لە کاتێکدا هەرێمی کوردستان بە قەیرانێکی درێژخایەن لە حکومەتسازی، لاوازی متمانەی گشتی و دابەشبوونی سیاسی تێدەپەڕێت، هەر گوتارێک بە ناوی (گۆڕانکاری) پێویستی بە هاوتاکردنی ستراتیژی سیاسی و لۆژیکێکی کۆمەڵایەتی یەکانگیر هەیە.
لەو فەزاو پێشهاتە هەستیارانەی ئێستادا، هەڵوێست و لیدوانەکانی (شاسوار عەبدولواحید) پارادۆکسێکی سیاسی قووڵ دروست دەکەن کە لەلایەن خەڵک و چاودێرانەوە بە ئاسانی ناتواندرێت پشتگوێ بخرێن.
لەلایەکەوە، ئەو، بانگەشەی درووستکردنی حکومەتێکی نوێ بەبێ پارتی دەکات و ئەوە وەک هەوڵێک بۆ شکاندنی مۆدێلی دەسەڵاتی دوو حزب و گەڕانەوەی هاوسەنگی حوکمرانی ئۆفەر دەکات، بەڵام لە هەمان کاتدا، هاوپەیمانی لەگەڵ یەکێتی نیشتمانی، حیزبێک کە نزیکەی سێ دەیە هاوپەیمانی ستراتیژی پارتی بووە و بەشدارێکی سەرەکی بووە لە درووستکردنی هەمان سیستەمی حوکمڕانی لە هەریمی کوردستاندا کە ئێستا ئەو دەیەوێت لە ناو جومگەکانی دەستەلاتدا ئاوتی بکات، من پێم وایە ئەو بانگەوازەی شاسوار ئەوگوتارە لە ڕووی ستراتیژی و لۆژیکیەوە دەخاتە ژێر گومانو پرسیارەوە، چونکە ئەگەر سیستەم بەرهەمی هاوبەشی هەمان ئەوهێزانە بووە لە سی ساڵی رابردودا، ئیتر چۆن و بەکام ئاکسیۆنی سیاسی دەتوانرێت بە هاوپەیمانی لەگەڵ یەکێک لە هەمان پایەکانی دەستەڵاتی سی ساڵی رابردودا بە ناوی گۆڕانکاری ئەو سیستەمە بگۆڕدرێت؟، کە ئەوەش لە دیدگایەکی سیاسی و واقێعیەوە زیاتر وەک گۆڕینی هێزی دابەشکاری دەسەڵات دەردەکەوێت نەوەکوو هاوسەنگی و چاکسازییەکی سیستماتیك لە پێناو ژیانی کۆمەڵگادا .
لە لایەکی ترەوە ئەوەی کە زۆر جیگەی سەرنجە، ئەو هێرشکردنەیە بەو زمانە زبرە و شێوازو بەرخوردە ناسیاسیە لەسەرهیزەکانی ئۆپۆزسیۆن، ئەگەرتەنها بێ هەژموونو بێ هێزیش بن لە ناواخندا، لە کاتێکدا کە خودی شاسوار لە ڕابردودا لەگەڵ ئەواندا بانگەشەی یەکگرتنیان بۆ گۆڕانکاری سەرتاسەری دەکرد بەیەکەوە، کە ئەوەش ناهاوتاییەکی ستراتیژیک نیشان دەدات لە تیۆرو لۆژیکی سیاسیدا، ئۆپۆزسیۆنی دابەشبوو ناتوانێت سیستەم بگۆڕێت؛ بەڵکو بە شێوەیەکی ناڕاستەوخۆ ستاتۆی کۆ- دەستەڵات بەهێزتر دەکات بەو شێوەیەی کە شاسوار عبدلواحید لە دیدگای خۆیدا دەیبینێت ، زمانی توند دژی هاوڕێیانی سیاسی، لەجیاتی درووستکردنی ئەلتەرناتیڤێکی یەکگرتوو، فەزای دابەشبوونی کۆمەڵایەتی قووڵتر دەکات و توانای بونیادنانی هێزی ئۆپۆزسیۆن بۆ درووستکردنی هاوسەنگی و ئاڵوگۆڕی سیاسی کەم