ئا: ئاوێنە
ماوەیەکە مشتومڕی زۆر لەبارەی ئەو چەکانەوە دروستبووە کە دۆناڵد ترەمپ سەرۆکی ئەمریکا رایگەیاند چەکیان بۆ خۆپیشاندەرانی ئێران ناردووە و کوردەکان دەستیان بەسەردا گرتووە، لەوبارەیەوە شارەزایەکی بواری سەربازیی ڕایدەگەیەنێت، کە ئەگەر ئەمریکا و ترەمپ چەکیان ناردووە، بۆ ناڵێن چەکیان بۆ کێ ناردووە؟
جەبار یاوەر، ئەمینداری پێشووی وەزارەتى پێشمەرگە و شارەزای بواری سەربازیی دەربارەی ئەوەی ماوەیەکە ترەمپ چەند جارێک باسی ئەوەی کردووە چەکی بۆ خۆپیشاندەرانی ئێران ناردووە و کوردەکان دەستیان بەسەردا گرتووە، ئەو چەکانە لە کوێن و لای کێن؟ تایبەت بە ئاوێنەی وت "من هیچ زانیارییەکم نییە کە ئەمریکا چەکی ناردووە یان نا، بەڵام ئەمریکا و ترەمپ خۆیان دەتوانن بڵێن چەکیان بۆ کێ ناردووە و کێ دەستی بەسەردا گرتووە".
ناوبراو زیاتر روندەکاتەوە و دەڵێت "ناردنی چەک ڕێگا و ڕێکاری خۆی هەیە، هەرئاوا بە هەڕەمەکی نانێردرێت بۆ شوێنێک و بۆ لایەنێک، چەک بە سندوق نایەت و لە هەرێم فڕێی بدەن و بڵێن بینێرن بۆ فڵان شوێن، ئەمە ڕێکاری خۆی هەیە".
ئەو شارەزا سەربازییە زیاتر ئاشکرا دەکات لەسەر ئەو چەکانەوە و رایدەگەیەنێت "ئێستا ئەو هەڵایە لەسەر ئەو چەکانە درووست بووە، حکومەت و فەرمانگەی پەیوەندیەکانى دەرەوەی هەرێم دەتوانن بە نوسراوێکی فەرمی داوا لە کونسوڵگەری یان باڵیۆزخانەی ئەمریکا بکەن، ئەو چەکانە چەندن و دراون بە کێ و ئاگادارمان بکەنەوە، بۆ ئەوەی ئەو مەتەڵە هەڵبێت و ئەو قسە و قسەڵۆکانە نەمێنن، بە یەک نوسراو حکومەت یەکلایدەبێتەوە و کۆتایی دێت".
جەبار یاوەرباسی کاریگەری ئەو چەکانە لەسەر هەرێم دەکات و دەڵێت "بەڵێ لە دوو ڕووەوە کاریگەری لەسەر هەرێم هەبووە، ئەگەر ناردنی ئەم چەکانە ڕاست بێت بێگومان کاریگەری لەسەر پەیوەندی ئەمریکا و کورد درووست دەکات وەک دوو دۆست و هاوپەیمان".
پەیوەست بە کاریگەری دووەمیش، ئەو ئەمیندارە وتی "لەڕووی دووەمیشەوە کاریگەری لەسەر پەیوەندی هەرێم و ئێران دروست دەکات، چونکە ترەمپ دەڵێت ئەو چەکانەم ناردووە بۆ خۆپیشاندەران، بۆیە ئێستا ئێران ڕەنگە چاوەڕێی یەکلاییبوونەوەی ئەم بابەتە بکات".