هێزی پێشمەرگە و هێزی گریلا لە ساڵەکانی ١٩٧٥ و ئەمسال ٢٠٢٥ ، لە سەر ڕێکەوتنی زلهێزەکانی جیهان و حکومەتە شوینیستەکانی ڕۆژهەڵاتی ناوین ، هەواڵی گرینگی ماسمێدیای جیهانیان پێک هێنا . ئایابەشێوازی کارەساتبار تراژیدیە قوڵەکانیان نوێنەرایەتی دەکرد؟ چرکە ساتەکان هەست و دەرونی مرۆڤە عەداڵەتخواز و سیکۆلارەکانی هەژاند. چەککردنی هێزی پێشمەرگە ی باشور١٩٧٥ و چەکدانانی ئەمسالی هێزی گریلا ٢٠٢٥، بە ئاسانی توانیان هەستی شارۆمەندانی کورد بریندار کەن . بێ درۆ نەمتوانی بەر بەفرمێسکەکانم بگرم و کوڵی دڵم ئارامی نەگرت وهەردووجار چ لە رۆژهەڵاتی کوردستان و چ لە وڵاتی سوید گریام . ئایا مەنتیقی و لۆژیکە کە هێزی پێشمەرگە و هێزی گریلا متمانە بە ناسیونال شوینیزمی تورکیا، سوریا، عێراق و ئێران بکات ؟ پەندێکی کوردی دەڵێت : نابێ بە پێکەنینی دوژمن و خۆرەتاوی زستان متمانەت هەبێت . ئایا ڕەوتی ڕووداوەکان بەقازانجی ئاشتییە و شیاوی متمانەیە ؟ هەڵکەوتەی ژیئوپولیتیکی کوردستان ، لە سەر هەڵویستی شوینیزمی تۆخی وڵاتانی داگیرکاری کوردستان کاردانەوەی هەیە

.....................................

گەشەی تیژ تێپەڕی تکنۆلۆژیا، تەنانەت مێشکە ورد بینەکانیشی سەرسام کردووە و سنوور ناناسێت و کونتڕؤل و جاسوسی لە ئاسمانەکانەوە ،پلاتفورمی نە نوسراوی زلهێزەکانە . لە شەڕی ئیسرائیل و ئیران یەک سەربازیش پێی نە ناوەتە سەر خاکی ئێران و پەلاماری تیکنۆلۆژی ئەوەی بە مەلا مێشک بەردین و دەماگرژەکانی کرد، مەگەر بەعس بە نەتەوەی کوردی کردبێت . مەیدانی چالاکی و هەڵسوڕانی گریلا و پێشمەرگە و هێرش بۆ موڵگەکانی دوژمن ، چوەتە یانەی مەحاڵ و دەرفەتی خۆشاردنەوە و پاشەکشە و شەر بە چەکی سووک ، دەورانی مێژوویی بەسەر چوە و و لە ڕەوڕەوەی مێژوو بەجێ ماوە . پێداچونەوە ، ئانالیز و شی کردنەوەی کونکریتی بارودۆخی" گلوبالیزم و دەسەڵاتی فوندەکان و دراوەکان - " زۆر پێویست و گرانبەهایە . مەبەست لە دراوەکان دولار، پاوند و ئۆرۆیە  Dollar ,Pound  and Euro.

 لە بارودۆخی ئێستادا کە هێشتا سەرجەم و کۆی گفتوگۆکان و گرێبەستەکان لە ماسمێدیا بڵاو نە بوەتەوە ، بۆ مرۆڤی دڵسۆز و خەمخوار جێگای پرسیارە کە کام حکومەت و ڕێکخراوە نێو نەتەوییەکان، ئەم ڕێکەوتنانە  لە نێوان پارتی کریکارانی کوردستان و حکومەتی کمالیستی تورکیا زەمانەت و گارانتی دەکات ؟ پێ دەچێت ڕێکەوتنەکان تارادەیەک هەر نهێنی مابێتەوە و لە ژووری داخراو و دوور لە چاوی تیژبینی ماسمێدیای خاوەن هەڵویست کرابێت . ماسمێدیای حیزبی بەشداری پڕۆسەی چەک دانانەکە بوون ، کە بەشێوەی دڵگیر هەموو پێڤاژەکەیان ڕووماڵ نەکردو بڵاو نەکردوەتەوە . کە بەڕاشکاوی تەم و مژی دیاردەی حیزبی پێوە دیار و، وەک جاری جاران خۆی دەنواند .

..................................

 لە سیمای دلۆڤانی گریلا شادی و خۆشی باری کردبوو و، وێنەکان تاڕادیەکی زۆر خەم و پەژارەیان نوێنەرایەتی دەکرد. و گریلاکان لە دەریای بێ متمانەیی باسکە مەلەیان دەکرد و هەڵگری  شێوەیەک لە پەژیوانی بوون . ورد بینی ، ئانالیز و شی کردنەوەی مێژوویی بارودۆخەکە فرە پێویست و بەنرخە . بەو هیوایە رێکخراوی پی- کا- کا لە داو و کەمەندی شوینیزم گرفتار و ئەسیر نەکرێت. چونکوو کەمەند و داوی ناسیونال شوینیزم بەهاوکاری زلهێزەکان "چنراوە " .  بۆسەکە نەبینراو و نهێنیە و مانگان و ساڵان پێویستە تا ئاسەواری خۆی دەر بخات . ئەم بارودۆخە رێگایەکی مودێڕن و شارستانی خستوەتە بەر پێ خەباتکاران ، تا لە شێوەی خەباتی مەدەنی  لەچێن و توێژەکانی کۆمەڵگا وشارۆمەندان نزیک کەونەوە، و بەرخودانی سەرشەقام ، کۆڵان و گەڕەک هەڵبژێرن . و بەرەو ڕووی خەباتی مەدەنی و ژیاری کە زەرەر و زیانی فرە کەمتر و تەقرێبەن خوێناویش نیە هەنگاوی مکوڕ و جیدی  هەڵگرن و پێشوازی لێ بکەن . خەباتی مەدەنی و ژیاری ڕاستەوخۆ  ئازادی و مافی ژنان دەپارێزێت  و، بێگومان  ڕێگاکە بەگوڵ نەچنراوە وهەمواریش نیە . 

