"سێکس" بەرامبەر بە"نوشتە"

2024-09-18 2621

کابرای سیحرباز وتی دەبێت سێکست لەگەڵ بکەم ئەوسا دوعاکەت سەردەگرێت

ئا: هێڤی ئاوات

سیحرو نوشتەو فاڵ‌و جادوو، تا ئێستا لەهەرێمی کوردستان باویان ماوە، زیاتر ژنان‌و کچان باوەڕیان پێیەتی‌و بۆ بەدیهێنانی مرازی دڵ‌و دەروونیان پەنای بۆ دەبەن، بەپێی بەدوداچوونەکانی "ئاوێنە" ئەو شێخ‌و سیحربازانەی ئەمجۆرە کارانە دەکەن، هەندیکجار گێچەڵ‌و دەستدرێژی سیکسی بەرامبەر ئەو ژن‌و کچانە ئەنجامدەدەن کە بەمەبەستی سیحرو نوشتە روویان تێدەکەن.

"دەستی بۆ سنگ‌و رانم برد"

لەگەڕەکێکی ناو شاری سلێمانی، شێخێکی فاڵچی لەژوورێکی نهۆمی یەکەمی خانووەکەیدا، لەسەر دۆشەکێکی رەنگ سپی دانیشتووەو پاڵی داوە بەپشتییەکی رەنگ شینەوە، ژوورەکە پڕە لەبۆنی میسک‌و بخورو ناو بەناویش دوو بوکەکەی کە لەنهۆمەکانی سەرەوەی خانووەکەیدا نیشتەجێن، بەدەوریدا دێن‌و دەچن‌و چی بوێت بۆی جێبەجێ دەکەن، رٶژانە چەندین ژن‌ بەمەبەستی نوشتەکردن سەردانی دەکەن.

پرشنگ (ناوێکی خوازراوە)، تەمەنی ٤٠ ساڵە، لەگەڵ دوو هاوڕێی هاوتەمەنی هاتوون بۆ ئەوەی شێخ لەڕێگەی نوشتەو سیحرەوە، لای مێردو دۆستەکانیان خۆشەویستیان بکات‌و بەمرازی دڵیان بگەن.

پرشنگ بەئاوێنەی وت "یەکەمجار من‌و هاوڕێیەکیانم بەیەکەوە چووینە ژوورەوە بۆ لای شێخ، دوای ئەوەی هاوڕێکەم قسەکانی خۆی بۆ کرد‌و داواکەی خۆی پێوت، من بەهاوڕێکەم وت تۆ بچۆرە دەرەوە بۆ ئەوەی بەتەنها قسەی دڵی خۆمی پێبڵێم، کە ئەو رۆیشت‌و بەتەنها مامەوەو سەری قسەم دامەزراند، شێخ لێم نزیک بۆوەو بەهێواشی دەستی هێنا بۆ سەر سنگم‌و وردە وردە دەستی برد بۆ خوارەوەو بۆ لای رانم، ترسام باوەڕم نەئەکرد بەوەی کە روودەدا، شێخ گەنج نەبوو بەتەمەن بوو، خێرا پاڵم نا بەدەستییەوەو وتم: ئەوە تۆ خەریکی چیت مامۆستا؟ وتی: نا کچی خۆم تۆ دانیشە. وتم: دانیشەی چیتە، تۆ زۆڵیت. هەستامە سەرپێ، وتی: پارەکە. وتم: پارەی چی تۆ زۆڵیت؟".

وتیشی "ئیتر هاتمە دەرەوەو ئەمەم بۆ هاوڕێکانیشم نەگێڕایەوە، وتم نەوەکو قسەیەکم بۆ دروست بکەن‌و حەیام بچێت".

"داوای سێکسی لێکردم"

زۆرێک لەو ژنانەی پەیامنێری ئاوێنە قسەی لەگەڵ کردوون، دەڵێن ترسیان هەیە باس لەو گێچەڵ‌و دەستدرێژییانە بکەن کە لەکاتی سەردانکردنی شێخ‌و سحیربازەکاندا رووبەڕوویان بوەتەوە، بۆیە زۆر بەدەگمەن ئەم جۆرە گێچەڵانەیان بەخێزانەکانیان وتووەو هەرگیز نەشیانوێراوە لای پۆلیس سكالای یاسایی لەسەریان تۆمار بکەن.

