وەزیری ناوخۆی
حکومەتی هەرێم رایدەگەیاند؛ مەترسییەکانی ڤایرۆسی کۆرۆنا لە جاران زیاترە، بەو پێیەی
ئێستا سەرچاوەکەی نادیارە، دەشڵێت: لەماوەی تەنها یەک هەفتەدا زیاتر لە (40) حاڵەت
تۆمارکراون.
ئاوێنە: رێبەر ئەحمەد، وەزیری ناوخۆی حکومەتی هەرێم
ئەمڕۆ شەممە لە کۆنگرەیەکەی رۆژنامەوانیدا ئاماژەی بەوەکرد، کە راگەیاندنی قەدەغەی
هاتوچۆ لە رۆژانی جەژندا بۆ ئەوەیە کەمترین بەرکەوتن لە نێوان هاوڵاتیان دروست بێت.
وتیشی: بۆ خۆپارێزی
لە کۆرۆنا قەدەغەی هاتوچۆ راگەیەندراوە و هەڵسەنگاندنی تەندروستی و ئاماژەکانی زیادبونی
حاڵەتەکان کە لەماوەی هەفتەیەکدا زیاتر لە (40) حاڵەت تۆمارکراوە، وایکرد قەدەغەی
هاتوچۆ رابگەیەنین.
وەزیری ناوخۆ
رونیکردەوە کە ئەوان بە بە ستراتیژی بەرگریکردن و هێرشکردن توانیان لە رێکارەکانی
خۆپاراستن سەرکەوتوبن.
راشیگەیاند؛
فشاری ئابوری و قورسی گوزەرانی هاوڵاتیان وایکرد رێگە بدرێت بە کردنەوەی بازاڕەکان
لەماوەی رابردودا، هۆشداریشیدا لەوەی کە مەترسییەکانی کۆرۆنا ئێستا لە هەرێم زیاترە،
چونکە سەرچاوەی توشبوەکان نادیارە و پێشبینیش دەکرێت ژمارەیەکی زیاتر لە توشبو لەنێو
کۆمەڵگادا هەبێت.
سەبارەت بە رۆژانی
قەدەغەی هاتوچۆ لە رۆژانی جەژن وەزیری ناوخۆ وتی: لە رۆژانی دوەم و سێیەمی جەژن
ئاسانکاری بۆ جوتیاران و ئەو کەسانە دەکرێت کە هاتوچۆی عەلوە دەکەن، هەروەها نانەواخانەکان
و دەرمانخانەکان کراوە دەبن.
لەبارەی دەنگۆی
درێژکردنەوەی قەدەغەی هاتوچۆش، رێبەر ئەحمەد رایگەیاند؛ کە ئێستا هیچ بڕیارێک نەدراوە
قەدەغەی هاتوچۆ درێژ بکرێتەوە.