لە میانی بەشداریکردن لە کردنەوەی یادگەی نیشتیمانی بارزانی، سەرۆک کۆماری عێراق رایگەیاند، چارەنوسی عێراق و هەرێم بەیەکەوە بەستراوە.
ئاوێنه: ئەمڕۆ پێنجشەممە، لە بارزانی یادگەی نیشتیمانی بارزانی کرایەوە، د.لەتیف رەشید سەرۆک کۆماری عێراق کە بەشداربووی کردنەوەی یادگەکە بوو، وتارێکی پێشکەشکرد و وتی:" چارەنووسی عێراق و هەرێم بەیەکەوە بەستراوە و لێکجیانابێتەوە، قۆناغەکانی رابردووش پێمان دەڵێن عێراق بەبێ هاوکاری و هەماهەنگی هەرێمی کوردستان ئارامی بەخۆوە نابینێت و هەرێمی کوردستانیش سەقامگیری ئابوریش بەخۆوەنابینێت بەبێ حکومەتی فیدڕاڵی".
وتیشی:" نیازیکی باش هەیە لەلایەن هەردوو حکومەتی عێراق و حکومەتی هەرێم بۆ سەرخستنی گفتوگۆکان و کۆتاییهێنان بە کێشەکان و کارکردن بۆ داڕشتنی بەرنامەیەکی سیاسی نوێ کە زامنی هەمو مافە دەستوریەکان بێت و هەرێمی کوردستان ببێتە فاکتەرێکی بەهێز بۆ ئێستا و ئایندەی عێراق".