ئا: ئەیهان سەعید

غەریب حەسۆ، هاسەرۆکی یەکێتی پارتی دیموکراتیک (پەیەدە) لەم گفتوگۆیەیدا لەگەڵ ئاوێنە دەڵێت "هەمو بڕیارەکانی جۆلانی بڕیاری تورکیان، بڕیاری دەزگای هەواڵگری تورکیان هاکان فیدان ئیدارەی هەمو شتێک دەکات‌."

ئاوێنە: ئەمە چی بو لەسوریادا رویدا؟ شرۆڤەی ئێوە چییە لەسەر هێرشەکانی گروپە چەکدارەکانی سوپای نوێی سوریا لەسەر ئەو ناوچانەی کە لەژێر کۆنترۆڵی هێزەکانی سوریای دیموکراتیک (هەسەدە)دان؟ ئەم هێرشانە چ مەترسییەک بۆ ئاسایشی سوریاو ناوچەکە دروست دەکەن، بەتایبەتی بە لەبەرچاوگرتنی بونی هەزاران زیندانی داعش لەزیندانەکان‌و بونی ئەندامانی داعش لەنێو سوپای نوێی سوریادا؟

غەریب حەسۆ: وەک دەزانن دۆخێکی تایبەتی جەنگمان هەیەو خەباتێکی زۆر لەبەردەماندا هەیەو ڕاگەیاندنەکان بەردەوام لەسەرخەتن، ئێمە لەناو سەفەربەری گشتیداین بۆیە خەباتی زۆرمان لەپێشە. رەوشی سوریا بەم شێوەیەیە، لەئێستادا شتێک نییە بەناوی سوپای سوریا، کاتێک سوریا دەبێتەوە بەدەوڵەتی سورییەکان دەبێت سوپایەکی سوری دروست ببێت. ئەم سوپایەی ئێستا نوینەرایەتی سوریا ناکات بەڵکو نوێنەرایەتی داعش و بەرەی نوسرەو حەمزات و حەمشات دەکات کە هەمویان تیرۆریستن و گروپی جیهادی و تەکفیرین، چۆن لەمانە سوپایەک دروست دەبێت کە نوێنەرایەتی وڵاتیک بکات، ئەگەر سوپایەکی یاسایی بوایە خەڵکی سوریا بونایە ئەم هێرشانەیان نەدەکردو ڕێزیان لەهێزەکانی سوریای دیموکرات دەگرت، چونکە هەسەدە لەبەرامبەر تیرۆرستانی دوژمنی جیهان بەرخۆدانێکی بێوینەیان کرد، بۆیە ئەو هێزانەی ئێستا کە پاشماوەی داعشن هێزەکانی سوریای دیموکرات قبوڵ ناکەن، چونکە هەسەدە لەوان بەهێزترە پەسەندکراوی میللەتە، لەکاتی شەڕدا زۆربەی لایەنە سورییەکان داوایان دەکرد هەسەدە با ئێمەش بپارێزێ‌و بچێتە شارەکانی ئەوان، بەڵام هیچ کەسێک بانگی ئەوانی نەکرد تا بیانپارێزێت چونکە جێگەی متمانەیان نین، کەس داوا لەسوپای تیرۆر ناکا کە بەهانایانەوە بچێ، لەکاتیکدا ئەمانە خۆیان وەک سوپای سوریا ناساندوە، خەڵک بەدەستیانەوە ئازارێکی زۆری چەشتوەو زوڵمی زۆریان لەخەڵک کردوە. ئەم هاوخەمییەی خەڵک بۆ هەسەدە بۆتە