ئا: ئاوێنە
لە چوارچێوەی بەردەوامیی گەمارۆکانی ویلایەتە یەکگرتووەکانی ئەمریکا بۆ سەر بەندەرەکانی ئێران، ئەمڕۆ هەینی سەرچاوە ئاگادارەکان ئاشکرایان کرد کە هێزەکانی ئەمریکا ڕێگرییان لە تێپەڕبوونی ژمارەیەک کەشتی کردووە کە هەڵگری نەوتی عێراق بوون لە گەرووی هورمز.
هۆکاری ئەم ڕێگریکردنە دەگەڕێتەوە بۆ ئەو تۆمەتانەی کە ئاراستەی بەغدا کراون، گوایە باج و رسوماتی تێپەڕبوونی بە کۆماری ئیسلامی ئێران داوە. لە بەرامبەردا، سەرچاوەکان بۆ کەناڵی (العربیة)یان پشتڕاست کردووەتەوە کە حکومەتی عێراق بە فەرمی لایەنی ئەمریکی ئاگادار کردووەتەوە و بە توندی ڕەتی کردووەتەوە کە هیچ جۆرە رسوماتێکیان بە ئێران دابێت.
لەسەر ئاستی مەیدانی، هێزەکانی ئەمریکا ڕایانگەیاند کە تا ئێستا ڕێڕەوی ١٢٩ کەشتی بازرگانییان لە گەرووی هورمز گۆڕیوە و ٦ کەشتی دیکەشیان پەکخستووە بەهۆی پابەندنەبوونیان بە ڕێنماییەکانەوە. لە هەمان کاتدا، ڕێگەیان بە تێپەڕبوونی ٣٦ کەشتی داوە کە هەڵگری هاوکارییە مرۆییەکان بوون.
لە ڕووی سیاسییەوە، لە چەند مانگی ڕابردوودا واشنتن چەندین جار جەختی لە هەڵوێستی نەگۆڕی خۆی کردووەتەوە کە گەمارۆی سەر بەندەرەکانی ئێران هەڵناگرێت و بەردەوام دەبێت لە ڕێگریکردن لە چوونەژوورەوە و هاتنەدەرەوەی هەر کەشتییەک. هەروەها، ئەمریکا بە ڕەهایی دژی ئەوەیە کە ئێران هیچ جۆرە رسوماتێک بخاتە سەر کەشتییە بازرگانییەکانی ئەو ڕێڕەوە ئاوییە، و بە تەواویش ڕەتی دەکاتەوە کە گەرووی هورمز لەلایەن ئێرانەوە بەڕێوە ببرێت.
قەیرانەکە دەگەڕێتەوە بۆ ٢٨ی شوباتی ڕابردوو؛ کاتێک جەنگی نێوان ئێران لە لایەک و ئەمریکا و ئیسرائیل لە لایەکی دیکەوە هەڵگیرسا. ئەمەش وایکرد جووڵەی کەشتیوانی لە گەرووی هورمز بە تەواوی ئیفلیج ببێت، کە پێشتر پێنجیەکی هەناردەی نەوت و غازی جیهان بەو گەرووەدا تێدەپەڕی.
گرژییەکان لە ١٣ی نیسانەوە پێیان نایە قۆناغێکی نوێوە، کاتێک ئەمریکا گەمارۆیەکی دەریایی توند و خنکێنەری خستە سەر بەندەرەکانی ئێران، و مەرجی هەڵگرتنی گەمارۆکەشی بەستووەتەوە بە گەیشتن بە ڕێککەوتنێک کە داواکارییەکانی واشنتن جێبەجێ بکات و کۆتایی بە جەنگەکە بهێنێت.