پیرۆزە بكەنە دەرفەت بۆ ئاشتەوایی گشتی و بەرژەوەندییە باڵاكانی میللەتەكەمان بخەنە پێش بەرژەوەندییە تایبەتیەكانیان."
دەقی پەیامەكەی مەكتەبی سیاسیی یەكێتی:
بەبۆنەی هاتنەوەی مانگی پیرۆزی رەمەزان، گەرمترین پیرۆزبایی ئاراستەی هەموو موسلمانانی كوردستان و عیراق و جیهان دەكەین، ئومێدەوارین مانگی رەمەزانی پیرۆز، مانگی خێرو خۆشی و قوڵبونەوەی گیانی لێبوردەیی و ئاشتی كۆمەڵایەتی بێت بۆ گەلەكەمان.
لەیەزدانی مەزن داواكارین، لەم مانگە پیرۆزەدا، گەلەكەمان بەدور بێت لە هەمو كێشەو نەهامەتییەك و بە تەندروستی باش رۆژو و ئەركە ئایینییەكانیان جێبەجێبكەن. هەروەك هێزو لایەنە سیاسییەكان ئەم مانگە پیرۆزە بكەنە دەرفەت بۆ ئاشتەوایی گشتی و بەرژەوەندییە باڵاكانی میللەتەكەمان بخەنە پێش بەرژەوەندییە تایبەتیەكانیان.
مەكتەبی سیاسی
یەكێتیی نیشتمانیی كوردستان