لە هەڵبژاردنی 1992دا پەنجەمان لە حیبرە مۆرەكە هەڵكێشا، دەرئەنجامەكانی هەڵپەسێردرا، دەسەڵاتیان بە مەتر دابەشكردو ئەو سەردەمە ناونرا فیفتی بە فیفتی (50 بە 50)، پاساو ئەوە بو هێزی ئەم دو حزبە تازە لە ئەشكەوتەوە هاتونەتە ئۆفیسی مۆدێرن، نەكا پەنا بۆ توندوتیژی ببەن، بەڵام وا دەرنەچو، شەڕیان هێنایە سەربانی ماڵەكانمان و تا ئێستا باجی قورسی دەدەین.

لەو كاتەوە، لە بری پەنابردن بۆ چارەسەرێكی نیشتمانی و گرەنتی هەرێمێكی بەهێزی یەكگرتوی پارێزراو، كوردستان قەیران بەرهەم دەهێنێت و كەڵەكەیان دەكات، تا گەیشتین بە وەزعی حاڵ و ئەمجارەیان لەم هەمو نادڵنیاییەدا (39 بە 39) خۆی بەرهەم دەهێنێتەوە، هەمان رەچەتەی چارەسەر بۆ هەمان نائومێدی، خۆی دوبارە دەكاتەوە.

لە بنچینەدا بانگەشەی دابەشكردنی ماتماتیكیانەی كورسییەكانی دەسەڵات، بە لۆژیكی لوتبەرزیی زۆرینە، یان پەنجا بە پەنجا، 39 بە 39، درێژەدانە بە هەمان فۆڕمی هەژمونی توێژی مشەخۆری باڵادەستی هەرێمی كوردستان بەسەر چالاكیی ئابوری و بازرگانیی مەرزو سەرانەدا، ئەمجارەیان بە سەرفكردنی چەمكەكانی یەكسانی و شەراكەت، ئیدی وەك چۆن لۆژیكی تاكە هێز بۆیان نەچوە سەر، لۆژیكی (هاوپەیمانیی سجن)یش سەری دەدات لە هەمان شكست.

دەیانەوێت ئەم جۆرە دابەشكردنەی دەسەڵات بكەن بە سیستەم و یاسا و ڕێوڕەسمێكی هەمیشەیی، لەڕێی تۆخكردنەوەی ناوچەی قەڵەمڕەوی بەپێی پرەنسیپی "كەس دۆڕاو و كەس سەركەوتو نییە"، بەخشینەوەی ناسنامەی ساختەی یەكێتی و پارتی بە هاوڵاتی، كە هەمو ئەمانە ناوچەی زەرد یان سەوز و سنوری دێگەڵەش ئەوەندەی تر دەكاتەوە ئەمری واقعێكی تاڵ.

ئەوەی رۆژانە لە گوتاری سەركردەی توڕە و ناوەندی توێژینەوەی وابەستەو پێشكەشكاری شیكپۆش، وەك تەڵە بە ڕوتدا دەتەقنەوە و نیاز وایە ببنە دەستورێكی نەنوسراو، ئەمە بەتەنها شكستی بەڵێنەكانی هەڵبژاردن نییە، بەڵكو شكستی قۆناغ و تەواوی سیستم و بونیادی حوكمڕانیی دەستەیەكی مشەخۆری ئارەزومەندە بۆ كەڵەكەكردنی سەرمایە و بەس.

تێپەڕاندنی ئەم دۆخە، گەڕانەوە نییە بۆ هەڵبژاردنێكی تر، بە ڕێكخستنی فێستیڤاڵی هەڕەشە و موچە بڕینی فەرمانبەر و پرۆڤەی چەكدار لە نمایشی دەنگدان و وێنەگرتنیدا، یان دیزانكردنی دابەشبون، بەڵكو هاتنە سەر شەقامی هێزی خاوەن ئیرادەی دابەشنەكراوی ناو گەمەی پارتی و یەكێتییە، تا بە هۆشیاری و سەبر و ئیرادە و زانین و بە ئەزمونی ژێر قورسایی ستەم، بە ڕۆح و خەمی نیشتمانی ڕوبەڕوی مەهزەلەی دابەشكردن ببنەوە.

هەڵسانەوە لە ناو داروپەردوی وێرانەی حوكمداری، موعجیزە نییە، بەڵكو سروشتی هەر گەلێكە كە بڕیار بدات لە ساتەوەختی هەستیار و مێژوییدا بە ئیرادەوە پێكەوە بوەستن، ئەمە چركەساتی یەكڕیزیی ڕاستەقینەیە، ئەمە نهێنیی زاڵبونە بەسەر قەدەری دێگەڵەدا.

ئەوانەی بەچەپڵەڕێزان پێشوازی لە گوتاری دابەشبون دەكەن، لە ئێستادا شەریك و هاوپەیمانی ئەو فۆڕمەن لە حوكمڕانیی دەستەی مافیا كە دەڵێت: مەرزی خۆم بۆ خۆم، مەرزی خۆت بۆ خۆت، لە ئایندەشدا، هاوچارەنوسی ئەو مەخلوقەن كە ئارەزوی لە خواردنی هەمو شتێكە، تا گەیشتن بە ئارەزوی خواردنی ئیرادەی دەستەجەمعی و توانای گۆڕانكارییش لەڕێی سندوقی هەڵبژاردنەوە.