هۆکاری زیادبونی ڕق و کینەی ئەوان بەرامبەر هەسەدەو ترسێکی زۆری لا دروستکردون، بۆیە هاوئاوازەکانی داعش هەریەکە لەتورکیاو سعودیەو قەتەر بەم جۆرە ئەمریکاو لایەنە هاوپەیمانەکانیان ڕازی کردوە کە ڕێگە لەبەردەم ئەم سوپا پڕ لەتیرۆرستە بکەنەوە لەدژی هه‌سه‌ده‌، هاوشانی شەڕی سەربازی ئەم دەوڵەتانە شەڕی تایبەت‌و شەڕی ڕاگەیاندن بەقورسی لەدژی هەسەدەو ئیدارەی خۆسەر بەڕێوەدەبەن‌و بەردەوام خەریک دژایەتیکردن و ناشیرنکردنی کوردن لەڕاگەیاندنەکانیانەوە، میدیاکانی تورکیاو قەتەڕو میدیا عەرەبییەکان بەگشتی هاوکاری زۆریان دەکەن هەمو هەوڵی خۆیان خستۆتە گەر بۆ ئەم دژایەتی کردنە. لەبەر ئەم هۆکارانەیە کە سوپا لەم چەتانە دروست ناکرێت کە بەتەواوی خاڵین لەمرۆڤایەتی‌و ئەخلاق، هیچ هونەرێک و برایەتییەکیان قبوڵ نییە تەنیا تەکفیرو کوشتن تاڵان کردنیان هەیە، بۆیە تەنیا کۆمەڵکوژی‌و تاوانەکانی شەڕیان لێدەبینین. ئەمانە مەترسییەکی زۆر گەورەن بۆ سەر ئاسایشی سوریا بەگشتی‌و هەرێمی ئێمە بەتایبەتی تا ئێستا ئەم مەترسییە لەلایەن هه‌سه‌ده‌وە و ئیرادەی گەلانەوە پێشی لێگیراوە، هەسەدە بۆتە بەربەست لەبەردەمیاندا لەبەرئەوە ئەوان هەمو کارێک دەکەن، هێرش دەکەنە سەر نەتەوە جیاوازەکان، سەر میللەتان، سەر نەتەوەی دیموکراتیک‌و برایەتی گەلان بۆ ئەوەی ئەم بەربەستە لەبەردەم خۆیان لا ببەن. ئەگەر ئەوان بتوانن (خوانەکا) ئەم ئەزمونە کۆتایی پێبهینن ئەوا مەترسی زۆر دروست دەکات، لەبەرئەوەی بەهەزاران ئەمیری داعش لەو زیندانەدان کە لەژێر کۆنتڕۆلی هەسەدەدان‌و بەهاوبەشی لەگەڵ هاوپەیمانی نێودەوڵەتی دژی داعش زیندانەکان دەپارێزن، بەڵام ئێستا بە بەرچاوی کۆمەڵگای نێودەوڵەتییەوە ئەو داعشانە هەڵدێن لەزیندانەکان، لەبەرئەوەی ئەو هەڤاڵانەی کە پاسەوانی زیندانەکان بون زۆربەیان شەهیدبون‌و ئەوانی تر بەدیل گیراون، بەتایبەت لەزیندانی شەدادیەو تەبقەو زیندانەکانی کەمپی ئاریشە، هەمویان ڕایان کردوەو هەڵاتون، ئەمە بوە هۆکاری دروستکردنی ترس لەناو خەڵکدا، ڕاگەیاندنەکانی تورک و عەرەب بەگرنگییەوە باسی دەکەن و دەبنە هۆی ترساندنی خەڵک و بڵاوکردنەوەی پڕوپاگەندە بۆ داعش.