دەکات، لە هەمان کاتدا لێدوان و بانگەشەکانی ئەو، بە شێوە گشتیەکەی گوایە پەیوەندیان بە ژیانی ڕۆژانەی خەڵکەوە هەیە، نەبوونی خزمەتگوزاری، مووچە، کارەبا و قەیرانی ئابووری، ئەوئاریشانە هەموویان دەکرێت لە هەڵوێستێکی واقعیدا سەیربکرێن کە بنەمای ناڕەزایەتی گشتی پێکدەهێنن و هیچ گفتوگۆیەکو هیچ گوتارێکی سیاسی کە دەخرێتە ڕەهەندوو چوارچێوەی ئاڵوگۆڕ لە ناو کۆمەڵگادا روو بە دەستەڵات، نابێت لە دەرەوەی ئەو بنەمایانەوە سەرچاوە بگرێت، بەڵام کاتێک ئەو گوتارە لەگەڵ زمانی کینە و ئەو جۆرە لە بانگەشەو هێرشی سیاسی تێکەڵ دەبێت، کاریگەرییەکەی تا ئاستی بە سفربوون لە ناو خەڵکدا دادەبەزێت؛ چونکە گوتاری بەڕژەوەندی کۆمەڵگاو خزمەتگوزاریەکان لە پیناوی خەڵک و بەرژەوەندی گشتی، پێویستی بە زمانی متمانەسازی وزمانی نەرم و دیدگایەکی نیشتیمانی هەیە، نەوەکوو زمانی دابەشکاری و لەیەکترازانێکی قوڵتر، ئەو کاتەی سیاسەت بە نەفەسی ڕق و کینە دیدگاکانی دادەڕێژرێن، بابەتی خزمەتگوزاری و ژیانی خەڵک و کۆمەڵگا دەگۆڕدرێت بۆ ئامرازی هەڵچوونی سۆزداری، متمانەی خەڵک بە گوتاری ئالوگۆڕ و چاکسازی لاواز دەبێت و کێشەی ڕاستەقینەی ژیانی خەڵک لە ژێر ململانێی ناڕوونی سیاسی وون دەبێت.
خاڵێکیتر کە بۆمن جێگای سەرنجە، دیارە کە شاسوار عبدلواحید لە ئێستادا ئارەزووی بەشداریەکی زۆر کارای لە حوکمڕانی ودابەشکاری دەسەڵاتدا هەیە بە زمانی خۆی(هاوسەنگی)، ئەوە لە سیاسەتدا شتێکی ئاسایی و مافێکی سروشتیە، بەڵام کاتێک ئەو ئاراستەیە بە گوتارێکی توند دژی هاوپەیمانانی پێشوی و پارتەکانی تری ئۆپۆزسیۆن دەردەبڕدرێت، وەکوو گواستنەوەی پڕۆژە بازرگانیەکانی بۆ ناو پڕۆژەی سیاسی و دەسەڵات بە ناوی گۆڕانکاری دەخوێندرێتەوە، نە وەکوو هەوڵێکی بونیادی و دامەزراوەیی بۆ چاکسازی ڕیشەیی لە پێناو ژیانی خەڵکو شەفافیەتی ئابوری و سیاسیدا.
لە ڕوانگەی ستراتیژیەوە، ئەو شێوازە لە سیاسەت کردن ئامانجێکی دیاریکراوی هەیە، کە ئەویش هەوڵی گۆڕانکاری لە دەستەلاتدا دەگۆڕدرێت بۆ ململانێی ناوخۆی حکومەتوو دەسەڵاتەکەی، ئۆپۆزسیۆن کە خۆی خاوەن چوارچێوەیەکی پتەو نییە لاوازتر و دابەشتری دەکات، وە متمانەی گشتی بە گوتاری (ئاڵوگۆڕ) زیاتر دادەبەزێنێت، بەوەش هەمان سیستەم و فەزای سیاسی بە ناوێکی تازەوە لە فۆڕمێکی پۆپۆلیستی تردا درێژە بە بەردەوامی خۆی دەدات، لە کاتێکدا کێشەی ژیانی ڕۆژانەی هاوڵاتیان کە خاڵی سەنتەرە لە بیردەکرێتوو بەجێ دەمێنێت.
