ئەو کاک بافڵە فەقیرە!
توانا ئەمین
2021-12-06 854
گیری خواردووە بە دەست ئەم یەکێتییە پارچە پارچەیەوە... پارتی هاوکاری نییە و ئێستا تەماشاکارە، لە یەک ڕۆژدا دەبێ؛ لەبەر دڵی ئەوان بەرهەم ساڵح لە کاندیدی سەرۆککۆماری ئاوت بکات، هێز بۆ سەر مەحمود سەنگاوی و گەرمیان بنێرێ تا ئەو (مافیا!)یانەی بیرە نەوتیان هەیە حل بکات، ڕاویژکاری خۆی و کۆنە زاوای ماڵی کاک کوسرەت لێی هەڵگەڕاوەتەوە و بە دانانی وێنە لەگەڵ شاڵاو کۆسرەت و سەرکردە سەربازییەکانی ئەو باڵە هەڕەشە دەکەن.
داعش هەموو شەوێ هێرش دەکات و پێشمەرگە شەهید دەبێ، کوتلەی کەرکوکییەکان لەسەر نەبوونی پشکی خۆیان لە کێکەکە و ناهاوسەنگی لە کارگێڕانی مەکتەب سیاسییدا هەڕەشە دەکەن، کەسوکار و عەشیرەتی موراد کانی کوردەیی هەڕەشە دەکەن، عەتا سەراوی لە سویدەوە هەڕەشەی بڵاوکردنەوەی زانیاری نهێنی دەکات، شێخ جەعفەر بە پارلەمانتارانی یەکێتی و پارتی دەڵێ "منداڵ و مەزن و نەدی و بدی". سەرکردایەتی کۆنابێتەوە و خوێندکاران لەسەر کورسییەکانیان دادەنیشێنێت. پارێزگاری سلێمانی تەواو بووە و کێ لە جێگەی دابنێ تا بتوانێ (مدینة صعبة) ئیدارە بدات؟ زانکۆکان هەڵتەکیون و خوێندکاران دیسان جادە و شەقامەکانیان گرتووە و بە کورتی مەملەکەتەکە دەکوڵێ... لەوسەرەوەیش لالەزار و لاهور شێخ جەنگی دڕكێکی هەمیشەییە لە قوڕگیدا، نە ئەوەیە قووت بچێت، نە ئەوەیە بۆی تفبکرێتەوە!
کێشەی بافڵ تاڵەبانی ئەوەیە، ناتوانێت وەک باوکی بێت، ئەم کوڕە گەورەیەی مام جەلال لە یەککاتدا هەزار جەبهەی بەرامبەر خۆی کردۆتەوە، لە مێژوودا بۆ هیچ مەلیک و پاشا و سەرکردەیەک؛ حیکمەتی سیاسی نەبووە لەیەککاتدا دنیا لە خۆی بکات بە دوژمن! نازانم ئەم بۆ وا دەکات..؟!