ئاوێنە: ئایا هاوپەیمانی نێودەوڵەتی دژی داعش گڵۆپی سەوزی بۆ ئەو گروپە چەکدارانە هەڵکردوە کە لەژێر ناوی سوپای سوریادا کاردەکەن‌و چۆن ڕۆڵی تۆم باراک هەڵدەسەنگێنیت؟

غەریب حەسۆ: ئەگەر ئەمانە گڵۆپی سەوزیان لەهاوپەیمانی نێودەوڵەتی وەرنەگرتایە نەیاندەتوانی ئاوا بەئیسراحەت هێرش بکەنە سەر ڕۆژئاوای کوردستان، نەیاندەتوانی وا بەئاسانی ئەو دڕندەییەی خۆیان پیادە بکەن، ئێمە پەیمانی ١٠ی ئازارمان هەبو کە  ئەمریکاو بەریتانیاو فەرەنسا ناوبژییان دەکرد، بەڵام کاتێک ئەم پەیمانە پێشێل دەکەن‌ و هێرش زیاد دەبن ئەمە مانای وایە گڵۆپی سەوزیان بۆ هەڵکراوە، گڵۆپیان بۆ تورکیاش هەڵکردوە کە ڕۆڵێکی زۆر ترسناک‌و مەترسیدار دەبینێت لەکوشتنداو ڕۆڵی هاوبەش دەبینێ لەگەڵ داعش، هەرچەندە تورکیا لەناو هاوپەیمانیی نێودەوڵەتیدایە، بەڵام هەمومان دەزانین کە تورکیا داعشی تیمار کردو چاکی کردەوە.

تۆم باراک وەک نێردەی ئەمریکاو نێردراوەی تایبەتی ترەمپ بۆ ئەوەیه‌ ڕۆڵی ناوبژیوان ببینێت، بەڵام ڕۆڵێکی باش نابینێت و شایەنی ئەو ڕۆڵە نییە، ئەو ئەرکەی پێسپێردراوە وەک نێردە جێبەجێی ناکات، بەڵکو بەدوای ویستی خۆیەوەیەتی، کەسێکە حەزی لەسیخوڕیکردنە، حەزی لەشەڕەو بەئاشکرا جۆلانی دەپارێزێت، پەیوەندی بەهێزی لەگەڵ هەیەو پێی کاریگەر بوە، چۆن ئەم پەیوەندییە بەهێزە دروستبو؟ ئەمە قەتەرو تورکیا کردیان، کە تۆم باراک وەک جۆلانی بیربکاتەوە، لەکاتێکدا جۆلانی یەکێکە لەوانەی کە ٢٠٠١ هێرشی پنتاگۆنی کردوەو لەو کردەوەیەدا بەشداربوە، وەک سەرکردەیەک سەرپەرشتی ئەو کارەی کردوە، ئەوکات قاعیدە بو ئێستاش بەدڵ هەر قاعیدەیە. جێگەی تێڕامانە کە چۆن ئەمریکا کەسێکی وەک تۆم باراک دیاری دەکات کە خوێنی میلەتی خۆی لەبیرکردوە، هەر بۆیە ڕۆڵی تۆم باراک ڕۆڵێکی نێگەتیڤەو خراپەو نهێنییەو لەخزمەتی تورکیاو