ماركۆ روبیۆ، وەزیری دەرەوەی ئەمریكا رایگەیاند، هێرشەكەی ئیسرائیل بۆ سەر ئێران تاكلایەنە بوە و ئەمریكا بەشدار نەبوە تێیدا و نابێت ئێران لەبەرامبەردا بەرژەوەندییەكانی ئەمریكا لە ناوچەكە بكاتە ئامانج.
ئاوێنە: ماركۆ روبیۆ، وەزیری دەرەوەی ئەمریكا لە راگەیەندراوێكدا وتی، ئیسرائیل هێرشێكی تاكلایەنەی لەدژی ئێران ئەنجامداوە، ئێمە بەشدار نین لەو هێرشەدا و ئەولەویەتی ئێمە پاراستنی هێزەكانمانە لە ناوچەكە.
وەزیری دەرەوەی ئەمریكا وتوشیەتی، ئیسرائیل پێی راگەیاندوین كە پێی وایە ئەو هێرشە پێویستە بۆ بەرگریكردن لەخۆی.
ماركۆ روبیۆ ئاماژەی بەوەشداوە، سەرۆك ترەمپ و ئیدارەكەی هەمو هەنگاوێكی پێویستیان گرتۆتەبەر بۆ پاراستنی هێزەكانمان و لەگەڵ هاوبەشەكانیشمان لە ناوچەكە لەپەیوەندیداین.
وەزیری دەرەوەی ئەمریكا هێمای بۆ ئەوەش كردوە، نابێت ئێران بەرژەوەندییەكانی ئەمریكاو كارمەندانی لەناوچەكە بكاتە ئامانج.