 ...............................

  من وەک مرۆڤێکی سیکولار، ئارامانخواز و عەدالەتخواز  خوازیاری ئاشتیەکی مودێڕن بەسیمای مرۆڤدۆستانەم . پێک گەیستنێک  بێت کە گونجاو لە گەڵ تیکنۆلۆژی و ڕەوڕەوەی مێژوو و سەد لەسەد مافی ژنان بپارێزیت . ئێستا شارۆمەندانی کورد لە ترسێکی قووڵدا دەژین و شک و گومان لە کمالیزمی مەزنخواز لە ئاستێکی نزمدا نیە . پێم وایە چەکدانان ، ئاوێنەی فورمێکی تری خەبات و بەرخودانە و لە باتی ئامێری چەک ، بیر و هزری پێشکەوتوو جێگای چەکی سووکی گرتوەتەوە . خەباتی مەدەنی لە پێناو پێکەوە ژیان ، دیموکراسی و ئازادی ژنان کاردانەوە و تەئسیری راستەوخۆی لە سەرژێرخان و سەرخانی کۆمەڵگا هەیە . خۆزگە وڵاتانی شوینیستی و داگیرکارانی کوردستان  حکومەتگەلێکی دیموکراتیک و پێشکەوتوویان هەبوایە. کە  مافی بەرابەری نەتەوەکان و ئازادی ژنان و ڕێز لە دیموکراسیان پاراستبا. لەم بەستێنەدا بەڕاشکاوی کێشەی گەلی کوردخێراتر چارەسەر دەکرا.  بەرخودان و شەڕی چەکی ئەندیشە، کاتێک بێدەنگ و کپ دەکرێت، کە مافی شارۆمەندانی کورد پارێزراو بێت . جێگری سەرۆکئ ئاکەپە جەناب( عومەر چەلیک ) دەڵێت : پێڤاژەی چەکدانان، هەسەدە ، پژاک و یەپەدیش دەگرێتەوە . ئەم وتەیە لە تۆڕی جاڵجالۆکە دەچێت کە دەرباز بوون لەم بۆسە و کەمەندە ئاسان نیە ودژوارە

.............................

پێویستەهەموو ڕێکخراوە کوردیەکان،داوا  لە حکومەتی تورکیا بکەن کە  مەقەڕ وبارەگا نیزامیەکانی و ناوەندە جاسوسیەکانی لە باکور و باشور هەڵچنێت و  بەئاشکرا هێزەکانی بکێشیتەوە نێو تورکیا و باشور بەجێ بهێڵن . پێ – کا – کا ڕاستەوخۆ بانگەوازی دڵسۆزانەی ئاشتی دەکات . ئایا حکومەتی تورکیا هەمان هەڵویستی گرتوە کە لە کردەوەدا،پڕۆسەی ئاشتی بپارێزیت و لە باکوری کوردستان حکومەتی نیزامی لا بات و سیستەمی جاسوسی هەڵچنێت ؟   ئایا پارتی کرێکاران کوردستان هەموو هێز و توانا و کەرەسەکانی شەڕی ڕادەستی دوژمن کردووە ؟  لە هەنگاەی یەکەم سی گریلا ،پازدە ژن و پازدە پیاو چەکەکانیان تەحویل داوە و سوتێندراوە . لەم بوارەدا ڕەچەشکین بوون و بەشێوەی مکوڕ و بوێرانە لە پێڤاژەی ئاشتی، پێشوازیان کردو ڕچەیەکی بێ وێنەیان لە فورمی شەڕی گریلایی وپارتیزانی شکاندووە.                     

.............................

وەک ڕؤژی ڕووناک دیارە کە حکومەتەکانی عێراق، ئێران ، سوریا و تورکیا بۆ شکاندنی کەرامەتی کورد یەک  ئەندیشە ، یەک هەڵویست ،یەک تاکتیک ، یەک پلاتفورم ، یەک ئامانج ، یەک ستراتژی و یەک ڕێبازی گڵاویان هەیە . بۆ ئاسکی کێوی چ فەرقێک دەکات کە گورگی بۆر یا گورگی زەرد ڕاوی بکات. .

ڕەنج ، فیداکاری ، دڵسۆزی ، خەبات و بەرەنگاری هەموو گریلاکان ، لە بواری مێژووییدا شیاوی ڕێز و قەدەردانیە ، کە بێگومان نەدوژمن دەتوانێت حاشای لێ بکات و نە دۆستێش دەتوانی ڕێزی لێ نەگرێت.  ئاکامی دانیشتن و گفتوگۆکانی پارتی کرێکارانی کوردستان لە گەڵ حکومەتی تورکیا هێشتا بەفەرمی بڵاو نەبوەتەوە . بیر و ڕای گشتی و ماسمێدیای بێ لایەن، چاوەڕوانی بڵاو بونەوەی ڕێکەوتنەکانن . پێدەچێت بۆ چارەسەری ستەمی نەتەوایەتی و بەرگری لە ژنوساید و قەڵاجۆی گەلی کورد، خەباتی چەکداری و خەباتی مەدەنی هەردووکیان پێویست بێت .