ئا: ئاوێنە

دەم پارتی داوا دەکات کۆنووسی سەردانی سێ ئەندامی کۆمیسیۆنی هاوپشتی نیشتمانی و برایەتی و دیموکراسی پەرلەمانی تورکیا بۆ لای عەبدوڵا ئۆجالان سەرۆکی پەکەکە، ئاشکرا بکرێت.

ڕۆژی دووشەممە ٢٥ی ئەم مانگە، حوسێن یایمان، جێگری سەرۆکی فراکسیۆنی ئاکەپە، گولستان کلیچ کۆچیغیت، جێگری سەرۆکی فراکسیۆنی دەم پارتی، فیتی یڵدز، جێگری سەرۆکی فراکسیۆنی مەهەپە، لەئیمرالی لەگەڵ عەبدوڵڵا ئۆجەلان کۆبونەوە.

جەهەپەو یەنی یۆل، کە ئەنادامئ کۆمیسیۆنەکە بوون، بەشێک نەبوون لەو شاندەی چوونە ئیمرالی.

بەپێی زانیارییەکان، سێ ئەندامی کۆمسیۆن لەئیستەنبوڵەوە بەرەو دوورگەی ئیمرالی، کە ئۆجەلان لەوێ دەستبەسەرە، بە هەلیکۆپتەر گەشتیان کردووە.

کۆبوونەوەکە دوو کاتژمێرو ٥٠ خولەکی خایاندووە. لەکۆبوونەوەکەدا هیچ گرتەیەکی ڤیدیۆیی تۆمار نەکراوەو ئەندامانی کۆمسیۆن لەگەڵ ئۆجەلان وێنەیان نەگرتووە، بەڵام دەنگی گفتوگۆکانیان تۆمار کراوە.

بەپێچەوانەی کۆبوونەوەکانی پێشوو، بەرپرسانی حکومی‌و میت‌و ئەمنی ئامادە نەبوون، بەو پێیەی کۆبوونەوەکە بەناوی پەرلەمانەوە ئەنجامدراوەو کۆنوسەکانیش پارێزراون.

بەگوێرەی زانیارییەکان، ئەندامانی کۆمسیۆن پرسیاریان لەبارەی پڕۆسەکە کردووەو ئۆجەلان ئەو پەیامەی گەیاندووە کە سوورە لەسەر لێدوانەکانی، بۆ دانانی چەک‌و هەڵوەشاندنەوەی پەکەکە.

هەروەها بەتوندی جەختی لەگرنگی ڕۆڵی دەولەت باخچەلی کردوەتەوە لەم پرۆسەیەداو سوپاسی سەرکردەکانی کردووە.

ئۆجەلان وتویەتی "خۆزگە جەهەپەش ئامادە بوایە".

هەروەها لەم دیدارەدا پەرەسەندنەکانی سوریا تاوتوێ کراوە، تولای هاتیمۆغولاری، هاوسەرۆکی پارتی دیموکرات لەکۆبوونەوەی پەرلەماندا ڕایگەیاند "ئۆجەلان، دیدگایەکی خستەڕوو کە دەتوانێت کلیلی پڕۆسەی چارەسەرکردن بێت، بەتایبەتی بۆ باکووری ڕۆژهەڵاتی سوریاو بۆ سوریا بەگشتی".