عبدولفەتاح سیسی، سەرۆککۆماری میسر ڕایگەیاند، دەستووری وڵاتەکەی بۆ سەرۆکایەتی ناگۆڕدرێت ماوەی سەرۆکایەتییەکەی لە ساڵی ٢٠٣٠ کۆتایی دێت.
ئاوێنە: سیسی لە کۆبوونەوەیەکدا لەگەڵ دەرچووانی نوێی ئەکادیمیای سەربازیی میسر وتی "ئەم بابەتە بە تەواوی یەکلایی کراوەتەوە و سنووری دوو ماوەی سەرۆکایەتی لە دەستووری وڵاتدا ناگۆڕدرێت".
وتیشی "تا کاتێک حکومەتی میسر پڕ نەبێت لە کەسانێک کە توانای وەرگرتنی بەرپرسیارێتییان هەیە، دەست لە کارەکەم هەڵناگرم".
جێی ئاماژەیە، عبدولفەتاح سیسی لە ساڵی ٢٠١٣، دوای خۆپیشاندانەکان دژی محەمەد مورسی، سەرۆککۆماری ئەوکاتی میسر، دەسەڵاتی گرتە دەست. ساڵێک دواتر، دوای سەرکەوتن لە هەڵبژاردندا، بووە سەرۆککۆماری قاهیرە.
هەروەها حکومەتی میسر لە ساڵی ٢٠١٩، لەڕێگەی ڕاپرسییەکی گشتییەوە، ماوەی دەورەی سەرۆکایەتییەکانی درێژتر کردەوە، بەڵام بەپێی وتەی خۆی دەستوری وڵاتەکەی ناگۆڕێت و تاوەکو ٢٠٣٠ بەردەوام دەبێت لە دەورەی سەرۆکایەتی.