ئا: ئاوێنە
ڕاپۆرتێکی نیویۆرک تایمز وردەکاری ڕووداوەکانی پێش هێرشی ئیسرائیل بۆ سەر شوێنە هەستیارەکانی ئێران ئاشکرا دەکات‌و دەڵێت "ئێران بەدانوستانەکان فریوو دراوەو غافلگیر کراوە".
ڕۆژنامەکە بڵاویکردەوە، ئێران خۆی بۆ ئەگەری هێرشی ئیسرائیل کاتێک ئامادە دەکرد ئەگەر دانوستانە ئەتۆمییەکان لەگەڵ واشنتۆن شکستی بهێنایەو پێشبینی نەدەکرد ئیسرائیل بەر لەشەشەم خولی دانوستانەکان کە بڕیار بوو ڕۆژی یەکشەممە ١٥ی حوزەیران لەعومان ئەنجام بدرێت، هێرش بکات.
رۆژنامەکە ئەوە ڕوندەکاتەوە کە سەرکردایەتی ئێران هەڕەشەکانی وەک پڕوپاگەندەی ئیسرائیلی تەنیا بۆ گوشار خستنە سەر بۆ ئەوەی لەدانوستانەکاندا ئیمتیازات وەربگرێ لێکدەدایەوە، ئەمەش بووە هۆی ئەوەی ڕێوشوێنی خۆپارێزی ئەمنی لاواز بێت‌و ئەگەری زەبروەشاندنی ئیسرائیل بەر لەشکستهێنانی دانوستانەکان رەتبکاتەوەو بەدرێژەکێشانی دانوستانەکان فریوو درا.
لەڕاپۆرتەکەی نیویۆرک تایمزدا ئاماژە بەوە کراوە کە سەرکردەکانی ئێران بەر لەشکستهێنانی دانوستانەکان هێرشەکانی ئیسرائیلیان ڕەتکردووەتەوەو ئاماژەیان بەوە کردووە کە ڕێوشوێنە خۆپارێزو پلان بۆ داڕێژراوەکان پشتگوێ خران، ئەمەش بە گوتەی کاربەدەستانی ئێرانی ئەنجامە کارەساتبارەکانی لێکەوتەوە.
فەرماندە باڵاکانی سەربازی سەرەڕای هۆشدارییەکان لەبنکەیەکی تاران کۆبوونەوەیەکی بەپەلەیان ئەنجامداوەو لەو هێرشەدا بەکۆمەڵ کوژراون‌و ئەمەش توانای ئێرانی بۆ وەلامدانەوەی بەپەلەی هێرشەکان پەکخستووە.
سەرچاوەکان بە ڕۆژنامەی نیویۆرک تایمزیان ڕاگەیاندووە، ئیسرائیل گورزێکی وێرانکەری لەسیستەمی فەرماندەیی و کۆنترۆڵکردنی ستراتیجی ئێران داوە، هاوکات شکستێکی گەورەی هەواڵگریی ئێرانیش بەدیدەکرێت.