ئا: ئاوێنە

هەرچەندە وا بڕیاربوو پێش هەڵبژاردنی ١١ی ١١ی ئەنجومەنی نوێنەرانی عێراق مووچەی مانگی نۆ بنێردرێت، بەڵام بەهۆی ئامادەنەبوونی ١٢٠ ملیارەکەی هەرێم؛ نەنێردرا. لە پاش هەڵبژاردنیش بەپێی وتەی پەرلەمانتارێکی پێشووی بەغدا، لەدوای هەڵبژاردنەوە بابەتی مووچە روئیای ناروونە، بەڵام ئەگەر بێت و فیدراڵ چاوەڕێی ئەوە بێت کە مووچەی مانگی ١١ی فەرمانبەرانی دابەشبکات و لەگەڵ ئەوەدا مووچەی مانگی ٩ بنێرێت، ئەوا کێشە بۆ دوو مووچەی کۆتایی ئەمساڵ دروست دەبێت.

شیروان میرزا، ئەندامی پێشویی پەرلەمانی عێراق لەسەر فراکسیۆنی یەکێتی نیشتیمانیی کوردستان، لەبارەی مووچەی مانگەکانی کۆتایی ساڵ لەگفتوگۆیەکی ئاوێنەدا وتی "لەدوای هەڵبژاردنەوکانەوە بابەتی مووچە هیچ روئیایەکی دیار نییە، وە نازانین ئایا بەغدا چاوەڕێیە مووچەی مانگیی ١١ دابەشبکات لە عێراق و پاشان لەگەڵ ئەوەدا مووچەی مانگی ٩ی هەرێم بنێرێت، کەواتە ئەگەر لە مانگی ١١ مووچەی مانگی ٩ بنێرێت و لە ١٢ش مووچەی مانگی ١٠ بنێرێت، ئەوا بەهۆیەوە دوو مووچەی کۆتایی ئەمساڵ ئایندەی نادیار دەبێت".

سەبارەت بە ١٢٠ ملیار دینارەکەشەوە، بەوتەی میرزا بێت، تاوەکو ئێستا روون و نەزانراوە کە هەرێم ١٢٠ ملیار دینارەکەی ئامادەیە یاخود نا، چونکە "هیچ فشارێکی لێنابینین کە بۆ مووچەی مانگی ٩ داهات بینێرێت، وە تەنانەت حکومەتی هەرێمیش نازانێت پلانی بۆ ئەوە چییە!".

لەسەر نەوتیش، پەرلەمانتارەکەی پێشویی عێراق دەڵێت "تاوەکو ئێستا هیچ کێشەیەک بۆ نەوت نەهاتووەتە پێش. بەڵام لەبارەی مووچەوە تا ئەم ساتەیە نە هەرێم و نەبە‌غدا؛ بەفەرمی هیچ قسەیەکیان نەکردووە، شیروان میرزا دوپاتیشیکردەوە، "ئەگەر فشارێکی جدی نەکرێت ئەگەری مووچە فەوتان هەیە".