قەتەردایە لەخزمەتی داعش‌و جۆلانیدایە، یاساکانی نێوەندگیری جێبەجێ ناکات، نێوەندگیر دەبێت بێلایەن بێت، بەڵام تۆم باراک بەئاشکرا لایەنگیری داعش دەکات‌و ئەمە لەناو کۆبونەوەکاندا بەڕونی دەردەکەوێت، کاتێک جۆلانی شتێک سەبارەت بەکوردان دەڵێت، تۆم باراک‌و تورکیا دەڵێن کە ئەم شتە بڵێ‌و ئەمە مەڵێ. چونکە کاتی ڕێککەوتنی نێوان کوردو جۆلانی ئەو خۆی پەڕەیەکی زیاد کرد. ئەو نێوه‌ندگیره‌ بەڵام داوای تەسلیمبون لە ئێمەو گەلەکەمان دەکات، داوای کۆیلە بون لەگەلەکەمان دەکات، دەڵێت بڕۆن لەژێر دەستی جیهادی‌و تەکفیرییەکاندا بژین کە ئەمانە ژیانیان لەگەڵ ناکرێت بۆیە ژیانی ئێمە لەژێر مەترسییەکی گەورەدایە، بۆیە ئێمە تەسلیمبون قەبوڵ ناکەین، مردن قەبوڵ ناکەین، ئێمە خەباتمان کرد بۆ دیموکراتی‌و ئیرادەی ئازادو شکۆمەندانە، ئێمە دەمانەوێت سوریا دیموکراتیک بێت و بۆ هەمو لایەنەکان بێت بەبێ جیاوازی، نەک وەک ئەوەی تۆم باراک دەڵێ خۆتان تەسلیم بە جیهادییەکان و داعش بکەن و بڕۆن ببنە کۆیلە و فەرزی دەکات دەڵێت بڕۆن تەسلیم ببن. ئەمە لە بنەڕەتدا تێڕوانینی تورک و جۆلانییە کە دواتر لەسەر وەرەقەیەک دەینوسن و جۆلانیش لەسەر تەلەفزیۆن دەیخوێنیتەوە، کاتیک مەزڵوم عەبدی ئاگربەست دەکات ئەوان پەیوەست نابن پێوەی‌و شەڕ راناگرن، ئەگەر ئەوان ئاگربەست نەکەن ئێمەش نایکەین، تۆم باراک کەسێکی شەڕخوازەو پەسەندکراوی کۆنگرێس نییە، تەنیا هی ترامپە، بۆیە ئەمریکا دەبێت ئەم کەسە بگۆڕێت، چونکە کەسێکی کڕدراوەو بەئاسانی قەتەرو تورکیا دەیکڕن و دەیفرۆشن. بۆیە لە کۆتایدا دەڵێم کە رۆڵی تۆم باراک ڕۆڵێکی نهێنی و سلبیە، پشتگیری شەڕ دەکا، پشتگیری داعش دەکا، پشتگیری کوشتنی کوردان دەکاو خوێنی دروزو عەلەویەکان حەلال دەکات، کوشتنی کریستیانەکان حەلال دەکات، تۆم باراک پێشەنگی خراپتر کردنی سوریایە.