پەروین (ناوێکی خوازراوە)، ئەو چیرۆکی خۆی لەگەڵ سحیربازێکدا بۆ پەیامنێری ئاوێنە گێڕایەوە، کە شێخێک بووە لەشارۆچکەیەکی نزیک لەشاری هەولێر، پاش ئەوەی دوو جار نوشتەی بۆ کردووە بە ٥٠٠ دۆلار بۆ ئەوەی لەلای مێردەکەی خۆشەویستی بکات‌، لەسێهەم جاردا شێخەکە داوای "سێکسی لێکردووە" پێیوتووە بۆ ئەوەی خۆشەویست بێت لای هاوسەرەکەی، دەبێت شێخ سێکسی لەگەڵ بکاو تۆوەکەی بخاتە ناو نوشتەوەو ئەویش لەڕێگەی خستنە ئاوەوە دەرخواردی مێردەکەی بدات، ئیتر چی بوێت بۆی دێتەدی، ئەو وتی "داوای سێکسی لێکردم، پێیوتم تۆ زۆر جوانیت دەمێکە بەدوای ئافرەتێکی وەک تۆدا ئەگەڕێم، لەگەڵمدابە نایەڵم کەس بزانێ‌و چیت ئەوێ بۆت ئەکەم‌، مێردەکەت ئەکەم بەگوێ لەمستی تۆ، کە وایوت حەپەسام‌و خێرا رامکردە دەرەوەو لەوساوە نوشتەو سیحرم بەیەکجاری لەبەرچاوکەوت".

"نوشتەمان هەیە بەدلیڤەری"

لەهەرێمی کوردستان کەسانێک هەن لەژێر ناوی شێخ، فاڵچی‌و پیاوچاک، نوشتەو جادوو بۆ ژنان دەکەن، یاخود دەست دەخوێندنەوەو قاوە دەگرنەوەو لەبەرامبەریشدا داوای پارەیەکی دیاریکراویان لێدەکەن، بەڵام هەندێکجار داواکاریی ئەمانە لەو ژنانەی سەردانیان دەکەن لەپارە واوەترەو سەردەکێشێت بۆ "گێچەڵ‌و دەستدرێژی سێکسی". ئەمانە ژنان بەوە فریوو دەدەن کە دەتوانن بەختیان بکەنەوە، ناحەزەکانیان لەبەرچاوی دۆستەکانیان رەش بکەن، مزاری دڵیان بەدیبهێنن، لای مێردەکانیان خۆشەویستیان بکەن، بەدۆستەکانیان‌ بگەیەنن‌و چارەسەری نەزۆکی‌و نەخۆشییان بۆ بکەن.

بەپێی بەدواداچوونەکانی ئاوێنە ئەم کەسانە زۆرجار بەهەڵسوکەوت‌و شێوازی قسەکردن‌و نەترسانیاندا دەردەکەوێ کە راهاتوون لەسەر ئەم جۆرە گێچەڵانە‌و دڵنیان لەوەی قوربانییەکانیان بەهۆی هەستیاری بابەتەکەوە لەڕووی کۆمەڵایەتییەوە سكاڵایان لەسەر تۆمار ناکەن لای پۆلیس‌و دادگا‌کان‌و تەنانەت جورئەت ناکەن بۆ هاوسەرو خێزانەکانیشیان بگێڕنەوە.

نەقیب سەرکەوت ئەحمەد، وتەبێژی پۆلیسی پارێزگای سلێمانی ئاماژە بەوە دەکات بەدەگمەن ژنان سکاڵای یاسایی تۆمار دەکەن لەسەر ئەو سیحربازو جادووگەرانە بەهۆی ئەو مامەڵە نەشیاوەی بەرامبەریان دەیکەن، ئەو بەئاوێنەی راگەیاند "پێشتر سیحربازێکمان لەگەڕەکێکی شاری سلێمانی دەستگیر کرد، دوای ئەوەی ژنێک سکاڵای لەسەر تۆمار کرد‌و وتی من ویستومە بچم نوشتەم بۆ بکات شەڕم بووە لەگەڵ مێردەکەم بۆ ئەوەی ئاشببمەوە، بەڵام کابرا وتویەتی من دەبێت سێکست لەگەڵ بکەم ئەوسا دوعاکەت سەردەگرێت، ئەویش کردویەتی بەداوای یاسایی‌و دراوە بەدادگا".

وتیشی "بەردەوام خەڵکمان گرتووە لەسەر ئەم جۆرە کارانە، کێشەکە ئەوەیە کەسێکی خۆشباوەڕو ناهوشیار باوەڕ بەکەسێکی فێڵبازو قۆڵبڕ دەکات کە گوایە بەسیحر دەتوانێ فڵانە کەس رەش بکات لەبەرچاوی مێردەکەی، کچ هەبووە چووە بۆ ئەوەی شوو بەکوڕێک بکات‌و ئەوانیش سیحری بۆ بکەن‌و پێیبگات، ژن هەبووە وتویەتی ٢٠٠ تا ٣٠٠ هەزار دینارم داوە بۆ ئەوەی لەلای مێردەکەم شیرینم بکات".