ئەگەربیرکردنەوە لە گۆڕانکاری بە مانای ڕاستەقینەی خۆی بکرێت، پێویستە گوتارێکی سیاسی متمانەساز و بێ دووالیستی دروست بکرێت، ئۆپۆزسیۆن لەسەر ستراتیژییەکی هاوبەش لە بەرامبەر هێزی دەوڵەتدا یەک بگرێت وهەوڵ بدات چاکسازی لە بنەمای سیستەمدا بکات، نە تەنها لە دابەشکردنی دەسەڵاتوو باڵانسگیری لە جیۆگرافیاو زۆنەکاندا، بەبێ ئەو بنەمایانە، گوتاری گۆڕانکاری تەنها وەک ئاڵوگۆڕ و دابەشکاری ناوخۆی دەسەڵات دەردەکەوێت، لە کاتێکدا واقیعی ژیانی خەڵک دەکرێت بۆ دەیان ساڵی تریش هەر لە شوێنی خۆی بمێنێتەوە.
لە لۆژیکی سیاسەتدا، سیاسەت تەنها مەیدانی ململانێی دەسەڵاتوو ئۆپۆزیسیۆن نییە لە پێناو بەرژەوەندیە تایبەتیەکان؛ بەڵکو مەیدانی بەرژەوەندی گشتی و کۆمەڵگایە، مەیدانی چاکسازییە گشتیەکانە، مەیدانی بەرپاکردنی هاوتایی کۆمەلایەتیو سەروەربوونی یاسایە بۆ هەمووان وەکوویەک، کاتێک کەسێک بە پەیامێکی سیاسیەوە و لە هەمان کات خاوەن بەرژەوەندیەکی بازرگانی گەورەوە قسە لەسەر ئاڵوگۆڕی سیاسی و ژیانی خەڵکو هاوسەنگی هێزو ئەو دەستەواژانە دەکات، ئەوا پێویستی بە شەفافیەت و دورکەوتنەوە لە تێکچوونی بەرژەوەندی گشتی هەیە، ئەگەر هاوڵاتیان هەست بکەن کە ململانێکانی ئەو هێزە یان ئەو کەسە تەنها پەیوەندیدارە بە پاراستن یان فراوانکردنی بەرژەوەندی بازرگانی خۆیەوە، ئەوا متمانە بەلێدوان و گوتارەکانیشی بە شێوەیەکی جدی دادەبەزێتو نامێنێت، هەروەکوو ئەوەی لە دوایین هەڵبژاردەنەکانی پەرلەمانی عێراقدا شاسوارو حیزبەکەی رووبەڕوی نۆشینی ئەو تاڵییە سیاسیە بوونەوە.
بە هەستکردن بەو نائارامیە دەرونی و سیاسیەی ئەو، بەو سەرسەختیەی بۆ هاوپەیمانی گرتن لەگەڵ یەکیەتی و دەستەڵاتگرتن لە ناو حوکومەتدا لە ئێستادا، هاوکات دوای چەند رۆژێک هاتنەدەرەوەی لە زیندانەکانی ژێردەستەڵاتی یەکیەتی، مرۆڤ هەست بەوە دەکات کە چەندە ئەو مرۆڤە و بزوتنەوەکەی لە ژیر فشاردایەو چەندە بەرژەوەندیە بازرگانیەکانی لە ژێر هەڕەشە دەبینرێن، کە ئەوەش پرسیارو گومانێکی سیاسی قوڵ لە ناو خەڵک و کۆمەڵگادا دروست دەکات.
لە کۆتاییدا دەمەوێ بە کورتی ئەوە بڵێم، گۆڕانکاری ڕاستەقینە تەنها بە گۆڕینی هاوسەنگی دەسەڵات ڕوونادات، بەڵکو ئەو گۆڕانکارییە دەبێت لە بنەماکانی سیستەمی سیاسی دەوڵەتدا بکرێت، بە گوتارێکی متمانەساز و بەرنامەیەکی ڕوون کە بەرژەوەندی هاوڵاتیان بە ئەولویەت دەگرێت، ئەگەر سیاسەتو ململانێ لە لایەن هەر گروپو کەسێکەوە وەک ئامرازێک بۆ پاراستنی بەرژەوەندی تایبەتی ببینرێت، ئەوا متمانەی گشتی زیاتر لاواز دەبێت و کێشەی ژیانی ڕۆژانەی خەڵک وەکوو خۆی بەجێ دەمێنێت، بەبێ ئەوەی هیچ گۆڕانکارییەکی ریشەیی و ڕاستەقینە ڕووبدات چ لە دەستەڵاتوو چ لە ناو متمانەی خەڵکدا.