نوسینی: هێمن عەبدولقادر
...................................
ئالان دۆنۆ لە کتێبی (سەردەمی پڕوپوچی)دا دەلێت:-
(چۆن ئەزانیت کەسێک یان سیستەمێک یان دامەزراوەیەک یان پارتێک پڕوپوچە؟)
وەڵامەکەی ئەوەیە کە (ئەوانە بەردەوام هەموو هەولێکیان ئەخەنە گەڕ بۆ ئەوەی کەسی پڕوپوچی وەکو خۆیان بدۆزنەوە و لە دەوری خۆیان کۆیان بکەنەوە)
کاتێک کۆمەڵێک گەمژە یەک ئەگرن ، فەرمانگە و دامەزراوەکانی دەوڵەت لە بری پلانی ورد و خزمەتی خەڵک و کەمکردنەوەی ڕۆتین ، ئەبێت بە شوێنی( ئەمڕۆ پێشوازیمان لە فڵان کرد و ئەمڕۆ خوا حافیزیمان لە فڵان کرد)، خۆ ئەگەر لەوە زیاتر بیانتەکێنی بە تەمەنت گوێت لە چوار دێڕی مەعقول نابێت لێیانەوە.
ــــــــ
پڕوپوچەکان هیچ مەترسیەکیان نیە ، تەنانەت ئەگەر وەک گروپ و سەندیکا کۆمەڵەی تایبەت بەخۆشیان هەبێت بەڵام بە مەرجێک دەست وەرنەدەنە ناو کایەی کۆمەڵایەتی و ئیتنی و ئاینی و ڕامیارییەوە ،
بەلام هەواڵەناخۆشەکە ئەوەیە ، پڕوپوجەکان لە ئێستادا نەک لە چوارجیوەی کۆمەڵەو سەندیکای خۆیان نەماون بەڵکو ئێستا ئەوان دەستیان بەسەرماندا گرتووە .
ـــــــ
ئەوان پرینتەر و وەرەقەی ئەیفۆریان هەیە و ڕۆژانە بە ئارەزووی خۆیان سوپاسنامە بۆ خەڵک دروست ئەکەن ،هەر چەند مانگ جارێک یەکتری کاندید ئەکەن بۆ خەڵاتێک ، هەرچی لوت زل و سمت زل و تەنورە کورت و عەقڵ کورتە یەکتری کاندید ئەکەن و وەک کەسایەتی ساڵ بە خەڵکی ئەناسێنن وەک قسەکەر یەکتری بانگهێشتی کۆبوونەوەکان دەکەن ، لەسەر ئەو قسە پڕوپوچ و بێ مانایانەی کە دەیکەن ، بە کاتژمێر چەپڵە بۆ یەک لێدەدەن ، لە کۆمێنت سوپاسی یەک دەکەن ، هەتا ئەوەی کە ئیتر عاقڵ و دانا و ڕەسەن و مەحنەک و نەجیبزادە و بادەکان لە خۆیان دەکەونە گومانەوە وا هەستدەکەن بە جێماون ، بەڵام لە راستیدا ئەوە هیچ نیە جگە لە کۆبوونەوەی چەند گەمژەیەک لە دەوری یەک.
.............................
پلاتفۆرم و پێگە و دەزگا گەورەکانی ڕاگەیاندن چەندین کاتژمێر لە بەرنامەکانی خۆیان ئەدەن بە پروپوچەکان تا باسی شوێنی تاتۆی شەشەم بکەن ،
گەمژەکان زانکۆی تایبەت بە خۆیان کردۆتەوە و دەزگای میدیایی گەورەیان هەیە و شەوانە ڕیکلام بۆ یەکتری دەکەن ، یەکتری بە دکتۆر و ئەندازیار و جەنابی فڵان و فیسار بانگ دەکەن.
ــــــــ
پڕوپوجەکان بە ناوی هەلکردن لەگەڵ مۆدێرنتێ و گۆڕانی سەردەمەکەوە بە خێرایی شوێن بەوانی تر لێژ دەکەن (شەماڵ سائیب و تەلەی قەتار چی و گەڕگەڕ و ڕەشۆڵ و ڕەسوڵ گەردی) ئەگۆڕن بە شەڕەجوێنی ناو باخ و لایڤ میوزک و شەري پەرداخ و تەقەکردن بە ئێم فۆر .
ژنە ڕەسەنەکانی وەک (مەستورەی ئەردەڵانی و حەپسەخانی نەقیب و عادیلەخان و لەیلا قاسم و ڕەوشەن بەدرخان و ..هتد) دەگۆڕن بە فلانی ڤاینەر و فیساری بلوگەر و کچەیوتوبەر و کوڕە تیکتۆکباز و لایڤچی.
مەلای گەورەی کۆیە و مستەفا زەڵمی و عبدالکریمی مودەریس دەگۆڕن بە شەیری ئەم ڤیدییە بکە هەزار خێرت بۆ دەنوسرێت.
.........................