وتەبێژی پۆلیس سلێمانی ئەوە رووندەکاتەوە کە زۆربەی ئەو کچ‌و ژنانەی سەردانی ئەو سیحربازانە دەکەن تەمەنیان لەنێوان ٢٠ بۆ ٥٠ ساڵیدایەو زۆربەی ئەوانەشی جادوو دەکەن تەمەنیان لەنێوان ٣٠ بۆ ٧٠ ساڵیدایە، ئەو وتی "لەیاسای سزادان هیچ دەقێکی تایبەتمان نییە کە جادوو بەتاوان دابنێت‌و باسی فاڵچی‌و سیحربازی تیا نییە، ئەمە لەیاسادا بەبابەتی فێڵ کردن دادەنرێت، ئێمەو ئاسایشیش لەهەر شوێنێک زانیاریمان هەبێت کەسێک بەناوی نوشتەو جادوو خەڵک فریوو دەدات‌و فێڵیان لێدەکات دەستگیریان دەکەین‌و دەیاندەین بەدادگا".

وتیشی "کەسانێکیش هەن ریکلام بۆ ئەم کەسانە دەکەن‌و بەخەڵکیان دەناسێنن، تەنانەت لەتیکتۆکیشدا بانگەشە بۆ ئەم شتانە دەکرێت، هەرچەندە کە لێکۆڵینەوەمان کردووە خۆیان دەرنەخستووەو دەڵێن بەدلیڤەری نوشتەت بۆ دەنێرین!".

"قوربانییەکان ژنن"

وەزارەتی ئەوقاف هۆشداری دەدات کە خەریکە نوشتەو جادوو سیحر زیاتر تەشەنە دەكات‌و خەڵكێك خۆی پێ دەوڵەمەند دەكات‌و ڕووداوی كۆمەڵایەتیشی لێدەكەوێتەوە.

نەبەز ئیسماعیل، وتەبێژی وەزارەتی ئەوقاف‌و كاروباری ئایینی بەئاوێنەی راگەیاند ئەم دیاردەیە تازە نیە، بەڵام لەڕاستیدا ئێستا زیاتر تەشەنەی سەندووەو بۆتە چاولێکەری‌، ئەو وتی "دیارەدەیەکی مەترسیداری زۆر ترسناکەو پێویستە ھەمووان پێکەوە بەرەنگاری ببینەوە".

وتیشی "ئەوانەی ئەم کارە دەکەن جۆراوجۆرن، ئەگەر فەرمانبەری ئێمە بێ ئەوا بەپێی ڕێکاری فەرمانبەرێ مامەڵەی لەگەڵ دەکرێت، ئەگەر فەرمانباری ئێمە نەبێ ئەوا سکاڵای لەسەر تۆمار دەکەین، دادگاو وەزارەتی ناوخۆش زۆر ھاوکارە لەگەڵمان".

وتەبێژی وەزارەتی ئەوقاف‌ ئاماژە بەوە دەکات کە ھەڵمەتێکی نیشتمانییان لەرێگەی مینبەرەکانەوە دەستپێکردووە تاوەکو مامۆستایان لەوتارەکانیان زیاتر خەڵک ھۆشیار بکەنەوەو پێیوستە خەڵکیش بزانن ئەمانە بەگشتی ھەموویان بەدوای بەرژەوەندی خۆیانەوەن‌و فێڵ لەخەڵک دەکەن‌و کارەکەشیان بنەمای ئایینی‌و زانستی نیە، ئەو وتی "زۆربەی قوربانیانی ئەم دیاردە ناشیرینە بەداخەوە ژنان‌و خوشکانی ئازیزن، ئەمەش دەگەڕێتەوە بۆ نەبوونی ھۆشیاری کۆمەڵایەتی‌و ئایینی‌و یاسایی".

وتیشی "داوا لەخەڵکی ئازیزی کوردستان دەکەین لەم بەرەنگاربوونەوەی ئەم بابەتەدا ھاوکارو پشتیوانمان بن، لەکاتی بینینی ئەم دیارە ترسناکە پەیوەندی بەدەزگاکانی ئەوقافەوە بکەن لەڕێگەی ئەم ژمارە مۆبایلەوە: ٠٧٥٠٢٤٥٧٥٨٥".