هاوسەرۆکی کۆنسەی بەڕێوەبەریی کەجەکە ڕایدەگەیەنێت، کاتی ئەوە هاتووە لە هەرێمی کوردستان کۆتایی بە قۆرخکاریی دەسەڵات لەلایەن حزب و بنەماڵەوە بهێندرێت و لەبری ئەوە حکومەتێکی یەکێتیی دیموکراتی پێکبهێندرێت. هاوکات مەرجەکانی بەدیهێنانی ئاشتی لە تورکیا و پێگەی عەبدوڵا ئۆجەلان لە پرۆسەکەدا دەخاتە ڕوو.
ئاوێنە: لە میانی بەشداریکردنی لە بەرنامەیەکی تایبەتی کەناڵی مەدیا خەبەردا، بەسێ هۆزات، هاوسەرۆکی کۆنسەی بەڕێوەبەریی کۆما جڤاکێن کوردستان (کەجەکە) و ئەندامی ئەو گرووپەی ئاشتی کە لە ١١ی تەممووزی ٢٠٢٥ لە ئەشکەوتی جاسەنەی سنووری پارێزگای سلێمانی چەکەکانیان سووتاند، هەڵسەنگاندنی بۆ دۆخی سیاسیی باشووری کوردستان و پێشهاتەکانی پرۆسەی ئاشتی کرد.
سەبارەت بە باشووری کوردستان کە تەوەری سەرەکیی پێشنیازەکانی بوو، بەسێ هۆزات جەختی لە پێویستیی ئەنجامدانی گۆڕانکارییەکی ڕیشەیی کردەوە و ڕایگەیاند؛ دەبێت دەست لە دەسەڵاتدارێتیی بنەماڵەیی و حزبی هەڵبگیرێت و سیستەمی فیدراڵیی ئێستای باشوور بۆ سیستەمێکی فیدراڵیی دیموکراتیی ڕاستەقینە بگۆڕدرێت. بۆ ئەم مەبەستەش، پێشنیازی پێکهێنانی "حکومەتێکی یەکێتیی دیموکراتی" کرد کە تیایدا سەرجەم هێزە سیاسییە جیاوازەکان و چین و توێژەکانی کۆمەڵگە بە شێوەیەکی دادپەروەرانە نوێنەرایەتییان هەبێت و بڕیارەکان ڕەنگدانەوەی ئیرادەی گشتی بن.
لە درێژەی قسەکانیدا بۆ پرسە ناوخۆییەکانی هەرێم، هۆشداری دا لەوەی کە دواکەوتنی پرۆسەی پێکهێنانی کابینەی نوێی حکومەت دوای هەڵبژاردنەکان زیان بە سەقامگیری دەگەیەنێت. لە بەرامبەریشدا، هەنگاوەکانی یەکخستنەوەی هێزەکانی پێشمەرگەی لە ژێر چەتری وەزارەتێکی هاوبەشدا بە پێشکەوتنێکی ئەرێنی و خاوەن گرنگییەکی ستراتیژی لێکدایەوە. بەسێ هۆزات پێی وایە، چەسپاندنی ئاشتی و دیموکراسی لە باشووری کوردستان، نەک تەنها ڕۆڵێکی مەزن لە دیموکراتیزەکردنی عێراق و گۆڕینی ڕۆژهەڵاتی ناوەڕاست دەگێڕێت، بەڵکو دەبێتە پشتیوانییەکی گەورەش بۆ تێکۆشانی کورد لە تورکیا، سووریا و ئێران.
لە تەوەری دووەمی قسەکانیدا و سەبارەت بە پرۆسەی ئاشتی لە تورکیا، هاوسەرۆکی کەجەکە ڕەخنەی توندی لە دەستووری ئێستای ئەو وڵاتە گرت و بە دەستوورێکی "تاکپارێز، ناوەندیپارێز، فاشیست و نکۆڵیکار" وەسفی کرد. دووپاتی کردەوە کە بۆ بەدیهێنانی ئاشتییەکی هەمیشەیی و چارەسەری، پێویستە ئەو دەستوورە هەڵبوەشێندرێتەوە و لە جێگەی ئەوە دەستوورێکی نوێی هاوچەرخ، دیموکراتیک و فرەڕەنگ دابنرێت کە بە فەرمی دان بە ناسنامەی کورد و مافی تەواوی باوەڕییەکاندا بنێت.
لە کۆتاییشدا سەبارەت بە ڕۆڵی عەبدوڵا ئۆجەلان لە قۆناغەکەدا، بەسێ هۆزات ڕایگەیاند؛ مامەڵەی دەوڵەت بۆ بینینی ئۆجەلان تەنها وەک ئەندامێکی لیژنەیەکی لاوەکی قبووڵکراو نییە. ئاماژەی بەوەش دا کە بزووتنەوەکەیان سوورە لەسەر ئەوەی کە پێویستە پێگەی ئۆجەلان بە فەرمی وەک "ڕێکخەر و هەماهەنگیکاری سەرەکیی پرۆسەی ئاشتی" بناسێندرێت، بەو پێیەی ماوەی دوو ساڵە بە کردەیی ئەو پرۆسەیە بەڕێوە دەبات.