لە جیۆپۆلەتیکدا دەوڵەت یان کیانی سیاسی نابێت بوەستێت،چوونکە وەستان بە مانای پوکانەوە دێت،لەبەر ئەوە دەبێت گەشە بکەیت و فراوانبیت،گەسەندن و فروانبوونیش بەشێکی زۆری پەیوەندی بەوە هەیە تۆ تا چەند ئامادەیت هەیە لە هاوکێشە گەورەکاندا ،هەر ئەمەی کە تۆ خاوەن هێزەکانی ئەم ناوچەیەو خاوەن هێزەکانی دنیا حسابت بۆدەکەن و بۆچوونەکانت گرنگ وەردەگرن و ڕاوێژت پێدەکەن، مانای ئەوەیە ڕۆڵت هەیە لە موعادەلە گشتییەکەدا.
ئەمڕۆ سەرۆک وەزیرانی هەرێمی کوردستان سەردانی بەریتانیای کرد لای هەموومان ڕوونە، بەریتانیا هەژموون و دەسەڵاتێکى فراوانى لە دونیادا هەیە. یەکێکە لە پێنج ئەندامى هەمیشەیی ئەنجوومەنى ئاسایش، ئەندامى ناتۆیە، پشکى گەورەى لە ڕێکخراوى هاوکارى و پەرەسەندنى ئابوورى بەدەستە، هاوبەشى گرووپى 8 و گرووپى 20ـه.
سەردانەکەى بەڕێز مەسرور بارزانى سەرۆک وەزیرانى هەرێمى کوردستان و پێشوازیکردنى لە لایەن بۆریس جۆنسن سەرۆکوەزیرانی بەریتانیا و گەرمی پرس و باسەکانی تایبەت بە فرۆشتنى گازی سروشتی و چوونە نێو نەخشەى وزەى جیهانی، نیشاندەرى ئەوەیە کە هەرێمى کوردستانیش لەسەر هەمان تیۆرى بەریتانیا: "بازرگانى پەیڕەوى لە سیاسەت دەکات"کاردەکات.
ئەم هاوبەشیبوونە ستراتیژییە وا دەکات کە هەرێمى کوردستان نەک هەر دەچێتە سەر نەخشەى وزەى جیهانى، بەڵکو لە هاوکێشە نێودەوڵەتى و جیهانییەکان چ لە بوارى سیاسەت و چ لە بوارى وزە و بازرگانى بەهێزتر لە ئێستا قسەى خۆى دەبێت و بەمەش کرانەوە و پەرەسەندنى گەورەی بەدوادادێت.
کاتێک ئەم جموجوڵە گەورانە دەبینین لەمانگێکدا ئیمارات و قەتەرو تورکیا و بەریتانیا ئەو وێستگانەن کە سەرۆک وەزیران پێیاندا گوزەردەکات و وڵاتی دیکەشی بەدوادابێت، حەقی خۆیەتی لەبارەى ئەو ژاوەژاوە قسە نەکەین کە لەسەر سەفەرەکەى سەرۆک وەزیرانى هەرێم بۆ تورکیا هاتە کایەوەو و دڵنیام ئەوانەى کە دوێنێ بە توانجەوە قسەیان لەسەر سەردانیکردنەکەى تورکیا دەکرد، ئێستا لە قۆزاخەى بێ هزریی خۆیان دەتلێنەوە، پیرۆزتان بێت ئێوە هەر لەبازنەی خەزغەلی و هاوشێوەکانی بسوڕێنەوەو وێنەی قاچاخچیەتیتان زیاتر لێ دێت، تا ئەو وێنەیەی کە دەوڵەتداری و وڵاتسازی و سیمای کارئەکتەری نێودەوڵەتی کاریگەرو بەهێزو کاریگەر تێیدا نەخشێنراوە.