پڕوپوجەکان مانا ئەبەخشنەوە و خۆیان سەرلەنوێ ڕەنگرێژی هەمووان دەکەنەوە ، ئەوان لەبری (خەنەبەندان) و (شەرمەشکانە) و (باوەنخوونی) چاڵێنج و سزا و ڕوتکردنە و هەزارەها تڕۆهاتی تریان هەیە
لەبری (کیژان دەچنە مێرگۆڵان)ی حەسەن زیرەک، (ئایلا و هاورێکانی بابێن بۆ شوقەکە)یان هەیە ، پڕوپوجەکان فڵانی هەزەلی و فیساری قەشمەر، ئێستا گەورەپیاوەکانیانن لە بری (کەریمی عەلەکە) و (مەجیدە فەنی) و (وەستا شەریف) ەکان.
ـــــــــ
لە نالی و سالم و مەحوی و کوردی و باباتاهیری عوریانی و گۆران و مەولەوییەوە گەیشتینە ، مۆبایلەە شیعر ، گەیشتینە خوێندنەوەی شیعر لە پشتی داشبۆردی ئوتومبیل و بە ڕۆب و چەپاندنی غەریزە (ئیرۆتیکیەکان) لە کارەساتی ڕەشی شەشی ئەیلولی بەردەرکی سەرا و کوژرانی عەولە سیس و شاکارەکانی حەمدییەوە ، گەیشتینە ئەوەی لە چێی ؟ یان (بەو کچە بلێن با وانەکات)
پڕوپوچەکان هەمیشە هاوکاری یەکترن بە مانایەکی تر یەکتری تەواو دەکەن وزە لە یەکتری وەردەگرن ، کاتێک کۆمەلێک پروپوچ یەک دەگرن ڕاستی ئاوەژوو دەبێتەوە ، ئەو کاتە تڕۆهات دەبێتە ئەڵماس و دەنگ ناخۆش ئەبێت بە گۆرانی بێژی گەورە و لایڤ چی و کورتە ڤیدیۆکان ئەبنە نووسەر و بیرکەرەوە و دەمڕاستی نەتەوەیەک ، شوێنی بیرکردنەوە قوڵەکان ئەگرن.
لە ئەدەبیاتی فۆلکلۆریدا جاران دەیانووت :-
(دەستە سڕەکەت سێ گوڵ حەبیبی
بۆمی بنێرە هام لە غەریبی)
دەستە سرێک بەس بوو بۆ ئەوەی چەند مانگێک مرۆڤ بە ئومێدەوە بژی ، ئێستا پڕوپوجەکان ئەیانبەن بۆ شوقە و ڕۆژێک فڕێیان ئەدەنە خوارەوە ڕۆژێک دەرمانخواردیان ئەکەن.
پیشینان ئەڵین (قاز هەتا قەلەو تر بێت ، قونی تەنگ تر ئەبێتەوە) ، هەتا پڕوپوجەکان زیاتر بن ژیانی کۆمەڵایەتی و ئیداری و ڕامیاری خراپتر و تەنگ تر ئەبێتەوە.
...........................
پیاهەڵدان بەشان و باڵ و خۆنمایشکردنی خۆتدا ، ناڕەسەنی و پڕوپوچی و تڕۆهاتی سەردەمەکە نیشان ئەدات نەک پڕ هونەری تۆ ، چون ئینسانی سەنگین و پڕ هوونەر هەر ئەسلەن تەریق ئەبێتەوە ، باسی خۆی بکات و لاف و گەزاف لێبدات و ڕۆژانە وێنەی خۆی دابنێت و گوایە شتێکی زۆر موهیمی کردووە ، ئەگەر سەردەمەکە پروپوجێتی نەبێت تۆ هی ئەوەیەت ؟
حەمدی ووتەنی:-
(مەدحی خۆکردن بەیانی ناڕەسایی کردنە
بۆیە قەت نادەن هونەرمەندان لە دونیادا گەزاف)
...............................
بەخێر بێن بۆ سەردەمی پڕوپوجەکان ،بۆ سەردەمی ئەوانی بە تف کردنە یەک پارە پەیا ئەکەن ، بە ڕاوەشاندنی وورگ ڕیکلام ئەکەن ، بە ماستاو جێتی ئەچنە پیشەوە بە کۆبوونەوەیان لە چوار دەوری یەک زانکۆ و فەرمانگە و کۆمەڵگایان کردۆتە زبڵدان.
بەخير بێن بۆ سەردەمی بەختەورەی و ستایشکردن و ڕێزلێنان و بەرزکردنەوە ی پڕو پووچەکان و ماندووبون و دڵتەنگی پەراوێزی عەقڵەکان ، پیرۆزتان بێت ئەو ماندوو بونەی بە هۆی بێعەقڵییەوە تێیکەوتووین
نوقتە سەری دیڕ ....
---------------------------------
نظام التفاهه - سەردەمی پڕوپوچی (میدۆکراسی) ، ناوی کتێبێکی نووسەر (ئالان دۆنۆ)یە