 ئاوێنە: چ مەترسییەک هەڕەشە لەکۆبانی و حەسەکە دەکات‌و پلانتان چییە بۆ ڕوبەڕوبونەوەی ئەم مەترسییە؟

غەریب حەسۆ: بێگومان کاتێک هەمویان بونە چەتەو داعش  بونە تیرۆرست دەبێت لایەنێکی سێیەم گەر نەبێت ئەوکاتە مەترسییەکە زۆر گەورەتر دەبێت، یانی پێشتر چەتە هەبون، بەس ڕژێمی بەعس هەبو، ئێمەیش هەبوین، کە ئەمە ببوە هۆی دروستکردنی هاوسەنگی‌و بێدەنگکردنیان، بەڵام دوای ڕژێم مەیدانەکە بەتەواوی بۆ چەتەکان چۆڵ بو، بۆیە ئێمە بەبێ گرنتییەکی دەستوری و ڕێکەوتنێک نەبێت قەبوڵی ناکەین بێماف و بێ گرەنتی بین، بۆیە ئێمە خاوەن هەڵوێستین و خاوەن قسەی خۆمانین، مافی گەلی ئێمە دەبێت پەسەند بکرێت، ئێمە گەلی ڕەسەنی ناوچەکەین، یەکێکین لەپێکهاتە سەرەکییەکانی ناوخۆی سوریا، ئێمە میوان نین و میللەتی رەسەنی ئێرەین‌و ئێمە لەسەر خاکی خۆمانین، بەڵام ئەوان چواردەورمان دەگرن و سنورەکان تەسک دەکەنەوەو قڕمان دەکەن، دەیانەوێت ئەو کۆبانێیەی لەبەرامبەر داعش تێکۆشانی بێوێنەی کردو بوە سمبولی جیهانی ڕوبەروبونەوەی تیرۆر تا وای لێهات ڕۆژێکی جیهانی بەناوەوە بکرێت و تائێستاش زار بەزار دەگێڕدرێتەوە کە چۆن ڕاونانی چەتەکانی داعش لەکۆبانێوە دەستی پێکردو بوە قەڵغان بۆ جیهان، ئێستا چواردەوریان گرتوەو لەناو مەترسییەکی گەورەدایە، پێویستە هەمو کەس خۆی لێ بەخاوەن بکات. ئازایەتی‌و مرۆڤایەتی لە کۆبانیوە دەستیپێکردوە، بۆیە بەزۆری هێرش دەکەنە سەرکۆبانێ‌و حەسەکە. کۆبانی لەحەسەکە بچوکترە، بەڵام کێشەکە ئەوەیە کە چواردەوری ئەم شاره‌نەیان کردوە بە خێڵە عەرەبەکان کە ڕاستوخۆ هەمویان دەبنە داعش‌و لەگەڵ چەتەکان یەکدەگرن، کە ئەمەش بەجیا مەترسییەکی ترە، بۆیە ئێمە پلانمان وایە کە بەرخۆدان بکەین و تێبکۆشین تا ئەم مەترسییە گەورەتر نەبێت، ئێمە پێشتر ١٥ هەزار شەهیدمان داوە، ئامادەین ١٥ هەزاری تریش شەهید بدەین، بەڵام تەسلیم نابین‌و ناچینە ژێر حوکمی ئیدارەی چەتەو داعش. ئێمە خۆمان فیدا دەکەین، بەڵام خاکی خۆمان بەجێناهێڵین، بۆیە ئێمە بانگەوازیمان لەهەمو جیهان کردوە بەدەوڵەتە عەرەبیەکانیشەوە، لەیەکیەتی ئەوروپاش، بانگەوازیمان کردوە لەتەواوی کوردستان، لەحیزبە سیاسییەکان، لەگەنجان‌و لاوان  تەواوی چین‌و توێژەکان کە لەرۆژئاوا خاوەن دەرکەون، چونکە ئێوە پشتی ئێمەن، هێزی ئێمەن، خۆمان خاوەنی ئەم میلەتە بێخاوەنە بین، ٥٠ ملیۆن هێزێکە کە دەتوانی سەرکەوێت، چونکە ئێمە بۆ ئازادی تێدەکۆشین‌و خەریکی پاراستنی خۆمانین. بۆیە ئێستا کۆڵان و شەقامەکانی ڕۆژئاوا پڕن لەکەسانی خۆبەخشی پارچەکانی تری کوردستان، گەلی کورد بەفراوانی وەڵامی سەفەربەریەکەی هەسەدەی دایەوە.

ئاوێنە: ڕۆڵی باشوری کوردستان چۆن هەڵدەسەنگێنن؟ پێتانوایە دەبێت حکومەتی هەرێمی کوردستان لەم قۆناغەدا چی بکات؟

