كۆسرەت رەسول، جێگری سكرتێری گشتی یەكێتی رایگەیاند، بۆ ئێمەی كورد زۆر قورسە
كە دەبینین هاوپەیمانەكانمان پشت دەكەنە دۆستەكانی خۆیان و خەریكە ناوچەكە دەسپێرن
بە دۆخێكی نەخوازراو، كە هیچ كەسێكمان ئومێدی بۆ ناخوازین و كاریگەری خراپ دەكاتە
سەر ئایندەی ناوچەكە.
ئاوێنە: بەپێی راگەیەندراوێكی نوسینگەكەی، ئەو وتانەی جێگری سكرتێری گشتی
یەكێتی پێشنیوەڕۆی ئەمڕۆ دوشەممە، لەمیانی سەردانێكیدا هاتون بۆ مەڵبەندی ڕێكخستنی
چەمچەماڵی حزبەكەی.
هەر بەگوێرەی راگەیەندراوەكە لە كۆبونەوەیەكدا
جێگری سكرتێری گشتی یەكێتی لەوتەیەكدا باسی دۆخی كوردستان و
ناوچەكەو دۆخی ڕۆژئاوای كوردستانی كردوەو دوپاتی كردۆتەوە كە پێویستە لەشكركێشییەكانی
سەر ڕۆژئاوا ڕابگیرێن و چیتر ژن و منداڵ و خەڵكی سڤیل نەكرێنە قوربانی.
كۆسرەت ڕەسول وتوشیەتی"بۆ
ئێمەی كورد زۆر قوڕسە كە دەبینین هاوپەیمانەكانمان پشت دەكەنە دۆستەكانی خۆیان و خەریكە
ناوچەكە دەسپێرن بەدۆخێكی نەخوازراو، كە هیچ كەسێكمان ئومێدی بۆ ناخوازین و كاریگەری
خراپ دەكاتە سەر ئایندەی ناوچەكە."
لەبەشێكی تری
وتەكانیدا كۆسرەت ڕەسول جێگری سكرتێری گشتی باسی لەهەوڵەكانی یەكێتی نیشتمانی
كوردستان بۆ ئاساییكردنەوەی دۆخە كردو دوپاتی كردەوە كە یەكێتی بەئەركی سەرشانی خۆی
دەزانێ هاوكارو پشتیوانی خوشك و براكانی بێ لە هەمو كوردستان، یەكێتی نیشتمانی
كوردستان خەباتی كردوەو خەبات دەكا بۆ سەركەوتنی دیموكراسی و بەرەنگاربونەوەی تیرۆرو
بەدەستهێنانی مافە دیموكراتی و نەتەوەییەكانی گەلی كورد.