غەریب حەسۆ: باشوری کوردستان و دەسەڵاتدارانی باشوری کوردستان زۆر گرنگن، لەم کاتە هەستیارو دژوارەدا ڕۆڵێکی زۆر مێژویی دەگێڕن و زۆر کوردستانیانە بەئەرکەکە هەستاون، لەسەرو هەمویانەوە جەنابی مەسعود بارزانی، بەڕاستی ڕۆڵێکی کوردستانی دەگێڕێت و هەوڵێکی گەورەی داوە بۆ ئارامی‌و ئازادی و پێکەوەیی، لەلایەکی ترەوە حکومەتی هەرێمی کوردستان و پارتە سیاسییەکان و سکرتێرەکانیان هەمویان پەیوەندییان لەگەڵمان هەیەو هەڵوێستیان پیشانداوە وتویانە کە چ شتیک پێویست بێت ئەوان دەیکەن بۆ هاوکاری ڕۆژئاوای کوردستان، باشوری کوردستان لەسەر ئاستی دیپلۆماسی قورساییەکی زۆری هەیەو پێگەیەکی باشی هەیە، لەئێستادا دیپلۆماسییەت بۆ ئێمە زۆر گرنگە، بۆیە حکومەتی باشور دەتوانێت لەڕوی دیپلۆماسییەوە ڕۆڵێکی زۆر باش بگێڕێت. شەڕ ئێستا لەبەردەرگای ئێمەیەو ئەم مەترسییە تا باشوری کوردستان درێژ دەبێتەوە، بەعێراقیشەوەو ئیزیدییەکانیشمان بیرنەچێت کە هێشتا مەترسیان لەسەرە، چونکە ئامانجی سەرەکی ئەوان کوردە، کورد لەکوێ هەبێت ئەوانیش لەوێ دەبن بۆ قڕکردنیان، لە ٢٠١٤ کە داعش هات لەهەمو شوێنەکانەوە پەلاماری کوردی دا، لە باشور لەرۆژئاوا، ڕەقەی گرت کە شارێکی دەوڵەمەندە، پاشان پەلاماری کوردی دا، دواتر بۆ موسڵیش بەهەمان شێوە. باشە داعش دژی دەوڵەت بو، بۆچی هێرشی نەکردە سەر شام؟ بۆچی پەلاماری بەغدای نەدا؟ لەیەکەم ڕۆژی دروستبونیانەوە تا ئەمڕۆ تەنها هێرش دەکەنە سەر کوردەکان‌و لەگەڵ کەسی تر کێشەیان نییە، دەسەڵاتدارانی باشور بە بەڕیز مسعود بارزانیەوە بە کاک پاڤێڵ تاڵەبانییەوە تەواوی خەڵکی باشور ئەو ڕاستییە دەزانن و ئێمەش دەزانین کە ڕاستی داعش چیەو بۆ چ مەبەستیک دروست کراوە، بۆیە باشور ئەرکێکی زۆر گەورەی لەسەر شانە کە جێبەجیی بکات، بۆیە لەلایەنی دیپلۆماسییەوە دەبێت قەناعەت بە ئەوانە بکەن کە دەتوانن دەستیان پێیان بگات و ئەم شەڕە بوەستێنن و دواتر لەکاتی ئارامیدا رۆڵێکی گرنگ ببینن بۆ چەسپاندنی مافەکانی کورد لەناو دەستوردا لەسوریا. ئێمە بێ قانونی و بێ دەستوریمان ناوێت، بۆیە داوای سوریایەکی دیموکرات دەکەین، بۆ ئەوەی لەچوارچێوەی دەستوردا مافە کلتوری‌و یاسایەکانمان وەربگرین، ئێمە خەڵکی ڕەسەنی ئیرەین، ئێمە تێکۆشانمان کردوەو لە بنیاتنانی سوریادا ڕۆڵێکی گرنگ و بەرچاومان هەبوە وەک کورد، تەنانەت کورد بۆتە سەرۆک کۆماری سوریا.

ئاوێنە: ئایا هێرشەکانی گروپە چەکدارەکانی سوریا لەلایەن تورکیاوە پاڵپشتی دەکرێن؟ ئەگەر وابێت ئەمە چ کاریگەرییەکی لەسەر پرۆسەی ئاشتی لەتورکیا دەبێت؟

غەریب حەسۆ: تورکیا نەک تەنیا ڕۆڵی هەیە لەناوخۆی سوریادا، تورکیا بۆ خۆی لەناو حکومەتی سوریادایە، تورکیا تەنیا پشتگیری گروپەکان ناکات، بەڵکو دەوڵەتێکی شاراوەیە لەناو حکومەتی سوریادا، هەمو بڕیارەکانی جۆلانی بڕیاری تورکیان، بڕیاری دەزگای هەواڵگری تورکیان، هاکان فیدان ئیدارەی هەمو شتێک دەکات‌و گروپی ڕاوێژکارانی جۆلانی لەلایەن هاکان فیدانەوە بەڕیوەدەبرێن‌و شه‌یبانیش بۆ خۆی داردەستی تورکیایە، هەڵسوڕاوی دەزگای میتی تورکییە بۆیە تورکیا بەچڕی لەناو کۆشکی کۆماری سوریادا بونی هەیە، هیچ شتێک بێ ئەوان بەڕێوەناچیت. تورکیا هێرش دەکات‌و دەبابەو زرێپۆشی تورکی بەئاشکرا لەبەردەستی چەتەکانن‌و بەکاریاندەهێنن بەهەمانشێوە درۆنی دروستکراوی تورکیا لەناو سوریادان‌و سوپای تورکیا لەناو خاکی سوریایە لەعەفرین تا سەرێکانی‌و تەرابولس، هەمو شوێنەکان سوپای تورکیای لێیەو داگیری کردوە، تورکیا بەدو شێوە کار دەکات، لەلایەک پەلامارمان دەدات‌و لەلایەکی تر داوای ئاشتی دەکات، دەوڵەتێک بەم دوڕوییەوە کاربکات، چاوڕیی چی لێدەکرێت؟ ئێمە وەک ڕۆژئاوا هەم وەک باکور داوای ئاشتی دەکەین و لەسەر هەڵویستی خۆمان بەردەوامین.

سەرۆک ئاپۆ داوای ئاشتی کردو ویستی کۆتایی بەئازارو بەکوشتار بهێنیت بۆ هەردو دەوڵەتی کوردو و تورک هەر خۆی پێشەنگایەتی بۆ ئەم پرۆسەی ئاشتییە دەکات‌و بڕوای تەواوی بەپرۆسەکە هەیە، بەڵام تورک دەیەوێت یاری بەکات بکات‌و نەچێتە ژێر باری پرۆسەی ئاشتی کە خۆشگوزەرانی بۆ تەواوی ناوچەکە دەهێنێت، بەڵام تورکیا ئاشتی ناوێت، ئەگەر ئاشتی دەوێت کوا پرۆسەکە بەکوێ گەیشتوە، هەر کاتێک لاواز دەبێ داوای ئاشتی دەکات کە هەڵدەستێتەوە دەستدەکاتەوە بەشەڕو پەلاماردانی کورد، بۆیە تورکیا ئێستا لەناو گێژاوێکدایە دەیەوێ لەپرۆسەی ئاشتی ڕابکات، بۆیە پەلاماری چواردەوری خۆی دەدات‌و زیان بەئابوری خۆی دەگەیەنێت‌و زیان بەئاشتی  دەگەیەنێت بۆ ئەوەی تێکی بدات بەهەمو هێزی هاتۆتە سوریا و ئەوێشی تێکداوە، بۆیە وا لەجۆلانیش دەکەن کە ڕێکكەوتنامەی 10ی ئازار جێبەجێنەکات‌و هەوڵبدات لێی ڕابکات. تورکیا لەناو وڵاتەکەی خۆی ئاڵۆزی‌و ناکۆکی زۆر هەن، لەسوریاش گورزی کوشندەی بەردەکەوێ ڕۆژانە تانکەکانی دەسوتێنرێن‌و درۆنی بایرەکداری دەخرێتە خوارەوەو کە ئەمانە زەرەری ئابوری گەورەن بۆی، ئەگەر بیەوێ خۆی لەو ئاڵؤزیانە ڕزگار بکات‌و بیەوێ لەو گێژاوە بێتە دەرەوە ڕێگە چارەسەر بەرەوپێشبردنی پرۆسەی ئاشتییە. لەتورکیاو لەسوریاش چونکە ئەم دو دەوڵەتە دراوسێن ئارامی ناوخۆی سوریا بۆ هەردوکیان گرنگەو ئاڵۆزی کار لەهەردوکیان دەکات، تورکیا خۆی نابێتە ناوەندگیرو ناهێڵی وڵاتانی تریش ببنە نێوەندگیر، تورکیا گەر بیەوێت دەتوانێت رۆڵێکی زۆر باش ببینێت بۆ سوریا، ئەویش هاوکار بێت بۆ بەستنی کۆنگرەی سوری -سوری بەڵام تا ئێستا هیچ هەنگاوێکی نەناوە تەنها دێتە ناو شەڕو ئاژاوە دروست کردنەوە.

ئاوێنە: چۆن گەلی کورد لەباکوری کوردستان دەتوانن فشار لەسەر دەوڵەتی تورکیا دروست بکەن، لەپێناو ڕاگرتنی هێرشەکان بەتایبەت هێرشەکانی سەر کۆبانی؟

غەریب حەسۆ: کوردی ئێستا کوردی ڕابردو نییە، بۆیە بەئاسانی ناشکێت ئێستا لەباکور هەتا ئەستەنبوڵ میللەت لەسەرپێێەو چالاکی‌و کۆبونەوەو ڕێپێوان دەکات بۆ پشتگیری ڕۆژئاوا، لەباشور بەهەمانشێوە لەگەڵ دەستپێکردنی شەڕ لەسەر شەقامن‌و هەوڵ دەدەن کۆمەڵگای نێودەوڵەتی بهێننە سەرخەت، بۆیە کوردی ئێستا کوردی بەئیرادەیەو خاوەنی بیرو فەلسەفەی خۆیەتی، لەناو رۆژهەڵاتی ناوەڕاست  تەنها میللەتی کوردە کە هەنگاو بەرەو پێشکەوتن هەڵدەگرێت‌و گۆڕانکاری لەخۆیدا دروست دەکات، کورد هیچ کاتیک تاڵانی نەکردوە خەڵکی نەکوشتوە، بەڵکو بوینە هۆکاری پاراستنی ئەوانی تریش، کورد خەریکە پێشەنگایەتی دەکات لەناو ڕۆژهەڵاتی ناوەڕاست، بۆیە دوژمن ئەمە بەشایەنی ئێمە نازانێت‌و پێ قبوڵکراو نییە کە کورد لەو باشترو پێشکەوتوتر بێت، ئەوان تەنیا لەلایەنی سەربازی‌و شەڕو کوشتن پێشکەوتون، بەڵام لەلایەنی ئەقڵییەوە هێشتا نەگەیشتون بەکورد. مرۆڤایەتی دەتوانیت لەگەڵ کورد بژین، بەڵام مرۆڤایەتی لەوان رادەکات.

لەکۆتاییداو بەگشتی ئەوە دەڵێین، میلەتی ئێمە سەربەرزەو گەلی کورد با دڵخۆشبێت کە ئێمە لەناو سەفەربەریەکی گشتیداین، سڵاو دەکەین لەتەواوی میللەتی کورد ڕاستە چاو دڵی هەموان لەسەر ڕۆژئاوایە، هەڤاڵ جەنەرال مەزڵوم کاتێک لەهەولێر گەڕایەوە چو بۆ شام ئەو ڕێککەوتنەی کە هەبو نەیکردو ڕەتیکردەوەو هەڵوێستی وەرگرت، شەرەفمەندانە نەچوە ژێر باری پلانی ئەوان، خەڵک دەپرسێت چی بو. جۆلانی دەیەوێ ئێمە تەسلیم ببین‌و فەرزی بکات لەسەرمان لەهەمانکات ئێمەش بخاتە ناو ئەو پلانەی دژی گەلی کورد داڕێژراوە کە هەریەکە لەتورکیاو تۆم باراک لەپشتیەوەن، بۆیە شاندی کورد پەسەندیان نەکردو ئیمزایان نەکردو گەڕانەوە ڕۆژئاوا لەگەڵ گەل ڕوبەڕوی دوژمنان وەستاون.